ទីក្រុងប៉េកាំង៖ ប្រទេសចិនមានសារនយោបាយមួយពាក់ព័ន្ធនឹងប្រទេសអ៊ីរ៉ង់នៅពេលគេបារម្ភកាន់តែខ្លាំងថាអាមេរិកអាចនឹងធ្វើអន្តរាគមន៍យោធា។ ចិនសង្ឃឹមថារដ្ឋាភិបាលអ៊ីរ៉ង់ និងប្រជាជនអ៊ីរ៉ង់អាចយកឈ្នះស្ថានការណ៍បច្ចុប្បន្ន និងថែរក្សាស្ថិរភាពជាតិ។ ខាងលើនេះជាការថ្លែងរបស់អ្នកនាំពាក្យក្រសួងការបរទេសចិន លោកស្រីម៉ៅនីង។ ការថ្លែងដូច្នេះបន្ទាប់ពីលោកដូណាល់ត្រាំប្រកាសថាត្រៀមប្រើដៃធ្ងន់ទៅលើអ៊ីរ៉ង់។ ក្នុងនោះ លោកក៏ត្រៀមប្រើកម្លាំងយោធាផងដែរ។
ចលនាបាតុកម្មដ៏ពុះកញ្ជ្រោលពេញផ្ទៃប្រទេសអ៊ីរ៉ង់បាននាំទៅដល់ការស្លាប់មនុស្សជាង៥រយនាក់។ អ្នកនាំពាក្យចិនថ្លែងថាប្រទេសរបស់លោកស្រីតែងតែប្រឆាំងជំទាស់នឹងការជ្រៀតជ្រែកកិច្ចការផ្ទៃក្នុងរបស់ប្រទេសដទៃ។ ចិនយល់ថាអធិបតេយ្យភាព និងសន្តិសុខរបស់ប្រទេសទាំងអស់នៅលើពិភពលោកគួរតែត្រូវបានគ្រប់គ្រងយ៉ាងពេញលេញដោយច្បាប់អន្តរជាតិ។ លោកស្រីម៉ៅប្រឆាំងជំទាស់នឹងការប្រើប្រាស់ការគំរាមកំហែងប្រើប្រាស់កម្លាំងទ័ពនៅក្នុងទំនាក់ទំនងអន្តរជាតិ។
ដួច្នេះ លោកស្រីសូមអំពាវនាវឱ្យគ្រប់ភាគីទាំងអស់ចូលរួមចំណែកការពារសន្តិភាព និងស្ថិរភាពនៅមជ្ឈិមបូព៌ា។ លោកស្រីថ្លែងដូច្នេះបន្ទាប់ពីលោកត្រាំគំរាមប្រើកម្លាំងយោធាកាន់តែខ្លាំងឡើងៗនៅពេលចំនួនអ្នកស្លាប់ដោយសារបាតុកម្មកើនឡើងដល់ជាង៥រយនាក់។ អ៊ីរ៉ង់កំពុងបោះដៃទៅរកអាមេរិកដើម្បីចរចាគ្នា។ ទន្ទឹមនឹងនោះ អ៊ីរ៉ងក៏កំពុងត្រៀមកម្លាំងដើម្បីចាត់ការអាមេរិកផងដែរ។ អ៊ីរ៉ង់ព្រមានថានឹងវាយប្រហារមូលដ្ឋានទ័ពរបស់អាមេរិកនៅមជ្ឈិមបូព៌ា បើអាមេរិកធ្វើអន្តរាគមន៍យោធា។
អ៊ីរ៉ង់ថ្លែងថាក្រុមបាតុករញុះញង់ឱ្យមានអំពើហិង្សាយ៉ាងដូច្នេះព្រោះពួកគេចង់បើកដៃឱ្យអាមេរិកធ្វើអន្តរាគមន៍យោធានៅអ៊ីរ៉ង់ឱ្យបានឆាប់។ រហូតមកដល់ពេលនេះ គេអាចដឹងអំពីចំនួនអ្នកស្លាប់ប៉ុន្មាននាក់តាមរយៈក្រុមសិទ្ធិមនុស្សតែប៉ុណ្ណោះ។ ចំណែករដ្ឋាភិបាលអ៊ីរ៉ង់មិនដែលបង្ហាញតួលេខអ្នកស្លាប់ទេ។ នេះបើយោងតាមការផ្សាយរបស់រ៉យទ័រ, ស៊ីនហួ និងប្រភពដទៃទៀត៕
ចែករំលែកព័តមាននេះ