ខេត្តសៀមរាប ៖ បងប្អូនភៀសសឹកបាននាំគ្នាបន្តដាំបន្លែនៅតាមទីតាំងសុវត្ថិភាពរបស់ខ្លួនស្នាក់នៅ ដើម្បីបង្កើនភាពអាចពឹងផ្អែកលើខ្លួនឯង និងធានាសន្តិសុខស្បៀង ។ នេះបើយោងតាម រដ្ឋបាលខេត្តសៀមរាបបានប្រកាសនាថ្ងៃទី២៦ ខែធ្នូ ឆ្នាំ២០២៥…
ខេត្តសៀមរាប ៖ បងប្អូនភៀសសឹកបាននាំគ្នាបន្តដាំបន្លែនៅតាមទីតាំងសុវត្ថិភាពរបស់ខ្លួនស្នាក់នៅ ដើម្បីបង្កើនភាពអាចពឹងផ្អែកលើខ្លួនឯង និងធានាសន្តិសុខស្បៀង ។ នេះបើយោងតាម រដ្ឋបាលខេត្តសៀមរាបបានប្រកាសនាថ្ងៃទី២៦ ខែធ្នូ ឆ្នាំ២០២៥ ។
រដ្ឋបាលខេត្តសៀមរាប បានបញ្ជាក់ថា ៖ គិតត្រឹមថ្ងៃទី២៥ ខែធ្នូ ឆ្នាំ២០២៥នេះ ទីតាំងភៀសសឹកនៅក្នុងភូមិសាស្ត្រស្រុកស្រីស្នំ បាននឹងកំពុងមមាញឹកក្នុងការបន្តដាំដុះបន្លែបន្ថែមទៀតលើផ្ទៃដីទំនេរ នៅតាមទីតាំងសុវត្ថិភាពរៀងៗខ្លួន តាមណែនាំរបស់ឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត និងក្រោមគំនិតផ្តួចផ្តើមដ៏ឈ្លាសវៃបំផុតរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត លើចលនា«យើងរួមគ្នាដើម្បីជាតិ!» ដោយបំផុសបងប្អូនខ្មែរទាំងអស់នាំគ្នាដាំបន្លែ ប្រមូលផលទុកជូនគ្រួសារកងទ័ព បងប្អូនភៀសសឹកសម្រាប់ផ្គត់ផ្គង់ប្រចាំថ្ងៃ ។
ថ្ងៃនេះ ដើម្បីបំបាត់ការអផ្សុកផង និងពលកម្មផង បងប្អូនភៀសសឹកនៅវត្តសុវណ្ណគិរីកេសរត្រោះ ឃុំស្លែងស្ពាន បានដាំត្រកួនបានចំនួន ១ទីតាំងបន្ថែមទៀតលើផ្ទៃដី សរុបចំនួន១០០ម៉ែត្រការ៉េ ។
ដោយឡែក នៅឃុំមោង ក៏បានដាំត្រកួនបាន៥រោងទៀត លើផ្ទៃដីសរុបចំនួន១៩២ម៉ែត្រការ៉េ ដើម្បីជាការលើកកម្ពស់ការដាំបន្លែតាមផ្ទះសាលារៀន វត្តអារាម និងសហគមន៍ ដើម្បីបង្កើនភាពអាចពឹងផ្អែកលើខ្លួនឯង និងធានាសន្តិសុខស្បៀងសម្រាប់ប្រជាពលរដ្ឋ ៕
ចែករំលែកព័តមាននេះ