រាជធានីភ្នំពេញ ៖ លោកតា អាយុ៩០ឆ្នាំម្នាក់ត្រូវបានកូនស្រីបង្កើតដឹកតាមម៉ូតូកង់បីយកទៅទុកចោលនៅក្នុងចេតិយមួយកន្លែងក្នុងវត្តអង្គតាម៉ិញ បង្កអោយភ្ញាក់ផ្អើលកាលពីវេលាម៉ោង ៦ យប់ថ្ងៃទី ២៣ ខែមករាឆ្នាំ២០២៦ នៅចំណុចចេតិយមួយកន្លែង…
រាជធានីភ្នំពេញ ៖ លោកតា អាយុ៩០ឆ្នាំម្នាក់ត្រូវបានកូនស្រីបង្កើតដឹកតាមម៉ូតូកង់បីយកទៅទុកចោលនៅក្នុងចេតិយមួយកន្លែងក្នុងវត្តអង្គតាម៉ិញ បង្កអោយភ្ញាក់ផ្អើលកាលពីវេលាម៉ោង ៦ យប់ថ្ងៃទី ២៣ ខែមករាឆ្នាំ២០២៦ នៅចំណុចចេតិយមួយកន្លែង ក្នុងវត្តអង្គតាមិញ ស្ថិតក្នុងភូមិគោកចំបក សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
លោកតាដែលត្រូវកូនស្រីបង្កើតដឹកយកទៅទុកចោលក្នុងចេតិយនោះឈ្មោះ ខៀវ ម៉ារឿន អាយុ៩០ ឆ្នាំ មានកូនប្រុសស្រីចំនួន៥នាក់ ។ សព្វថ្ងៃរូលោកតារស់នៅជាមួយកូនស្រីទី៣ ឈ្មោះ ខៀវ ស៊ីនិត អាយុជាង៥០ឆ្នាំ ស្នាក់នៅភូមិត្រពាំងល្វា សង្កាត់ការកាបទី១ ខណ្ឌពោធិ៍សែនជ័យ រាជធានីភ្នំពេញ។
បើតាមស្ត្រីឈ្មោះ ខៀវ សាវី អាយុ៥៤ឆ្នាំ មុខរបរនៅផ្ទះ មានទីលំនៅស្រុកគង ពីសី ខេត្តកំពុងស្ពឺ ត្រូវជាកូនទី២របស់លោកតា បានអោយដឹងថា នៅវេលាម៉ោង១០ព្រឹកថ្ងៃទី២៣ ខែមករាឆ្នាំ២០២៦ ប្អូនស្រីទី៣ ឈ្មោះ ខៀវ ស៊ីនិត បានដឹកឪពុកតាមម៉ូតូកង់បីទៅទម្លាក់ចោលនៅក្នុងចេតិយដាក់ធាតុរបស់ម្តាយបង្កើតនៅក្នុងវត្តអង្អតាម៉ិញ រួចហើយបានថតរូបឪពុកផ្ញើរតាមឆាតហ្វេសប៊ុកទៅអោយបងប្អូនប្រុសស្រីចំនួន៤នាក់មើល រួចបានប្រាប់ថា «រូបគេបានដឹកឪពុកយកទៅទម្លាក់ចោលក្នុងចេតិយរបស់ម្តាយ បើបងប្អូនណាទំនេរចាំជួយយកគាត់ទៅផ្ទះផង»។
ស្ត្រីរូបនោះបានអោយដឹងបន្តថា រហូតដល់ម៉ោងកើតហេតុខាងលើបង្កអោយមានការភ្ញាក់ផ្អើលដល់ប្រជាពលរដ្ឋនិងព្រះសង្ឃនិងអាជ្ញាធរ និងសមត្ថកិច្ច ។ ខណៈពេលនោះរូបគាត់ក៏បានទៅដល់ដែរហើយពុំឃើញមានកូនប្រុសចំនួន៤នាក់ទៀតមកដល់កន្លែកើតហេតុនោះទេ ហើយរូបគាត់បានរៀបរាប់ថា ឪពុករបស់គាត់សព្វថ្ងៃរស់នៅជាមួយប្អូនស្រីបង្កើតទី៣ ឈ្មោះ ខៀវ ស៊ីនិត នៅក្នុងភូមិត្រពាំងល្វា សង្កាត់ការកាបទី១ ខណ្ឌពោធិ៍សែនជ័យ រាជធានីភ្នំពេញ ។ បន្ទាប់មកគាត់បាននិយាយថាសព្វថ្ងៃប្តីរបស់គាត់កំពុងឈឺជំងឺមហារីកនៅផ្ទះ អញ្ចឹងហើយរូបគាត់មិនអាចយកឪពុកម្នាក់ទៀតទៅចិញ្ចឹមនៅផ្ទះរបស់គាត់នោះទេ។
តាមប្រភពព័ត៌មានបានអោយដឹងថា រហូតដល់ម៉ោង១១យប់ថ្ងៃទី២៣ ខែមករា ឆ្នាំ២០២៦ កូនស្រីទី៣ឈ្មោះ ខៀវ ស៊ីនិត បានយកម៉ូតូកង់បីដឹកឪពុកយកទៅផ្ទះវិញហើយ ៕
ចែករំលែកព័តមាននេះ