ខេត្តព្រៃវែង ៖ កម្លាំងអាវុធហត្ថខេត្តព្រៃវែង បានបើកប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀន នៅស្រុកកំចាយមារ ដោយប្រើរយៈពេលត្រឹមតែ២ថ្ងៃប៉ុណ្ណោះ បានចាប់ឃាត់ខ្លួនជនសង្ស័យជាបន្តបន្ទាប់ សរុប៩នាក់ និងដកហូតបានវត្ថុតាងថ្នាំញៀនចំនួន…
ខេត្តព្រៃវែង ៖ កម្លាំងអាវុធហត្ថខេត្តព្រៃវែង បានបើកប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀន នៅស្រុកកំចាយមារ ដោយប្រើរយៈពេលត្រឹមតែ២ថ្ងៃប៉ុណ្ណោះ បានចាប់ឃាត់ខ្លួនជនសង្ស័យជាបន្តបន្ទាប់ សរុប៩នាក់ និងដកហូតបានវត្ថុតាងថ្នាំញៀនចំនួន ២១កញ្ចប់ ។
ប្រតិបត្តិការនេះ បានធ្វើឡើងនៅថ្ងៃទី១០ និង១១ ខែមករា ក្រោមបទបញ្ជារបស់លោកឧត្តមសេនីយ៍ ឈួន គឹមសាន្ត មេបញ្ជាការកងរាជ អាវុធហត្ថខេត្តព្រៃវែង និងដឹកនាំផ្ទាល់ដោយលោកវរសេនីយ៍ទោ ផាត់ សុជោត ប្រធានមន្ទីរស្រាវជ្រាវ និងបង្ក្រាបទល្មើស ដោយនៅថ្ងៃទី១ កម្លាំងអាវុធហត្ថស្រុកកំចាយមារ បានចាប់ឃាត់ខ្លួនជនសង្ស័យបានចំនួន ៦នាក់ នៅចំណុចភូមិត្បូងវត្ត ឃុំក្របៅ ស្រុកកំចាយមារ និងដកហូតបានវត្ថុតាមថ្នាំញៀនចំនួន ៣កញ្ចប់ ។
តាមរយៈការស្ដាប់ចម្លើយរបស់ក្រុមជនសង្ស័យខាងលើ នៅថ្ងៃទី២ កម្លាំងអាវុធហត្ថខេត្តព្រៃវែង ក៏បានបន្តនីតិវិធី និងឈានទៅដល់ការចាប់ឃាត់ខ្លួនជនសង្ស័យជាបន្តបន្ទាប់បានចំនួន ៣នាក់ទៀត និងដកហូតវត្ថុតាងថ្នាំញៀនបានចំនួន ១៨កញ្ចប់ទៀត ។
បច្ចុប្បន្ន ជនសង្ស័យទាំង៩នាក់ រួមទាំងវត្ថុតាងត្រូវបានឃាត់ខ្លួននៅបញ្ជាការដ្ឋានកងរាជរដ្ឋខេត្តព្រៃវែង ដើម្បីកសាងសំណុំរឿង ចាត់ការបន្តទៅតាមនីតិវិធី ៕
ចែករំលែកព័តមាននេះ