ទីក្រុងប៉េកាំង៖ ប្រទេសចិនចេញសេចក្ដីអំពាវនាវទៅប្រជាជនរបស់ខ្លួននៅថ្ងៃនេះថាសូមកុំធ្វើដំណើរទៅកម្សាន្តនៅប្រទេសជប៉ុននៅអំឡុងបុណ្យចូលឆ្នាំចិនខាងមុខនេះឱ្យសោះព្រោះបញ្ហាសន្តិសុខនៅជប៉ុនឥឡូវនេះកំពុងតែចុះដុនដាបសម្បើមណាស់។ ចំណែកប្រទេសទាំង២ក៏បន្តមានជម្លោះការទូតជាមួយគ្នាមិនទាន់ដោះស្រាយបញ្ចប់នៅឡើយទេ។
ដោយសារតែពាក្យសម្ដីមួយឃ្លារបស់នាយករដ្ឋមន្ត្រីជប៉ុនដែលថា «នឹងធ្វើអន្តរាគមន៍យោធានៅតៃវ៉ាន់បើសិនកោះនេះត្រូវកងទ័ពចិនវាយប្រហារ» ប្រទេសចិនមិនសុខចិត្តនឹងរឿងនេះទេ ហើយបានបញ្ចេញប្រតិកម្មជាបន្តបន្ទាប់។ ក្នុងនោះ ប្រទេសចិនបន្តអំពាវនាវឱ្យប្រជាជនខ្លួនជៀសវាងមិនធ្វើដំណើរទៅប្រទេសជប៉ុន។ បន្ទាប់ពីនោះមក គេឃើញថាចំនួនអ្នកទេសចរចិនទៅកម្សាន្តនៅជប៉ុនថយចុះ៤៥%កាលពីខែធ្នូ ឆ្នាំ២០២៥បើប្រៀបធៀបនឹងរយៈពេលដូចគ្នាកាលពីឆ្នាំ២០២៤។
ក្រសួងការបរទេសចិនអំពាវនាវជាថ្មីម្ដងទៀតទៅប្រជាជនរបស់ខ្លួនសូមកុំធ្វើដំណើរទៅប្រទេសជប៉ុន ជាពិសេសនៅអំឡុងបុណ្យចូលឆ្នាំចិននាខែកុម្ភៈ។ នាយកដ្ឋានកុងស៊ុលនៃក្រសួងការបរទេសចិនចេញសេចក្ដីប្រកាសថាថ្មីៗនេះ បញ្ហាសន្តិសុខសាធារណៈនៅជប៉ុនធ្លាក់ចុះ និងកើតមានអំពើខុសច្បាប់ និងអំពើឧក្រិដ្ឋជាច្រើនករណីដែលប្រព្រឹត្តឡើងទៅលើជនជាតិចិន។
នាយកដ្ឋានដដែលនេះសរសេររៀបរាប់បន្តទៀតថាជនជាតិចិននៅជប៉ុនប្រឈមនឹងការគំរាមកំហែងផ្នែកសន្តិសុខធ្ងន់ធ្ងរ។ ម៉្យាងទៀត នៅជប៉ុនក៏ឧស្សាហ៍កើតមានគ្រោះរញ្ជួយដីកម្រិតធ្ងន់ធ្ងរនៅតំបន់ខ្លះផងដែរដែលបង្កជារបួសស្នាម។ សូមរំលឹកថាកាលពីមុនមានរឿងជាមួយគ្នា អ្នកទេសចរចិនទៅកម្សាន្តនៅប្រទេសជប៉ុន៧,៥លាននាក់នៅក្នុងរយៈពេល៩ខែគិតចាប់ពីដើមខែមករាដល់ខែកញ្ញា ឆ្នាំ២០២៥។ ពោលគឺចំនួននេះស្មើនឹង២៥%នៃអ្នកទេសចរបរទេសសរុបដែលទៅកម្សាន្តនៅជប៉ុន៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ