ហ្គ្រោអេនឡែន ៖ នាយករដ្ឋមន្ត្រីដាណឹម៉ាក់លោកស្រីMETTE FREDERIKSEN បានព្រមានកាលពីថ្ងៃទី៥មករាថា រាល់ការប៉ុនប៉ងរបស់អាមេរិក ដើម្បីដណ្ដើមយកកោះហ្គ្រោអេនឡែនដោយកម្លាំងនោះ វានឹងបំផ្លាញទំនាក់ទំនងខាងសន្តិសុខអស់ពេល៨០ឆ្នាំំមកហើយរវាងប្រទេសទាំង២។ ការព្រមាននោះធ្វើឡើងបន្ទាប់ពីប្រធានាធិបតីអាមេរិកលោកដូណាល់ត្រាំ លើកឡើងជាថ្មីពីបំណងលោកដណ្ដើមយកដែនដីតំបន់អាក់ទិកសម្បូរដោយធនធានរ៉ែនោះរបស់ដាណឺម៉ាក់។
អន្តរាគមន៍យោធារបស់អាមេរិកនៅវេណេស៊ុយអេឡានាំឲ្យមានការភ័យខ្លាចជាថ្មី ទាក់ទិននឹងបំណងលោកត្រាំដណ្ដើមយកដែនដីស្វយ័តនោះរបស់ដាណឹម៉ាក់ ដែលសម្បូរដោយដីកម្រមិនទាន់ធ្វើអាជីវកម្ម។ ជាមួយការរលាយនៃទឹកតំបន់ប៉ូល ហ្គ្រោអេនឡែនអាចដើរតួនាទីយុទ្ធសាស្ត្រមួយ ដោយបើកផ្លូវសមុទ្រថ្មីៗ។ លោកត្រាំថ្លែងកាលពីថ្ងៃទី៤មករាថា យើងត្រូវការហ្គ្រោអេនឡែន បើគិតពីសន្តិសុខជាតិហើយដាណឹម៉ាក់មិនមានលទ្ធភាពគ្រប់គ្រងឡើយ។
ជាការឆ្លើយតបវិញនាយករដ្ឋមន្ត្រីហ្ក្រោអេនឡែនលោកJENS FREDERIK NIELSENបានស្នើដល់លោកត្រាំឲ្យផ្លាស់ប្ដូរជំហរលោក ចំណែកប្រទេសអឹរ៉ុបជាច្រើននិងសហភាពអឹរ៉ុប បានប្រមូលគ្នាដោយរហ័ស ដើម្បីគាំទ្រដាណឹម៉ាក់ ដែលស្នើដល់អាមេរិកឲ្យឈប់គំរាមកំហែង សម្ព័ន្ធមិត្តមួយរបស់អូតង់។
នៅក្រុងកូប៉េនហាកលោកស្រីនាយករដ្ឋមន្ត្រីដាណឺម៉ាក់ថ្លែងទៅទៅកាន់ទូរទស្សន៍TV2ថា ប្រសិនបើអាមេរិក ជ្រើសរើសយកការវាយប្រហារខាងយោធា លើប្រទេសមួយជាសមាជិកអូតង់នោះអ្វីៗនឹងចប់ហើយ ក្នុងនោះរួមទាំងអូតង់និងសន្តិសុខដែលបង្កើតឡើងចាប់តាំងពីក្រោយសង្គ្រាមលោកលើកទី២មក។ ហ្គ្រោអេនឡែនស្ថិតនៅក្នុងចម្ងាយមិនឆ្ងាយពីមិសីុលរុស្សុីនិងអាមេរិកហើយក្រុងវ៉ាសិុនតោនមានមូលដ្ឋានយោធាមួយនៅទីនោះស្រាប់។ លោកត្រាំថាយើងនឹងកាន់កាប់ហ្ក្រោអេនឡែន ដោយប្រើពេលត្រឹមប្រមាណជា២ខែ។
នាយករដ្ឋមន្ត្រីហ្គ្រោអេនឡែន ប្រឈមមុខនឹងការគំរាមកំហែងនេះ អះអាងតាមបណ្ដាញសង្គមថា យើងបើកចំហចំពោះការចរចាតែការចរចានោះត្រូវធ្វើតាមផ្លូវសមស្របនិងដោយគោរពបណ្ដាច្បាប់អន្តរជាតិ។ រយៈពេលប៉ុន្មានខែចុងក្រោយនេះ ប្រធានាធិបតីអាមេរិកបានបង្កើនការគាបសង្កត់លើហ្ក្រោអេនឡែន ដោយអះអាងកាលពីខែធ្នូ២០២៥ថា បណ្ដានាវារុស្ស៊ី និងចិន មាននៅគ្រប់ទីកន្លែងនៃឆ្នេរសមុទ្រហ្គ្រោអេនឡែន។ ក្រសួងការបរទេសចិននាថ្ងៃទី៤មេសាបានតបតវិញ ដោយស្នើដល់ក្រុងវ៉ាស៊ីនតោន ឲ្យឈប់ប្រើប្រាស់របស់ហៅថាការគំរាមកំហែងរបស់ចិន ដើម្បីស្វែងរកប្រយោជន៍ផ្ទាល់ខ្លួន៕
ចែករំលែកព័តមាននេះ