ទីក្រុងព្យុងយ៉ាង៖ ប្រមុខដឹកនាំកូរ៉េខាងជើង លោកគីមជុងអ៊ុន បានអបអរសាទរចំពោះអគ្គលេខាធិការបក្សកុម្មុយនិស្តវៀតណាម លោកតូឡាម ដែលទើបតែត្រូវមហាសន្និបាតបក្សបោះឆ្នោតឱ្យកាន់តំណែងនេះរយៈពេល៥ឆ្នាំជាបន្តទៀត។ លោកគីមមានទំនុកចិត្តថាកិច្ចសហប្រតិបត្តិការទ្វេភាគីរវាងវៀតណាម និងកូរ៉េខាងជើងនឹងបន្តរីកចម្រើនលើគ្រប់វិស័យ។ ខាងលើនេះជាការផ្សាយរបស់សារព័ត៌មានរដ្ឋកូរ៉េខាងជើង។
លោកគីមបានផ្ញើលិខិតអបអរសាទរជូនលោកតូឡាមកាលពីថ្ងៃសុក្រសប្ដាហ៍មុន។ ពោលគឺចំថ្ងៃដែលលោកតូឡាមវ័យ៦៨ឆ្នាំជាប់ឆ្នោតជាអគ្គលេខាបក្សកុម្មុយនិស្តវៀតណាម។ នេះបើយោងតាមការផ្សាយរបស់ទូរទស្សន៍កូរ៉េខាងជើង ខេស៊ីអឹនអេ (KCNA)។ នៅក្នុងលិខិតនោះ លោកគីមជម្រាបជូនលោកតូឡាមថានេះជាការជឿទុកចិត្តដ៏ខ្ពស់បំផុតចំពោះលោក។
លោកគីមសរសេររៀបរាប់ថាការជាប់ឆ្នោតជាថ្មីរបស់លោកតូឡាមបញ្ជាក់ថាសមាជិកបក្ស និងប្រជាជនវៀតណាមពិតជាមានការជឿទុកចិត្តខ្ពស់បំផុតចំពោះលោកតូឡាម។ នៅក្នុងលិខិតនោះ លោកគីមក៏បានរំលឹកទៅដល់កិច្ចព្រមព្រៀងរវាងលោក និងលោកតូឡាមកាលពីឆ្នាំមុន។ លោកមានជំនឿថាទំនាក់ទំនងជាមិត្តភាព និងប្រកបដោយកិច្ចសហប្រតិបត្តិការជាមួយគ្នារវាងបក្ស និងរដ្ឋនៃប្រទេសទាំង២នឹងកាន់តែរីកចម្រើនប្រកបដោយចីរភាព។
សូមរំលឹកលោកតូឡាមបានបំពេញទស្សនកិច្ចនៅកូរ៉េខាងជើងកាលពីខែតុលា ឆ្នាំ២០២៥ដើម្បីចូលរួមពិធីរំលឹកខួប៨០ឆ្នាំនៃទិវាជ័យជម្នះរបស់បក្សពលករកូរ៉េខាងជើង។ លោកតូឡាមជាមេដឹកនាំវៀតណាមទីមួយចាប់តាំងពីឆ្នាំ២០០៧ដែលបានបំពេញទស្សនកិច្ចនៅកូរ៉េខាងជើង។ លោកគីម និងលោកតូឡាមបានពិភាក្សាគ្នាកម្រិតកំពូលនៅក្នុងពេលនោះ ហើយបានឯកភាពគ្នាថានឹងពង្រីកទំនាក់ទំនងដល់កម្រិតខ្ពស់បំផុត៕ ប្រភព៖ យុនហាប់ និងប្រភពដទៃទៀត
ចែករំលែកព័តមាននេះ