ខេត្តព្រៃវែង ៖ មន្ត្រីអធិការកិច្ច នៃអគ្គាធិការដ្ឋានក្រសួងមហាផ្ទៃ កំពុងចុះស៊ើបអង្កេតករណីលោក ហ៊ន សុផាត អភិបាលស្រុកមេសាង ធ្វើឲ្យបាត់លុយរបស់សប្បុរសជនជួយឧបត្ថម្ភកងទ័ពជួរមុខ និងជនភៀសសឹក…
ខេត្តព្រៃវែង ៖ មន្ត្រីអធិការកិច្ច នៃអគ្គាធិការដ្ឋានក្រសួងមហាផ្ទៃ កំពុងចុះស៊ើបអង្កេតករណីលោក ហ៊ន សុផាត អភិបាលស្រុកមេសាង ធ្វើឲ្យបាត់លុយរបស់សប្បុរសជនជួយឧបត្ថម្ភកងទ័ពជួរមុខ និងជនភៀសសឹក ជាង 90 លានរៀលមិនដឹងទៅណា ។ យោងតាមការបញ្ជាក់ ពីមន្ត្រីសាលាស្រុកមេសាង បានឲ្យដឹងថា មន្ត្រីអធិការកិច្ចបានចុះស៊ើបអង្កេតករណីនេះ តាំងពីថ្ងៃទី 24 ធ្នូ ហើយបន្តរហូតមកដល់ថ្ងៃទី 26 នេះ នៅមិនទាន់បញ្ចប់ការស៊ើបអង្កេតនៅឡើយទេ ។
ប្រភពដដែលនេះបានឲ្យដឹងថា ក្រោយពីមាន ការវាយប្រហារដោយទាហានថៃ កាលពីថ្ងៃទី 24 កក្កដា ដែលធ្វើឲ្យមានអ្នករងរបួស និងស្លាប់ ព្រមទាំងមានជនភៀសសឹករាប់ម៉ឺនាក់ នៅថ្ងៃទី 28 កក្កដា រដ្ឋបាលស្រុកមេសាង ក៏បានចេញលិខិតអំពាវនាវឲ្យប្រជាពលរដ្ឋ ចូលរួមបរិច្ចាកធនធានដើម្បីជួយគាំទ្រដល់កងទ័ពជួរមុខ ព្រមទាំងជនភៀសសឹកផងដែរ ។
តាមរយៈការអំពាវនាវនេះ ប្រជាពលរដ្ឋក្នុងស្រុកមេសាងទាំងអស់ បានបរិច្ចាគធនធានរបស់ខ្លួនចូលរួមជាមួយរដ្ឋបាលស្រុក ដោយប្រមូលបានថវិកាសរុបចំនួន ១១៧ ០៣២ ៨០០រៀល សម្រាប់ជួយឧបត្ថម្ភដល់វីរកងទ័ពជួរមុខ និងជនភៀសសឹក ។ ប៉ុន្តែអ្វីដែលធ្វើឱ្យគេខកចិត្តខ្លាំងនោះ គឺរដ្ឋបាលស្រុកមេសាង បានប្រគល់លុយជំនួយនេះ ទៅឲ្យរដ្ឋបាលខេត្តព្រៃវែង ដើម្បីបញ្ជូនបន្តទៅឲ្យកងទ័ពជួរមុខ បានចំនួនត្រឹមតែជាង 20 លានរៀលប៉ុណ្ណោះ ដោយបាត់អស់ជាង 90 លានរៀលទៀតមិនដឹងទៅណា ?
ពាក់ព័ន្ធករណីនេះ នៅព្រឹកថ្ងៃទី 26 ធ្នូ លោក ហ៊ន សុផាត អភិបាលស្រុកមេសាង បានប្រាប់ឲ្យកោះសន្តិភាពដឹងតាមទូរសព្ទថា ពេលនេះមន្ត្រីអធិការកិច្ច នៅកំពុងស៊ើបអង្កេតរឿងនេះនៅឡើយ ដូច្នេះលោកសុំមិនធ្វើការបកស្រាយអ្វីទេ ព្រោះបើបកស្រាយទៅអាចនឹងមានចំណុចខ្លះខុសពីការរកឃើញរបស់មន្ត្រីអធិការកិច្ច ដូច្នេះសូមឲ្យរង់ចាំមើលលទ្ធផលផ្លូវការ ដែលមន្ត្រីអធិការកិច្ច និងប្រកាសផ្សាយតែម្ដង ។
ដោយឡែកលោក អន ភារៈ អភិបាលរងខេត្តព្រៃវែង និងជាអ្នកនាំពាក្យរបស់រដ្ឋបាលខេត្ត បានប្រាប់អ្នកសារព័ត៌មានថា រដ្ឋបាលស្រុកមេសាង ពិតជាបានប្រគល់លុយមកឲ្យរដ្ឋបាលខេត្ត ត្រឹមតែជាង 20 លានរៀលពិតមែន ។ ចំណែកលុយដែលនៅសល់ រដ្ឋបាលស្រុកបានដកចំណាយទៅលើការដឹកជញ្ជូនពលករចំណាកស្រុកអស់ចំនួនជាង 50 លានរៀល នឹងនៅសល់ជាង 30 លានរៀលទៀត រក្សាទុកនៅរដ្ឋបាលស្រុក មិនបានបាត់បង់ទៅណាទេ ។
ទោះជាយ៉ាងណាក៏ដោយ ការបកស្រាយរបស់លោកអភិបាលរងខេត្ត អន ភារៈ ធ្វើឲ្យប្រជាពលរដ្ឋជាម្ចាស់លុយ មិនអាចទទួលយកបានទេ ព្រោះការចំណាយដែលលើកឡើងនោះ វាផ្ទុយពីគោលបំណងដើមរបស់ពលរដ្ឋ ។ ម្យ៉ាងលុយជាង ៣០លានរៀលដែលទុកនៅក្នុងរដ្ឋបាលស្រុកនោះ តើទុកធ្វើអ្វី ? ទាំងដែលប្រជាពលរដ្ឋភៀសសឹក និងកងទ័ពជួរមុខ កំពុងត្រូវការជំនួយខ្លាំងបែបនេះ ! ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ