សុខភាព៖ យោងតាមការផ្សាយរបស់សារព័ត៌មានបរទេស កាហ្វេគឺជាភេសជ្ជៈដ៏ពេញនិយមបំផុត ដែលផ្ដល់អត្ថប្រយោជន៍មហាសាលដល់ខួរក្បាល បេះដូង និងប្រព័ន្ធដុតរំលាយអាហារ។ ប៉ុន្តែ មនុស្សភាគច្រើនកំពុងផឹកកាហ្វេតាមរបៀបខុសឆ្គង ដែលមិនត្រឹមតែធ្វើឱ្យបាត់បង់គុណសម្បត្តិរបស់វាប៉ុណ្ណោះទេ ប៉ុន្តែថែមទាំងអាចបង្កគ្រោះថ្នាក់ដល់រាងកាយទៀតផង។ ការយល់ដឹងពីកំហុសឆ្គងទូទៅទាំង ៨ យ៉ាង នឹងជួយឱ្យលោកអ្នកអាចក្រេបរសជាតិកាហ្វេផង និងទទួលបានសុខភាពមាំមួនផងក្នុងពេលតែមួយ។

កំហុសឆ្គងដំបូងដែលមនុស្សភាគច្រើនតែងធ្វើ គឺការបន្ថែមជាតិស្ករ ឬទឹកដោះគោខាប់ច្រើនហួសប្រមាណ។ ការធ្វើបែបនេះនឹងបង្វែរកាហ្វេពីភេសជ្ជៈសុខភាព ទៅជាភេសជ្ជៈដែលបង្កើនជាតិខ្លាញ់ និងជាតិស្ករក្នុងឈាមវិញ។ កំហុសទីពីរគឺ ការផឹកកាហ្វេទាំងពោះទទេនៅពេលព្រឹកព្រលឹម ដែលវាអាចជ​ំរុញឱ្យក្រពះបញ្ចេញអាស៊ីតច្រើនពេក បង្កជាជំងឺក្រពះ និងធ្វើឱ្យអ័រម៉ូនស្ត្រេស​កើនឡើងខ្ពស់ខុសធម្មតា។

ក្រៅពីនេះ ការផឹកកាហ្វេយប់ជ្រៅ ក៏ជារឿងដែលគួរជៀសវាងដែរ ព្រោះវាទៅរារាំងជាតិអាដេណូស៊ីន ដែលជាសារធាតុជួយឱ្យខួរក្បាលងងុយគេង ធ្វើឱ្យគុណភាពនៃការសម្រាកចុះខ្សោយ។ ចំណុចសំខាន់មួយទៀតគឺ ការផឹកកាហ្វេក្តៅខ្លាំងពេក ដែលអាចបង្កហានិភ័យនៃជំងឺមហារីកបំពង់អាហារ។ លោកអ្នកក៏មិនគួរ រំលងការផឹកទឹកស្អាត ក្រោយពេលញ៉ាំកាហ្វេដែរ ព្រោះកាហ្វេមានជាតិបញ្ចុះទឹកនោម ដែលអាចធ្វើឱ្យរាងកាយខ្វះជាតិទឹកបានយ៉ាងងាយ។

កំហុសដែលមិនគួរមើលរំលងផ្សេងទៀតរួមមាន ការប្រើប្រាស់កាហ្វេដែលមានគុណភាពទាប (មានលាយម្សៅដំឡូង ឬសណ្តែក) ការផឹកក្នុងបរិមាណច្រើនលើសលប់ (លើសពី ៤ កែវក្នុងមួយថ្ងៃ) និងការប្រើកែវជ័រសម្រាប់ដាក់កាហ្វេក្តៅដែលនាំឱ្យសារធាតុគីមីរលាយចូលក្នុងភេសជ្ជៈ។

ការកែសម្រួលទម្លាប់ទាំងនេះ នឹងជួយឱ្យរាងកាយបឺតស្រូបយកសារធាតុប្រឆាំងអុកស៊ីតកម្មពីកាហ្វេបានយ៉ាងពេញលេញ និងជួយឱ្យអ្នកមានថាមពលស្រស់ស្រាយពេញមួយថ្ងៃដោយគ្មានផលរំខាន​៕