ខេត្តសៀមរាប ៖ ក្រោមការដឹកនាំរបស់រាជរដ្ឋាភិបាលកម្ពុជា បានផ្ដល់ឱកាសឱ្យយុវជនបានកសាងសមត្ថភាពពេញលេញ និងមានការអភិវឌ្ឍលើគ្រប់វិស័យ និងឱ្យប្រជាពលរដ្ឋប្រកបរបរសម្រាប់ទ្រទ្រង់ជីវភាពប្រចាំថ្ងៃ ។ ក្នុងន័យនេះសូមឱ្យយុវជនយើងទាំងអស់ ត្រូវបន្ដការខិតខំសិក្សារៀនសូត្រ ពង្រឹងនិងកសាងសមត្ថភាពឱ្យបានខ្លាំងពូកែ…
ខេត្តសៀមរាប ៖ ក្រោមការដឹកនាំរបស់រាជរដ្ឋាភិបាលកម្ពុជា បានផ្ដល់ឱកាសឱ្យយុវជនបានកសាងសមត្ថភាពពេញលេញ និងមានការអភិវឌ្ឍលើគ្រប់វិស័យ និងឱ្យប្រជាពលរដ្ឋប្រកបរបរសម្រាប់ទ្រទ្រង់ជីវភាពប្រចាំថ្ងៃ ។ ក្នុងន័យនេះសូមឱ្យយុវជនយើងទាំងអស់ ត្រូវបន្ដការខិតខំសិក្សារៀនសូត្រ ពង្រឹងនិងកសាងសមត្ថភាពឱ្យបានខ្លាំងពូកែ ដើម្បីចូលរួមក្នុងការកសាងប្រទេសជាតិឱ្យកាន់តែមានការរីកចម្រើនលើគ្រប់វិស័យ ។
ក្នុងកម្មវិធីយុវវ័យជិះកង់ដើម្បីសុវត្ថិភាពចំណាកស្រុក ក្រោមប្រធានបទ «មានជំនាញមានការងារធ្វើ យល់ដឹងសុវត្ថិភាពចំណាកស្រុក មានចំណូល ជីវភាពកាន់តែប្រសើរ» ត្រូវបានរៀបចំឡើងដោយរដ្ឋបាលស្រុកអង្គរធំ សហការជាមួយអង្គការវីតាស្វ៊ីស និងអង្គការសម្រេចសុបិនកុមារកម្ពុជា កាលពីរសៀលថ្ងៃទី១៩ ខែមករា ២០២៦កន្លងទៅ ។ លោក លី សារី អភិបាលរងខេត្ត ថ្លែងថា កម្មវិធីនេះពិតជាមានសារៈសំខាន់ណាស់សម្រាប់ប្រជាពលរដ្ឋ ពិសេសយុវជនដែលជាឱកាសផ្សព្វផ្សាយអំពីជំនាញ និងឱកាសការងារ ការចែករំលែកអំពីការធ្វើចំណាកស្រុកដោយស្របច្បាប់ ដែលអាចទទួលបានឱកាសការងារល្អ ទទួលបានការអប់រំដ៏ប្រសើរ មានឱកាសបានរៀនជំនាញ និងទទួលបានបទពិសោធថ្មីៗ ។
លោក លី សារី បានបន្តថា ដោយសារការឈ្លានពានរបស់ថៃមកលើបូរណភាពទឹកដីកម្ពុជា បានធ្វើឱ្យមានការខូចខាតហេដ្ឋារចនាសម្ព័ន្ធ និងការបាត់បង់អាយុជីវិតពលរដ្ឋស្លូតត្រង់ និងធ្វើឱ្យប៉ះពាល់ដល់ការសិក្សារបស់កុមារតាមព្រំដែន ។ ដោយមានការយកចិត្ដទុកដាក់ពីប្រមុខថ្នាក់ដឹកនាំ និងរដ្ឋបាលខេត្ត បានទទួលជនភៀសសឹកមកស្នាក់នៅតាមមណ្ឌលសុវត្ថិភាពក្នុងខេត្តនិងបានជួយទំនុកបម្រុងជាសម្ភារៈ គ្រឿងឧបភោគបរិភោគ ដែលទទួលបានពីសប្បុរសជន ទាំងក្នុងនិងក្រៅប្រទេស ផ្ដល់ជូនដល់ពួកគាត់ ។
ជាពិសេសកុមារតូចៗ ត្រូវបានរៀបចំឱ្យមានការបង្រៀននៅតាមមណ្ឌលភៀសសឹក ដែលនេះបានបង្ហាញពីការគិតគូរខ្ពស់លើការអប់រំ ។លោកស្រី រាត់ មេណី ប្រធានគម្រោងទំនាក់ទំនងយុវវ័យបានឱ្យដឹងថា កម្មវិធីនេះរៀបចំឡើងក្នុងគោលបំណងលើកកម្ពស់ការ យល់ដឹងក្នុងចំណោមឪពុកម្ដាយយុវជន អំពីការធ្វើចំណាកស្រុកប្រកបដោយសុវត្ថិភាព និងការអប់រំបណ្តុះបណ្តាលវិជ្ជាជីវៈ ដោយផ្ដោតសំខាន់លើការអប់រំ ការអភិវឌ្ឍជំនាញ ផ្ដល់សិទ្ធិអំណាចឱ្យយុវវ័យបង្កើតនិងបង្ហាញមាតិកាក្នុងការលើកកម្ពស់ការធ្វើចំណាកស្រុកដោយសុវត្ថិភាព ។
លោក ពៅ ប៊ុនធឿន អភិបាលស្រុកអង្គរធំ បានថ្លែងអំណរគុណអង្គការដៃគូ ដែលបានយកចិត្ដទុកដាក់លើការសិក្សារបស់សិស្សានុសិស្ស ចុះចែករំលែកចំណេះដឹងល្អៗ អំពីជំនាញវិជ្ជាជីវៈផ្សេងៗ ដើម្បីឱ្យសិស្សានុសិស្សមានមូលដ្ឋានគ្រឹះក្នុងការចាប់យកជំនាញទៅតាមចំណង់ចំណូលចិត្ដរបស់ពួកគេ ៕
ចែករំលែកព័តមាននេះ