រាជធានីភ្នំពេញ ៖ ទីតាំងលួចលាក់លេងល្បែងស៊ីសងមួយកន្លែង នៅក្នុងហាងកាហ្វេ ស្ថិតក្នុងភូមិក្រោលគោ សង្កាត់គីឡូម៉ែត្រលេខ៦ ត្រូវបានកម្លាំងគណៈបញ្ជាការឯកភាពខណ្ឌឫស្សីកែវ ចុះបង្ក្រាបដោយឃាត់ខ្លួនអ្នកញៀនល្បែង ចំនួន៦នាក់ និងម្ចាស់ទីតាំងម្នាក់…
រាជធានីភ្នំពេញ ៖ ទីតាំងលួចលាក់លេងល្បែងស៊ីសងមួយកន្លែង នៅក្នុងហាងកាហ្វេ ស្ថិតក្នុងភូមិក្រោលគោ សង្កាត់គីឡូម៉ែត្រលេខ៦ ត្រូវបានកម្លាំងគណៈបញ្ជាការឯកភាពខណ្ឌឫស្សីកែវ ចុះបង្ក្រាបដោយឃាត់ខ្លួនអ្នកញៀនល្បែង ចំនួន៦នាក់ និងម្ចាស់ទីតាំងម្នាក់ បញ្ជូនទៅប៉ុស្តិ៍រដ្ឋបាលគីឡូម៉ែត្រលេខ៦ ។ ការបង្ក្រាបល្បែងស៊ីសងនេះ ធ្វើឡើងនៅរសៀលទី១៣ ខែមករា ឆ្នាំ២០២៦នេះ ។
លោក ជិន ប៊ុនធឿន អភិបាលខណ្ឌឫស្សីកែវ បានអោយដឹងថា លោកបានចាត់ឲ្យលោក ឌន ដាវុឌ នាយករងរដ្ឋបាលខណ្ឌ ដឹកនាំកម្លាំងចម្រុះ ចុះបង្ក្រាបទីតាំងហាងកាហ្វេ បង្កប់ល្បែងស៊ីសងមួយកន្លែង ស្ថិតក្នុងភូមិក្រោលគោ សង្កាត់គីឡូម៉ែត្រលេខ៦ ដោយបានដកហូតបានកុំព្យូទ័រមួយគ្រឿង បៀមួយហ៊ូ ឃាត់ខ្លួនមនុស្សបាន៦នាក់ កំពុងប្រព្រឹត្តល្បែងស៊ីសង និងម្ចាស់ទីតាំង១នាក់ សរុប៧នាក់ ។
លោកអភិបាល បានអោយដឹងទៀតថា ក្រុមការងារធ្វើកំណត់ហេតុ និងកិច្ចសន្យាដល់បងប្អូនទាំង៧នាក់ ព្រមទាំងណែនាំឲ្យបញ្ឈប់ប្រព្រឹត្តល្បែងស៊ីសងតទៅទៀត ព្រោះល្បែងស៊ីសង អាចធ្វើយើងខាតបង់លុយកាក់ សម្ភារៈ ឈ្លោះគ្នា ខាតពេលវេលា បែកបាក់គ្រួសារ មានអំពើចោរកម្ម និងឈានទៅដល់មានទោសប្រឈមមុខនឹងច្បាប់ថែមទៀតផង ។
បន្ទាប់ពីបានធ្វើកិច្ចសន្យា នៅប៉ុស្តិ៍រដ្ឋបាលសង្កាត់គីឡូម៉ែត្រលេខ៦ រួចមក ក៏បានអនុញ្ញាតិឲ្យបងប្អូនទាំង៧នាក់ ត្រលប់ទៅកាន់លំនៅឋានរៀងៗខ្លួនវិញ ៕
ចែករំលែកព័តមាននេះ