ទីក្រុងសេអ៊ូល៖ ថ្ងៃនេះ អាមេរិក និងកូរ៉េខាងត្បូងឯកភាពគ្នាថានឹងពង្រឹងកិច្ចសហប្រតិបត្តិការដើម្បីជួយសម្រេចបំណងរបស់កូរ៉េខាងត្បូងក្នុងការទទួលបាននាវាមុជទឹកដើរដោយថាមពលនុយក្លេអ៊ែរ។ នេះបើយោងតាមការប្រកាសរបស់ក្រសួងការពារជាតិកូរ៉េខាងត្បូង។ ការសម្រេចបានកិច្ចព្រមព្រៀងនេះបន្ទាប់ពីមានកិច្ចជំនួបរវាងអនុរដ្ឋមន្ត្រីការពារជាតិអាមេរិកជាមួយរដ្ឋមន្ត្រីការពារជាតិកូរ៉េខាងត្បូង។
នេះជាលើកទីមួយដែលអនុរដ្ឋមន្ត្រីអាមេរិក លោកអិលប្រ៊ីច ខូលប៊ី (Elbridge Colby) បំពេញទស្សនកិច្ចនៅក្រៅប្រទេស ហើយក៏ជាទស្សនកិច្ចដែលធ្វើឡើងចំពេលដែលរដ្ឋាភិបាលទីក្រុងវ៉ាស៊ីនតោនរំពឹងថាកូរ៉េខាងត្បូងនឹងដើរតួនាទីឈានមុខគេក្នុងការទប់ទល់នឹងកូរ៉េខាងជើង។ នៅក្នុងសេចក្ដីប្រកាសថ្ងៃនេះ ក្រសួងការពារជាតិប្រទេសទាំង២ចាត់ទុកកិច្ចសហប្រតិបត្តិការសាងសង់នាវានុយក្លេអ៊ែរនោះជាការបោះជំហានឆ្ពោះទៅរកការពង្រឹងសមត្ថភាពរបស់កូរ៉េខាងត្បូងដើម្បីការពារឧបទ្វីបកូរ៉េ និងដើម្បីពង្រឹងសន្តិសុខនៅក្នុងចំណោមសម្ព័ន្ធមិត្ត។
យោងតាមយុទ្ធសាស្ត្រការពារជាតិថ្មីរបស់មន្ទីរបញ្ចកោណដែលផ្សព្វផ្សាយកាលពីថ្ងៃសុក្រសប្ដាហ៍មុន អាមេរិកនឹងកាត់បន្ថយតួនាទីរបស់ខ្លួនក្នុងការទប់ទល់នឹងកូរ៉េខាងជើង ហើយនឹងប្រគល់តួនាទីនេះទៅឱ្យកូរ៉េខាងត្បូងកាន់កាប់ជំនួសវិញក្នុងនាមជាអ្នកនាំមុខគេ។ នៅក្នុងព្រឹត្តិការណ៍ដាច់ដោយឡែកមួយទៀត ក្រៅពីកិច្ចខិតខំប្រឹងប្រែងទទួលបាននាវាមុជទឹកនុយក្លេអ៊ែរពីអាមេរិក កូរ៉េខាងត្បូងក៏ជាប្រទេសផលិតនាវាមុជទឹកដើរដោយប្រេងម៉ាស៊ុតផងដែរ។
ប្រធានខុទ្ទកាល័យប្រធានាធិបតីកូរ៉េខាងត្បូង លោកកាងហ៊ុនស៊ីក (Kang Hoon-sik) កំពុងធ្វើដំណើរទៅប្រទេសកាណាដាដើម្បីចុះកុងត្រាផលិតនាវាមុជទឹក (ឱ្យកាណាដា)។ កូរ៉េខាងត្បូងកំពុងប្រកួតប្រជែងជាមួយក្រុមហ៊ុនអាល្លឺម៉ង់ដើម្បីដេញថ្លៃគម្រោងសាងសង់នាវាមុជទឹកប្រើប្រេងម៉ាស៊ុតចំនួន១២គ្រឿងដែលមានតម្លៃសរុបលើសពី១២ពាន់លានដុល្លារអាមេរិក។
លោកកាងទទួលស្គាល់ថាការប្រកួតប្រជែងគ្នាជាមួយប្រទេសខ្លាំងដូចជាអាល្លឺម៉ង់ពិតជាមិនងាយស្រួលឡើយ។ លោកនឹងជម្រាបជូនភាគីកាណាដាថានាវាមុជទឹករបស់កូរ៉េខាងត្បូងមានគុណភាពល្អ និងថារដ្ឋាភិបាលរបស់លោកប្ដេជ្ញាពង្រឹងកិច្ចសហប្រតិបត្តិការខាងឧស្សាហកម្ម និងសន្តិសុខជាមួយកាណាដា។ លោកថ្លែងបន្តទៀតថានេះជាគម្រោងដេញថ្លៃដ៏ធំបំផុតដែលកូរ៉េខាងត្បូងពុំធ្លាប់ជួបប្រទះពីមុនមក។ គម្រោងនេះនឹងផ្ដល់ផលប្រយោជន៍សេដ្ឋកិច្ចជាង៤០ទ្រីលានវុន (ជាង២៧ពាន់លានដុល្លារ) ហើយនឹងបង្កើតការងារ២ម៉ឺនមុខតំណែង៕ ប្រភព៖ រ៉យទ័រ, ក្យូដូ និងប្រភពដទៃទៀត
ចែករំលែកព័តមាននេះ