រដ្ឋបាលខេត្តស្វាយរៀង ចុះសួរសុខទុក្ខវីរកងទ័ពឈ្មោះ បេ សុផាត ដែលរងរបួសពិការភ្នែកទាំងសងខាង
ខេត្តស្វាយរៀង ៖ នៅព្រឹកថ្ងៃសុក្រ ទី៣០ ខែមករា ឆ្នាំ២០២៦ លោក ម៉ែន វិបុល ប្រធានក្រុមប្រឹក្សាខេត្ត…
ខេត្តស្វាយរៀង ៖ នៅព្រឹកថ្ងៃសុក្រ ទី៣០ ខែមករា ឆ្នាំ២០២៦ លោក ម៉ែន វិបុល ប្រធានក្រុមប្រឹក្សាខេត្ត និងលោក ប៉េង ពោធិ៍សា អភិបាលខេត្ត បានអញ្ជើញមកចុះសួរសុខទុក្ខ វីរកងទ័ព ឈ្មោះ បេ សុផាត ដែលរងរបួសពិការភ្នែកទាំងពីរ ក្នុងពេលប្រយុទ្ធជាមួយសត្រូវឈ្លានទឹកដី ស្ថិតនៅទិសប្រាសាទព្រះវិហារ បានពេលកន្លងមក។ ហើយបានសង្គ្រោះ សម្រាកព្យាបាលនៅមន្ទីរពេទ្យអង្គឌួង និងបន្តទៅព្យាបាលនៅប្រទេសឥណ្ឌា បច្ចុប្បន្ន លោកកំពុងសម្រាកព្យាបាលនៅផ្ទះ ស្ថិតនៅភូមិទៃយា ឃុំធ្លក ស្រុកស្វាយជ្រំ ។
លោកអភិបាលខេត្ត បានសម្តែងនូវការកោតសរសើរបំផុត ចំពោះគំរូវីរភាព ក្នុងការបំពេញបេសកម្មដ៏ឧត្តុង្គឧត្តម ដើម្បីការពារដែនអធិបតេយ្យភាព និងបូរណភាពទឹកដីពីសត្រូវឈ្លានពានថៃ ដើម្បីការពារជាតិមាតុភូមិ ក្នុងបុព្វហេតុ ថែរក្សាសុខសន្តិភាពជូនប្រជាជនកម្ពុជា ប្រចាំការទិសប្រាសាទព្រះវិហារ ។
លោកអភិបាលខេត្ត បានជូនពរដល់វីរកងទ័ព បេ សុផាត ឲ្យឆាប់ជាសះស្បើយពីរបួស ជាពិសេសភ្នែកម្ខាង ដែលក្រុមគ្រូពេទ្យឥណ្ឌាកំពុងតាមដានព្យាបាល និងទៅម្តងទៀត រយៈពេល៣ខែក្រោយ សូមឲ្យជាសះស្បើយ ។
នៅក្នុងពេលចុះសួរសុខទុក្ខនេះដែរ លោកអភិបាលខេត្ត ប្រធានក្រុមប្រឹក្សាខេត្ត និងសហការី បាននាំមកនូវថវិកា ចំនួន៥លានរៀល និង២០០ដុល្លារ ព្រមទាំងគ្រឿងឧបភោគ បរិភោគ មួយចំនួនទៀតផងដែរ រួមមាន ៖ ទឹកត្រី១០យួរ, ទឹកស៊ីអ៊ីវ ២កេស និង២យួរ, អង្ករ(ទម្ងន់៥០គីឡូ) ចំនួណ១០បេ, ភេសជ្ជៈ ៥កេស និងមី ចំនួណ១០កេស ៕
ចែករំលែកព័តមាននេះ