សហរដ្ឋអាមេរិក ៖ យន្តហោះ Air Force One ដែល​ដឹក​ប្រធានាធិបតី​សហរដ្ឋអាមេរិក លោក ដូ​ណា​ល់ ត្រាំ (Donald Trump) កំពុង​ធ្វើ​ដំណើរ​ទៅ​កាន់​ទីក្រុង Davos ប្រទេស​ស្វី​ស បាន​បត់​ត្រឡប់​ក្រោយ​ដោយ​មិន​នឹក​ស្មាន​ដល់ ដោយសារ​បញ្ហា​ប្រព័ន្ធ​អគ្គិសនី​។

ប្រភព​ពី Reuters និង CNN បានឱ្យ​ដឹង​ថា នៅ​ម៉ោង ១១:០៧ នាទី​យប់ ថ្ងៃ​ទី ២០ ខែមករា ឆ្នាំ​២០២៦ (​ម៉ោង​នៅ​សហរដ្ឋអាមេរិក​) យន្តហោះ Air Force One ដែល​ដឹក​ប្រធានាធិបតី​អា​មេ​រិ​ក លោក ដូ​ណា​ល់ ត្រាំ ត្រូវ​ត្រឡប់​ទៅ​ចុះ​ចត​នៅ​ឯ​មូលដ្ឋាន​ទ័ពអាកាស Joint Base Andrews ជិត​ទីក្រុង​វ៉ា​ស៊ី​ន​តោន ដោយ​មិន​នឹក​ស្មាន​ដល់ ដើម្បី​ផ្លាស់​ប្តូរ​យន្តហោះ​ផ្សេង បន្ទាប់​ពី​​បុគ្គលិក​លើ​យន្តហោះ​បាន​រក​ឃើញ​បញ្ហា ដែល​ក្រោយមក​អ្នកនាំពាក្យ​សេត​វិមាន លោកស្រី Karoline Leavitt បាន​ប្រាប់​អ្នក​ព័ត៌មាន​នៅ​ក្នុង​សេចក្តីថ្លែងការណ៍​មួយ​ថា «​បញ្ហា​ប្រព័ន្ធ​អគ្គិសនី​តិចតួច​» មិនយូរ​ប៉ុន្មាន​បន្ទាប់​ពី​ហោះ​ឡើង​។

យ៉ាងណាមិញ ទោះបីជា​ជួប​ប្រទះ​បញ្ហា​នៅ​ពេល​ចេញដំណើរ​ក៏​ដោយ ក៏​លោក ត្រាំ នៅ​តែ​បន្ត​ធ្វើ​ដំណើរ​ទៅ​កាន់​ទីក្រុង Davos ប្រទេស​ស្វី​ស តាម​ការ​គ្រោងទុក ដើម្បី​ចូលរួម វេទិកា​សេដ្ឋកិច្ច​ពិភពលោក (WEF)​។

លោក ត្រាំ ត្រូវ​បាន​ប្តូរ​ទៅ​ជិះ​យន្តហោះ​បម្រុង​ប្រភេទ Boeing 757 តូច​ជាង​យន្តហោះ Air Force One ដែល​ជា​ប្រភេទ Boeing 747 ដើម្បី​បន្តដំណើរ​ទៅ​កាន់​ទីក្រុង Davos ដោយ​បាន​ចេញដំណើរ​ភ្លាម​ៗ បន្ទាប់​ពី​ម៉ោង ១២ រំលង​អា​ធ្រា​ត្រ (​ម៉ោង​នៅ​សហរដ្ឋអាមេរិក​)​។

ប្រភព​ពី Reuters បានឱ្យ​ដឹង​ថា បញ្ហា​សុវត្ថិភាព​ផ្លូវអាកាស​ពាក់ព័ន្ធ​នឹង​ប្រធានាធិបតី ឬ​អនុ​ប្រធានាធិបតី​សហរដ្ឋអាមេរិក​គឺ​កម្រ​កើត​មាន​ណាស់ ប៉ុន្តែ​វា​ក៏​មិនមែន​ជា​រឿង​ដែល​មិន​ធ្លាប់​មាន​ពី​មុន​មក​នោះ​ទេ​៕