លោក ត្រាំ អះអាងពីអាវុធសម្ងាត់ដ៏មានប្រសិទ្ធភាព ជួយដល់ប្រតិបត្តិការចា.ប់ខ្លួនលោក ម៉ាឌូរ៉ូ
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្មីៗនេះ បានអះអាងពីអាវុធសម្ងាត់ដែលលោកហៅថា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្មីៗនេះ បានអះអាងពីអាវុធសម្ងាត់ដែលលោកហៅថា «Discombobulator» ដែលកងកម្លាំង Delta Force នៃកងទ័ពអាមេរិកប្រើប្រាស់នៅក្នុងប្រតិបត្តិការ «Absolute Resolve» ឆ្មក់ចាប់ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) កាលពីថ្ងៃទី៣ ខែមករា ឆ្នាំ២០២៦។
ទូរទស្សន៍ CNN បានរាយការណ៍ នៅថ្ងៃទី២៥ ខែមករា ឆ្នាំ២០២៦ ថា លោក ត្រាំ បានអះអាងថា យោធាអាមេរិកបានប្រើអាវុធសម្ងាត់ ដែលលោកបានហៅថា ឧបករណ៍រំខាន Discombobulator ក្នុងប្រតិបត្តិការដ៏ភ្ញាក់នៅទីក្រុងការ៉ាកាស (Caracas)។ នៅក្នុងបទសម្ភាសន៍ជាមួយកាសែត New York Post ថ្ងៃទី២៤ ខែមករា លោក ត្រាំ បាននិយាយថា «ឧបករណ៍ Discombobulator ខ្ញុំមិនត្រូវបានអនុញ្ញាតឱ្យនិយាយលម្អិតពីវានោះទេ»។ ប៉ុន្តែលោកបញ្ជាក់ថា អាវុធសម្ងាត់ប្រភេទនេះ បានធ្វើឱ្យឧបករណ៍ និងប្រព័ន្ធយោធាសត្រូវគាំងដំណើរការ។
យោងតាមបទសម្ភាសន៍របស់លោកជាមួយកាសែត New York Post និងដូចដែលបានរាយការណ៍ដោយកាសែត South China Morning Post របស់ហុងកុង បានឱ្យដឹងថា ដោយសារតែអាមេរិកបានប្រើ Discombobulator ដែលគេជឿថាជាឧបករណ៍សង្គ្រាមអេឡិចត្រូនិកដ៏ទំនើប ទើបបានជាប្រព័ន្ធមីស៊ីលរបស់វ៉េណេស៊ុយអេឡា មិនដំណើរទាំងស្រុង។ លោក ត្រាំ ថ្លែងថា «ពួកគេ (វ៉េណេស៊ុយអេឡា) មានមីស៊ីលពីសហព័ន្ធរុស្ស៊ី និងចិន ប៉ុន្តែមិនបានបាញ់អ្វីទាំងអស់។ យើងបានឆ្មក់ពួកគេ ពួកគេបានចុចប៊ូតុង ប៉ុន្តែគ្មានអ្វីដំណើរការនោះទេ។ បើទោះបីជាពួកគេបានត្រៀមខ្លួនជាស្រេច ដើម្បីតទល់ជាមួយយើងក៏ដោយ»។
កន្លងមក South China Morning Post បានរាយការណ៍ថា ក្នុងរយៈពេលប៉ុន្មានម៉ោង បន្ទាប់ពីការវាយឆ្មក់របស់អាមេរិកលើវ៉េណេស៊ុយអេឡា លោក ត្រាំ បានលើកឡើងពីសមត្ថភាពបច្ចេកទេសពិសេសនេះ ក្នុងសន្និសីទសារព័ត៌មានក្រោយប្រតិបត្តិការនោះ។ លោកនិយាយថា «អគ្គិសនីភាគច្រើនក្នុងទីក្រុងការ៉ាកាសត្រូវបានកាត់ផ្តាច់ ដោយសារបច្ចេកទេសពិសេសដែលយើងមាន។ វាងងឹតសូន្យឈឹង និងគ្រោះថ្នាក់ខ្លាំងណាស់»។
ទោះយ៉ាងណា បន្ទាប់ពីការបង្ហើបចុងក្រោយរបស់លោក ត្រាំ អំពីអាវុធសម្ងាត់នេះ សេតវិមានមិនទាន់បានឆ្លើយតបនឹងសំណើសុំព័ត៌មានបន្ថែមនៅឡើយទេ ប៉ុន្តែមន្ត្រីជាន់ខ្ពស់អាមេរិកម្នាក់បានប្រាប់ CNN ថា ការលើកឡើងរបស់លោក ត្រាំ អាចនឹងបញ្ចូលសមត្ថភាពផ្សេងៗគ្នាទៅក្នុងអាវុធតែមួយប្រភេទ ដែលគ្មានពិតប្រាកដ។
នៅក្នុងប្រតិបត្តិការ «Absolute Resolve» កងកម្លាំងអាមេរិកបានប្រើប្រាស់ឧបករណ៍អ៊ីនធឺណិតដើម្បីបិទប្រព័ន្ធប្រកាសអាសន្ន និងប្រព័ន្ធការពារផ្សេងទៀតរបស់វ៉េណេស៊ុយអេឡា ព្រមទាំងបានប្រើប្រព័ន្ធសូរសំឡេងដើម្បីរំខាន ធ្វើឱ្យកងកម្លាំងរបស់លោក ម៉ាឌូរ៉ូ បាត់បង់ស្មារតី គ្មានសមត្ថភាពតដៃវិញ។
ប៉ុន្មានថ្ងៃបន្ទាប់ពីការចាប់ខ្លួនលោក ម៉ាឌូរ៉ូ លេខាធិការសារព័ត៌មានសេតវិមាន លោកស្រី Karoline Leavitt បានបង្ហោះរបាយការណ៍ចោទប្រកាន់របស់មន្ត្រីសន្តិសុខវេណេស៊ុយអេឡាម្នាក់ ដោយអះអាងថា អាមេរិកបានបាញ់បង្ហោះឧបករណ៍ម្យ៉ាងនៅក្នុងប្រតិបត្តិការចាប់លោក ម៉ាឌូរ៉ូ វាប្រៀបដូចជារលកសំឡេងដ៏មានឥទ្ធិពលខ្លាំង ធ្វើឱ្យបណ្តាកងសន្តិសុខវ៉េណេស៊ុយអេឡាមានអារម្មណ៍ថា ក្បាលពួកគេចង់ផ្ទុះបែក ចាប់ផ្តើមហូរឈាមតាមច្រមុះ អ្នកខ្លះក្អួតមានឈាម ហើយដួលលើដីមិនអាចកម្រើកបានតែម្តង។
ដោយឡែក យោងតាមការវិភាគរបស់ CNN អំពីប្រតិបត្តិការថ្ងៃទី៣ ខែមករា ឆ្នាំ២០២៦ បេសកកម្មរបស់អាមេរិកបានចាប់ផ្តើមជាមួយការវាយប្រហារជាបន្តបន្ទាប់លើគោលដៅជាច្រើននៅទូទាំងប្រទេសវ៉េណេស៊ុយអេឡា បំផ្លាញដល់ប្រព័ន្ធរ៉ាដា ទំនាក់ទំនង ព្រមទាំងហេដ្ឋារចនាសម្ព័ន្ធប្រព័ន្ធការពារដែនអាកាស ដើម្បីបើកផ្លូវសម្រាប់កងឧទ្ធម្ភាគចក្រអាមេរិក។
យោងតាមឧត្តមសេនីយ៍កងទ័ពអាកាសអាមេរិក លោក Dan Caine បានឱ្យដឹងថា យន្តហោះជាង ១៥០ គ្រឿង រួមទាំងយន្តហោះទម្លាក់គ្រាប់បែក យន្តហោះចម្បាំង ក៏ដូចជាយន្តហោះស៊ើបការណ៍សម្ងាត់ និងឃ្លាំមើល ត្រូវបានបាញ់បង្ហោះចេញពីមូលដ្ឋានចំនួន ២០ ទាំងផ្លូវគោក និងដែនសមុទ្រ៕
ចែករំលែកព័តមាននេះ