ខេត្តបាត់ថដំបង ៖ តាមរយៈបណ្ដាញសង្គមផ្ទាល់ខ្លួន លោក សុខ លូ អភិបាលខេត្តបាត់ដំបង បានថ្លែងសារប្រចាំឆ្នាំទៅកាន់មន្ត្រីនានាថា «រដ្ឋបាលខេត្តនឹងប្ដេជ្ញាបង្ក្រាប និងលុបបំបាត់ឧក្រិ.ដ្ឋកម្មឆបោកតាមប្រព័ន្ធបច្ចេកវិទ្យា»…
ខេត្តបាត់ថដំបង ៖ តាមរយៈបណ្ដាញសង្គមផ្ទាល់ខ្លួន លោក សុខ លូ អភិបាលខេត្តបាត់ដំបង បានថ្លែងសារប្រចាំឆ្នាំទៅកាន់មន្ត្រីនានាថា «រដ្ឋបាលខេត្តនឹងប្ដេជ្ញាបង្ក្រាប និងលុបបំបាត់ឧក្រិ.ដ្ឋកម្មឆបោកតាមប្រព័ន្ធបច្ចេកវិទ្យា» ដែលលោកចាត់ទុកថា «ជាការបង្កគ្រោះថ្នាក់ធ្ងន់ធ្ងរដល់សង្គមជាតិ ។ រួមទាំងបង្ក្រាបរាល់ល្បែងស៊ីសងគ្រប់ប្រភេទផង ដើម្បីឈានដល់ការពង្រឹងនូវគោលនយោបាយភូមិ ឃុំមានសុវត្ថិភាព» ។
អភិបាលខេត្តបាត់ដំបង លោក សុខ លូ បានថ្លែងបែបនេះ នៅក្នុង«អង្គសន្និបាតបូកសរុបលទ្ធិផលការងារប្រចាំឆ្នាំ២០២៥ និងលើកទិសដៅការងារ ឆ្នាំ២០២៦» របស់រដ្ឋបាលខេត្ត កាលពីព្រឹកថ្ងៃទី២០ មករា នៅសាលប្រជុំរដ្ឋបាលខេត្តបាត់ដំបង ដែលមានមន្ត្រីរាប់រយនាក់មកពីគ្រប់ស្ថានប័នបានចូលរួម ។
នៅក្នុងសំណេររបស់លោកអភិបាលខេត្ត ៖ អង្គសន្និបាតប្រចាំឆ្នាំនេះហាក់បានផ្ដោតខ្លាំងទៅលើគោលដៅបង្ក្រាបបទល្មើស«ឧក្រិដ្ឋកម្មឆបោកតាមប្រព័ន្ធបច្ចេកវិទ្យា និងល្បែងស៊ីសងគ្រប់ប្រភេទ» ដែលកើតមាននៅក្នុងទឹកដីខេត្តបាត់ដំបង ។ នៅចំពោះមុខមន្ត្រីក្រោមឪវ៉ាទរាប់រយនាក់ក្នុង «អង្គសន្និបាត» លោក សុខ លូ អភិបាលខេត្ត និងលោក អេ សារ៉ុម សមាជិកក្រុមប្រឹក្សាខេត្ត បានប្រកាសឯកភាពក្នុងការ «ប្ដេជ្ញាបង្ក្រាប និងលុងបំបាត់ឧក្រិដ្ឋកម្មឆបោកតាមប្រព័ន្ធបច្ចេកវិទ្យា»នេះ ។ មិនតែប៉ុណ្ណោះ លោកអភិបាលខេត្ត ថែមទាំងជម្រុញដល់អាជ្ញាធរ និងកងកម្លាំងទាំងអស់ត្រូវរួមគ្នាប្រកបដោយឆន្ទៈពិតប្រាកដក្នុងការ«ប្ដេជ្ញាបង្ក្រាប និងលុបបំបាត់ឧក្រិដ្ឋកម្មឆបោកតាមប្រព័ន្ធបច្ចេកវិទ្យា»នេះ ដែលលោកចាត់ទុកថាជាការ«បង្កគ្រោះថ្នាក់ធ្ងន់ធ្ងរបំផុតដល់សង្គមជាតិ» ។
ក្រៅពីនិយាយពីការប្ដេជាចិត្ត«បង្ក្រាប និងលុបបំបាត់ល្បែងឧក្រិដ្ឋកម្មអនឡាញ» លោកអភិបាលខេត្ត ក៏បានលើកយកមកនិយាយផងដែរ អំពីល្បែងស៊ីសងខុសច្បាប់ផ្សេងៗទៀត ។ ត្រង់ចំណុចនេះនៅក្នុង«អង្គសន្និបាត»លោកអភិបាលខេត្តបានក្រើនរំលឹកដល់មន្ត្រីនានា ក្នុងការតាមបង្ក្រាបរាល់ល្បែងស៊ីសងខុសច្បាប់ដទៃៗទៀត ដោយលើកយកគោលនយោបាយ«ភូមិ ឃុំសង្កាត់មានសុវត្ថិភាព»ជាចម្បង ភ្ជាប់ជាមួយនឹងកិច្ចប្រតិបត្តិការបង្ក្រាប«ឧក្រិដ្ឋកម្មអនឡាញ»។
លោកអភិបាលខេត្ត បានថ្លែងទៅកាន់មន្ត្រីនៅក្នុងអង្គសន្និបាតដូច្នេះថា«អាជ្ញាធរ និង កម្លាំងគ្រប់លំដាប់ថ្នាក់ ត្រូវពង្រឹងការអនុវត្តន៍នូវគោលនយោបាយ«ភូមិឃុំសង្កាត់មានសុវត្ថិភាព» ត្រូវបង្ក្រាបល្បែងស៊ីសង គ្រឿងញៀន ក្មេងទំននើង និងបទល្មើសគ្រប់ប្រភេទឲ្យមានប្រសិទ្ធភាពខ្ពស់បំផុត ។
សូមបញ្ជាក់ថា កាលពីសប្ដាហ៍មុននេះ កម្លាំងសមត្ថកិច្ខ នៃស្នងការខេត្តបាត់ដំបង រាប់សិបនាក់បានឆ្មក់ចូលទៅបង្ក្រាបទីតាំង«ឧក្រិដ្ឋកម្មអនឡាញ»ដ៏ធំសម្បើមមួយកន្លែង ដែលស្ថិតក្នុងឃុំពេជ្រចិន្តា ស្រុកភ្នំព្រឹក ជាប់ព្រំដែនកម្ពុជា ថៃ គ្រប់គ្រងដោយជនបរទេស ដែលភាគច្រើនជាជនជាតិចិន ។ ក្នុងកិច្ចប្រតិបត្តិការដ៏ក្ដៅគគុក ដែលគេមិនបានផ្ដល់សញ្ញាជាមុននេះ សមត្ថកិច្ចបានឡោមព័ទ្ធតំបន់អគារ«អនឡាញ» ដែលមើលទៅប៉ុនកូនទីក្រុងតូចមួយ ធ្វើឲ្យជនបរទេស ដែលសម្ងំប្រមូលផ្ដុំប្រព្រឹត្ត«ឧក្រិដ្ឋកម្មឆបោកតាមអនឡាញ»ដែលគេប៉ាន់ប្រមាណថា មានខ្ទង់ពាន់នាក់ ភាគច្រើនជាជនជាតិ«ចិន» នោះបានរត់ជាន់ជើងគ្នាចេញក្រៅរបងអគារទាំងថ្ងៃទាំងយប់ ប្រសេកប្រសាចពេញតាមដង ។ មិនតែប៉ុណ្ណោះ ខណៈភ័យស្លន់ស្លោពេញបន្ទុក ក្រុមឧក្រិដ្ឋជនអនឡាញមួយចំនួន បានប្រើប្រាសរថយន្តស៊េរីទំនើបបើកបំបុកទំលុះជញ្ជាំងរបងមេតុង ដើម្បីបើក«ផ្លូវឈាម»រត់ចេញពីកណ្ដាប់ដៃសមត្ថកិច្ចទៀតផង ។
បើតាមប្រភពពីសមត្ថកិច្ច និ ប្រជាពលរដ្ឋរស់នៅស្រុកភ្នំព្រឹកបានប្រាប់ថា នៅយប់ថ្ងៃកើតហេតុ គេឃើញមានរថយន្តក្រុង ឬ រថយន្តស៊េរីទំនើបៗរាប់សិបគ្រឿងបានទៅដល់តំបន់នោះ រង់ចាំទទូលដឹកក្រុមជនបរទេសដែលរត់រួចចេញពីអគារ«ឧក្រិដ្ឋកម្មឆបោក» ។
ប្រភពដដែលបានបង្ហើបឲ្យដឹងដែរថា កម្លាំងសមត្ថកិច្ចបានឡោមព័ទ្ធឃាត់ខ្លួនបានជនបរទេស ដើម្បីសួរនាំបានតិចជាង អ្នកដែលរត់ចេញរួច ។ ប៉ុន្តែសម្ភារៈ ឬវត្ថុតាងផ្សេងៗ ដូចជារថយន្ត និងសម្ភារៈសម្រាប់ប្រព្រឹត្តបទល្មើស«ឧក្រិដ្ឋកម្មឆោបោក» ស្ថិតក្រោមការគ្រប់គ្រងរបស់សមត្ថកិច្ចទាំងអស់ ក្រោយក្រុមប្រព្រឹត្តល្បែងអនឡាញឆបោកនេះបែកសំបុក ។
យ៉ាងណាក៏ដោយ ពាក់ព័ន្ធនឹងបទល្មើសល្បែងស៊ីសងគ្មានច្បាប់ទម្លាប់នេះ មិនថាឧក្រិដ្ឋកម្មឆបោកតាមប្រព័ន្ធបច្ចេកវិទ្យា (ល្បែងអនឡាញ) ឬ ល្បែងស៊ីសងគ្រប់ប្រភេទផ្សេងៗទៀតទេ អភិបាលខេត្តបាត់ដំបង លោក សុខ លូ បានប្រកាស និងប្ដេជ្ញាចិត្តនៅចំពោះមុខអង្គសន្និបាតប្រចាំឆ្នាំហើយថា លោកនឹងបង្ក្រាប លុបបំបាត់ «ឧក្រិដ្ឋកម្មឆោបោកតាមប្រព័ន្ធបច្ចេកវិទ្យា» ហើយថែមទាំងជម្រុញដល់អាជ្ញាធរ និងកម្លាំងសមត្ថកិច្ចគ្រប់លំដាប់ថ្នាក់ ត្រូវតាមបង្ក្រាបបនល្បែងស៊ីសងដទៃៗទៀតដែលគ្មានច្បាប់ ដែលកំពុងកើតមាននៅក្នុងខេត្ត ដើម្បីឈានដល់ការពង្រឹងឲ្យបាននូវគោលនយោបាយ«ភូមិឃុំសង្កាត់មានសុវត្ថិភាព» ដែលជាគោលនយោបាយដ៏ចម្បងរបស់រាជរដ្ឋាភិបាល៕
ចែករំលែកព័តមាននេះ