ADផ្ទាំងផ្សព្វផ្សាយពាណិជ្ជកម្ម

ស្ត្រីម្នាក់ សម្ភាសន៍ទៅរស់នៅអាមេរិកជាប់ហើយ ត្រលប់មកពីបកប្រែឯកសារវិញ ដួលម៉ូតូត្រូវរថយន្តដឹកដែកកិនស្លាប់

15 ម៉ោង មុន

៣០ ខែ ធ្នូ ឆ្នាំ ២០២៥ ម៉ោង ១៧:៤៦

រាជធានីភ្នំពេញ ៖ ស្ត្រីម្នាក់ បានពឹងឲ្យក្មួយប្រុសបង្កើតម្នាក់ ជិះម៉ូតូឌុបគាត់ទៅបកប្រែឯកសារ ដើម្បីទៅរស់នៅជាមួយកូនស្រីគាត់ នៅឯសហរដ្ឋអាមេរិក ព្រោះកាលពីពេលថ្មីៗកន្លងមកនេះ រូបគាត់បានសម្ភាសន៍ជាប់រួចហើយ គឺនៅតែថ្ងៃកំណត់ត្រូវចេញដំណើរទៅតែប៉ុណ្ណោះ។ ប៉ុន្តែជាអកុសល ក្រោយពេលបកប្រែឯកសាររួចរាល់ ឲ្យក្មួយប្រុសដឹកត្រលប់ទៅផ្ទះវិញ ដល់ត្រង់ចំណុចផ្លូវកែង ស្រាប់តែរអិលដីខ្សាច់ បណ្ដាលឲ្យដួលខ្ទាតចូលក្រោមកង់រថយន្តដឹកដែក ១គ្រឿង កិនអូសជាង១០០ម៉ែត្រ ខ្ទេចសាច់ស្លាប់ភ្លាមៗនៅនឹងកន្លែង ។

ឧប្បត្តិហេតុខាងលើ បានកើតឡើងនៅវេលាម៉ោង០៣និង៥០នាទីរសៀលថ្ងៃទី៣០ ខែធ្នូ ឆ្នាំ២០២៥ នៅតាមផ្លូវបេតុង មុខវត្តស្វាយផ្អែម ស្ថិតនៅក្នុងភូមិស្រែក្នុង សង្កាត់កន្ទោក ខណ្ឌកំបូល រាជធានីភ្នំពេញ ។

ស្ត្រីរងគ្រោះឈ្មោះ តុប សារ៉េត អាយុ៦៨ឆ្នាំ មានទីលំនៅបុរីភពថ្មី គម្រោង៣ ភូមិស្ងួនពេជ្រ សង្កាត់កន្ទោក ខណ្ឌកំបូល និងមានស្រុកកំណើតនៅខេត្តតាកែវ ចំណែកក្មួយប្រុស ដែលជាអ្នកឌុបរងរបួសស្រាល មិនត្រូវបានស្គាល់អត្តសញ្ញាណនោះទេ ។

សមត្ថកិច្ច បានប្រាប់ថា ជនរងគ្រោះបានសម្ភាសន៍ ដើម្បីទៅរស់នៅសហរដ្ឋអាមេរិកជាប់ហើយ បន្ទាប់មកនៅថ្ងៃកើតហេតុ គាត់បានពឹងឲ្យក្មួយប្រុសម្នាក់ ជិះម៉ូតូ ១គ្រឿង ម៉ាកហុងដាស្កូបពី ពណ៍ស ពាក់ស្លាកលេខកំពង់ធំ 1R-4000 ដឹកគាត់ទៅបកប្រែឯកសារ។ លុះក្រោយពេលបកប្រែចប់ ក៏ឲ្យក្មួយប្រុសដឹកត្រលប់មកវិញ ដោយធ្វើដំណើរក្នុងទិសដៅពីកើតទៅលិច ហើយពេលទៅដល់ត្រង់ចំណុចកើតហេតុ បានបត់ស្ដាំ ក៏ស្រាប់តែរអិលដីខ្សាច់ បណ្ដាលឲ្យដួល ។

ប្រភពដដែលបានឲ្យដឹងបន្តថា ខណៈដួលនោះ ជនរងគ្រោះបានខ្ទាតចូលក្រោមកង់ក្រោយរថយន្តដឹកដែក១គ្រឿង ម៉ាក FUSO ពណ៍ឈាមជ្រូក ពាក់ស្លាកលេខព្រះសីហនុ 3A-1932 ដែលកំពុងបើកស្របគ្នា ពីក្រោយ ក៏ត្រូវរថយន្តកិនអូសជាង១០០ម៉ែត្រ បែកខ្ទេចសាច់ស្លាប់ភ្លាមៗនៅនឹងកន្លែង។ ចំណែកក្មួយប្រុសដែលជាអ្នកឌុបរងរបួសស្រាល។ បន្ទាប់មករថយន្តបានឈប់ ហើយអ្នកបើកបរ បានចុះរត់គេចខ្លួនបាត់ស្រមោល ។

ក្រោយពេលកើតហេតុ កម្លាំងនគរបាលខណ្ឌកំបូល បានចុះទៅធ្វើការសម្រួលចរាចរ និងរាយការណ៍ជូននគរបាលការិយាយល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ឲ្យចុះទៅធ្វើការវាស់វែងនិងនាំយករថយន្ត និងម៉ូតូ ទៅរក្សាទុករង់ចាំការដោះស្រាយនៅពេលក្រោយ ៕