គណៈដឹកនាំនៃក្រុមប្រឹក្សាគណៈគ្រូពេទ្យជាតិ បានរំលឹកក្រុមគ្រូពេទ្យឲ្យបន្តលើកកំពស់ក្រមសីលធម៌វិជ្ជាជីវៈ ពីព្រោះនៅពេលបច្ចុប្បន្ននេះ តែពលរដ្ឋមិនពេញចិត្ត គឺច្រើនលើកឡើងនិងត្អូញត្អែរនៅលើបណ្តាញសង្គមហើយ ។ លោក ឡឹម តារា ប្រធានក្រុមប្រឹក្សាគណៈគ្រូពេទ្យជាតិបានថ្លែងនៅមនី្ទរពេទ្យព្រះអង្គឌួង…
គណៈដឹកនាំនៃក្រុមប្រឹក្សាគណៈគ្រូពេទ្យជាតិ បានរំលឹកក្រុមគ្រូពេទ្យឲ្យបន្តលើកកំពស់ក្រមសីលធម៌វិជ្ជាជីវៈ ពីព្រោះនៅពេលបច្ចុប្បន្ននេះ តែពលរដ្ឋមិនពេញចិត្ត គឺច្រើនលើកឡើងនិងត្អូញត្អែរនៅលើបណ្តាញសង្គមហើយ ។
លោក ឡឹម តារា ប្រធានក្រុមប្រឹក្សាគណៈគ្រូពេទ្យជាតិបានថ្លែងនៅមនី្ទរពេទ្យព្រះអង្គឌួង កាលពីថ្ងៃទី២២ ខែមករា ឆ្នាំ២០២៦ ថា រហូតមកដល់បច្ចុប្បន្ន កម្ពុជាមានគ្រូពេទ្យជាអ្នកឯកទេស ហើយមានបទពិសោធន៍ជំនាញ ភាពប៉ិនប្រសប់ច្រើន ក៏ប៉ុន្តែការបម្រើសេវាសុខាភិបាល ជូនប្រជាពលរដ្ឋនៅក្នុងមូលដ្ឋានសុខាភិបាលសាធារណៈ ឬនៅឯកជននោះ ពេលខ្លះគឺនៅមានការខ្វះខាត ហើយការខ្វះខាត និងខ្វះចន្លោះនោះ គឺគេបានឃើញទាំងអស់គ្នា វាស្តែងចេញតាមរយៈបាតុភាពវិជ្ជាជីវៈ ។
លោកបានបន្តថា បច្ចុប្បន្ននេះ ពេលមានបាតុភាព គឺវាឈានទៅដល់ការមិនពេញចិត្ត ដូច្នេះសាធារណៈជន និងក្រុមគ្រួសារអ្នកជំងឺ តែងតែត្អូញត្អែរតាមបណ្តាញសង្គមផ្សេងៗ ។
លោកបានបន្តថា តាមរយៈនៃការសិក្សាស្រាវជ្រាវអំពីមូលហេតុរបស់បាតុភាពមួយចំនួនធំ តែងតែមាន និងបណ្តាលមកពីការខ្វះខាតលើការគិត ការពិចារណា ដែលការសម្រេចចិត្តអ្វីផ្សេងៗ ដោយមិនឈរលើគោលការណ៍នៃក្រមសីលធម៌នោះ ។
ដូច្នេះហើយ បានជាគណៈគ្រូពេទ្យ គណៈវិជ្ជាជីវៈទាំងអស់ ខិតខំផ្សព្វផ្សាយ និងរំលឹក ដើម្បីឲ្យបងប្អូនគ្រូពេទ្យទាំងអស់ ដែលជាអ្នកប្រកបវិជ្ជាជីវៈសុខាភិបាល គឺខិតខំរំលឹកឡើងវិញនូវគោលការណ៍នៃក្រមសីលធម៌នេះ និងប្រើប្រាស់ជាត្រីវិស័យ នៃការសម្រេចចិត្ត ក្នុងការបម្រើសេវាសុខាភិបាល ចាប់តាំងពីការធ្វើរោគវិនិច្ឆ័យ រហូតដល់ការសម្រេចចិត្តក្នុងការព្យាបាល ដោយឈរលើគោលការណ៍នៃក្រមសីលធម៌ ។
ចែករំលែកព័តមាននេះ