ខេត្តកំពង់ចាម ៖ មូលហេតុ នៃការបាក់ស្រុតច្រាំងទន្លេនេះ តាមស្ថានភាពជាក់ស្តែងបណ្តាលមកពីចរន្តទឹកទីតាំងនោះ មានអន្លង់ទឹកគួច ហើយមុខទឹក នៃទន្លេមេគង្គហូរមកបុកចំតែម្តង ទើបធ្វើឲ្យមានបម្រែបម្រួលចរន្តទឹក នាំឲ្យប៉ះពាល់ដល់សំណង់ច្រាំងទន្លេ…
ខេត្តកំពង់ចាម ៖ មូលហេតុ នៃការបាក់ស្រុតច្រាំងទន្លេនេះ តាមស្ថានភាពជាក់ស្តែងបណ្តាលមកពីចរន្តទឹកទីតាំងនោះ មានអន្លង់ទឹកគួច ហើយមុខទឹក នៃទន្លេមេគង្គហូរមកបុកចំតែម្តង ទើបធ្វើឲ្យមានបម្រែបម្រួលចរន្តទឹក នាំឲ្យប៉ះពាល់ដល់សំណង់ច្រាំងទន្លេ បូករួមទាំង សំណង់នេះសាងសងមានអាយុកាលយូរ ប្រហែល១៤ឆ្នាំហើយដែរ នេះបើយោងតាមរបាយការរបស់មន្ទីរធនធានទឹក និងឧតុនិយមខេត្តកំពង់ចាម។
រដ្ឋបាលខេត្តកំពង់ចាម បានចេញសេចក្តីប្រកាសព័ត៌មានថ្ងៃទី៣១ ខែមករា ឆ្នាំ២០២៦នេះថា ៖ កាលពីថ្ងៃទី៣០ ខែមករា ឆ្នាំ២០២៦ វេលាម៉ោងប្រមាណ ១១យប់ មានករណីបាក់ស្រុតច្រាំងទន្លេ នៅចំណុចភូមិ ទី១៥ សង្កាត់កំពង់ចាម ក្រុងកំពង់ចាម ខេត្តកំពង់ចាម ដែលចំណុចបាក់ស្រុកនេះ បានបណ្តាលឲ្យមានការ ប៉ះពាល់បឋមដូចខាងក្រោម ៖
-ផ្នែកខាងលើ បាក់ស្រុតសំណង់ច្រាំង និងសំណង់សួនទាំងស្រុង រួមនិងសំណង់ផ្លូវកៅស៊ូ មួយផ្នែកធំ ដែលមានបណ្តោយប្រវែងប្រមាណ ៧០ម៉ែត្រ ។
-ផ្នែកខាងក្រោម បាក់ស្រុតសំណង់បេតុងទប់ច្រាំង បណ្តោយប្រវែងប្រមាណ ៧០ម៉ែត្រ ទទឹង ៣២ម៉ែត្រ ចូលទឹកទន្លេទាំងស្រុង ។
ជាការវាយតម្លៃបឋម មូលហេតុ នៃការបាក់ស្រុតច្រាំងទន្លេ ករណីខាងលើនេះ គឺបណ្ដាល មកពី ៖ ម្យ៉ាងទីតាំងនោះ ស្ថិតនៅខាងមុខអន្លង់ទឹកកួច ដែលមានជម្រៅចាប់ពី ១.២ ម៉ែត្រ ទៅ ៦ ម៉ែត្រ និង ម្យ៉ាងទៀត សំណង់ច្រាំងទន្លេ ត្រូវបានសាងសង់តាំងពីឆ្នាំ២០១២ ដែលមកដល់ពេលនេះបានតស៊ូការពារ ការបាក់ស្រុតច្រាំងទន្លេងជាង ១៤ឆ្នាំហើយ ។
ឆ្លើយតបនឹងករណីនេះ រដ្ឋបាលខេត្តកំពង់ចាម បានដាក់ចេញជាវិធានការ ២ចំណុចភ្លាមៗ ដូចខាងក្រោម ៖
១. រដ្ឋបាលខេត្ត បានប្រើប្រាស់កម្លាំងសមត្ថកិច្ចហាមឃាត់ការធ្វើចរាចរណ៍ និងធ្វើដំណើចេញចូល តំបន់បាក់ស្រុតច្រាំងទន្លេ ជាបណ្តោះអាសន្ន ដើម្បីការពារសុវត្ថិភាពដល់ប្រជាពលរដ្ឋទូទៅ។ ជាមួយគ្នានោះ អ្នកប្រកបរបររកស៊ីក្នុងទីតាំង ឬជាប់នឹងទីតាំងកើតហេតុដែលប្រឈម ក៏ត្រូវបានណែនាំឲ្យធ្វើការផ្លាស់ប្ដូរទៅ ទីតាំងមានសុវត្ថិភាពដូចគ្នា ។
២. រដ្ឋបាលខេត្ត បានធ្វើរបាយការណ៍ជូនរាជរដ្ឋាភិបាល និងស្នើសុំអន្តរាគមន៍ទៅគណៈកម្មាធិការ ជាតិគ្រប់គ្រងគ្រោះមហន្ត និងក្រសួងធនធានទឹក និងឧតុនិយម ដើម្បីស្នើសុំការចុះពិនិត្យ វាយតម្លៃលក្ខណៈ បច្ចេកទេស និងពិនិត្យលទ្ធភាពក្នុងការស្តារ និងសាងសង់សំណង់ច្រាំងទន្លេឡើងវិញ។
រដ្ឋបាលខេត្តកំពង់ចាម សូមស្នើដល់ប្រជាពលរដ្ឋ ដែលរស់នៅក្នុងតំបន់ ឬធ្វើដំណើរទៅក្នុង ឬជិតតំបន់កើតហេតុ សូមបង្កើនការប្រុងប្រយ័ត្នខ្ពស់ និងចូលរួមសហការជាមួយសមត្ថកិច្ចដែលកំពុងប្រចាំការ រៀបចំសណ្តាប់ធ្នាប់ក្នុងតំបន់នោះ ប្រកបដោយការយោគយល់ ។
ជាក់ស្តែង នៅព្រឹក ថ្ងៃទី៣១ ខែមករា ឆ្នាំ២០២៦នេះ ក្រុមការងារបច្ចេកទេសរបស់ក្រសួងធនធានទឹក និងឧតុនិយម សហការ ជាមួយនឹងរដ្ឋបាលខេត្ត បានចុះមកដល់ទីតាំងកើតហេតុរួចហើយ។ ដោយលោក សា ស៊ីថា អភិបាលរងខេត្ត តំណាងលោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានដឹកនាំក្រុមការងារបច្ចេកទេសខេត្ត សហការជាមួយ នាយកដ្ឋានជលសាស្ត្រ និងការងារទន្លេ នៃក្រសួងធនធានទឹក និងឧតុនិយម បានចុះពិនិត្យ និងសិក្សាលើការបាក់ស្រុតច្រាំងទន្លេមេគង្គ ស្ថិតនៅសង្កាត់កំពង់ចាម ក្រុងកំពង់ចាម ។
បើតាមរបាយការរបស់មន្ទីរធនធានទឹក និងឧតុនិយមខេត្តកំពង់ចាម បានឲ្យដឹងថា មូលហេតុ នៃការបាក់ស្រុតច្រាំងទន្លេនេះ តាមស្ថានភាពជាក់ស្តែងបណ្តាលមកពីចរន្តទឹកទីតាំងនោះ មានអន្លង់ទឹកគួច ហើយមុខទឹក នៃទន្លេមេគង្គហូរមកបុកចំតែម្តង ទើបធ្វើឲ្យមានបម្រែបម្រួលចរន្តទឹក នាំឲ្យប៉ះពាល់ដល់សំណង់ច្រាំងទន្លេ បូករួមទាំង សំណង់នេះសាងសងមានអាយុកាលយូរ ប្រហែល១៤ឆ្នាំហើយដែរ។
ជាមួយគ្នានេះ លោកអភិបាលខេត្ត ក៏បានណែនាំដល់អាជ្ញាធរក្រុង រៀបចំសណ្តាប់ធ្នាប់ទីតាំង ដែលរងការបាក់ស្រុតនេះ មិនឲ្យមានការធ្វើដំណើរឆ្លងកាត់នោះទេ ដោយបិទចរាចរណ៍តាំងស្រុងតែម្តង ជៀសវាងការប៉ះពាល់ដល់សុវត្ថិភាពរបស់ ប្រជាពលរដ្ឋ។ លើសពីនេះ អាជីវករលក់ដូរនៅតាមមាត់ទន្លេនៅចំណុចនោះ លោកបានណែនាំឲ្យរកទីតាំងផ្សេងលក់បណ្តោះអាសន្នសិន រហូតដល់ពេលច្រាំងទន្លេ ជួសជុលរួចរាល់ ៕
ចែករំលែកព័តមាននេះ