ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី ថ្លែងថាកងទ័ពអ៊ុយក្រែនដែលបានពលីជីវិតនៅក្នុងសង្គ្រាមមានចំនួន៥,៥ម៉ឺននាក់។ ចំនួននេះគិតតែសពទាហានដែលបានរកឃើញប៉ុណ្ណោះ។ ក្រៅពីនេះ លោកក៏ទទួលស្គាល់ផងដែរថាទាហានបាត់ខ្លួនក៏មានច្រើនណាស់ដែរ។ ការថ្លែងដូច្នេះស្របពេលដែលសង្គ្រាមអ៊ុយក្រែនជិតឈានចូលដល់បួនឆ្នាំហើយនៅបាំងតែជាងពីរសប្ដាហ៍ទៀតប៉ុណ្ណោះ។
លោកហ្សេឡិនស្គីថ្លែងនៅក្នុងបទសម្ភាសជាមួយទូរទស្សន៍បារាំងថានៅអ៊ុយក្រែន ចំនួនកងទ័ពពលីនៅលើសមរភូមិគិតទាំងទាហានអាជីព និងទាហានដែលទើបជ្រើសរើសថ្មីមានចំនួន៥៥០០០នាក់។ លោកថ្លែងបន្តទៀតថាបន្ថែមពីលើការបាត់បង់ជីវិតយុទ្ធជនទាំងនេះនៅមានមនុស្សជាច្រើនទៀតដែលសន្មតថាបាត់ខ្លួននៅពេលបំពេញបេសកកម្ម។
លោកមិនបានបញ្ជាក់ឱ្យបានច្បាស់ថាតើអ្នកបាត់ខ្លួននោះមានចំនួនប៉ុន្មានពិតប្រាកដទេ។ កាលពីខែកុម្ភៈ ឆ្នាំ២០២៥ លោកធ្លាប់ផ្ដល់បទសម្ភាសជាមួយទូរទស្សន៍អាមេរិកអឹនប៊ីស៊ី (NBC) ថាយុទ្ធជនពលីមានចំនួនជាង៤៦០០០នាក់។ កាលពីពាក់កណ្ដាលឆ្នាំ២០២៥ «មជ្ឈមណ្ឌលសិក្សាយុទ្ធសាស្ត្រ និងការសិក្សាអន្តរជាតិ» ប៉ាន់ស្មានថាទាហានអ៊ុយក្រែនបាត់បង់កម្លាំងប្រយុទ្ធជិត៤សែននាក់គិតទាំងស្លាប់ និងរបួស។
កាលពីខែមករា ឆ្នាំនេះ ក្រុមសិទ្ធិមនុស្សរបស់អង្គការសហប្រជាជាតិរាយការណ៍ថាជនស៊ីវិលអ៊ុយក្រែន២៥១៤នាក់បានស្លាប់ និង១២១៤២នាក់រងរបួសដោយសារការវាយប្រហាររបស់រុស្ស៊ីពេញមួយឆ្នាំ២០២៥។ ពោលគឺចំនួននេះលើសឆ្នាំ២០២៤ជិតបីដង។ រុស្ស៊ីក៏ខាតបង់មិនតិចដែរនៅក្នុងសង្គ្រាមនេះ។ កាលពីខែមករា មេបញ្ជាការកងទ័ពអ៊ុយក្រែនថ្លែងថាពេញមួយឆ្នាំ២០២៥ កងទ័ពរុស្ស៊ីជិត៤,២សែននាក់ស្លាប់ និងរបួស។
កាលពីខែតុលា ឆ្នាំ២០២៥ អង្គភាពស៊ើបការណ៍សម្ងាត់របស់អង់គ្លេសប៉ាន់ស្មានថារុស្ស៊ីបាត់បង់កម្លាំងប្រយុទ្ធ១,១លាននាក់គិតទាំងស្លាប់ និងរបួស។ ទាំងរុស្ស៊ី និងអ៊ុយក្រែនកម្រប្រកាសអំពីតួលេខទាហានរបស់ខ្លួនស្លាប់ និងរបួសនៅក្នុងសង្គ្រាមណាស់។ ប៉ុន្តែពួកគេច្រើនរាយការណ៍អំពីការស្លាប់ និងរបួសរបស់កងទ័ពម្ខាងទៀត។ ក្រុមអ្នកវិភាគយល់ថាភាគីទាំង២រាយការណ៍អំពីការបាត់បង់របស់ខ្លួនតិចជាងតួលេខជាក់ស្ដែង ហើយព្យាយាមនិយាយបំប៉ោងតួលេខរបស់ភាគីម្ខាងទៀត។ ដូច្នេះ ការអះអាងរបស់លោកហ្សេឡិនស្គីថាស្លាប់កងទ័ព៥៥០០០នាក់នោះក៏មិនប្រាកដជាការពិតដែរ៕ ប្រភព៖ អាល់ចាស៊ីរ៉ា់ (Al Jazeera) និងប្រភពដទៃទៀត
ចែករំលែកព័តមាននេះ