រាជធានីភ្នំពេញ ៖ ចូលរួមគោរពវិញ្ញាណក្ខន្ធសពព្រិន្ទបាលឯក សៅ វីរៈដារ៉ា យោធិននៃកងពលធំអន្តរាគមន៍លេខ៣ កងទ័ពជើងគោក បានពលីជីវិតនៅសមរភូមិជួរមុខ ក្នុងបុព្វហេតុការពារបូរណភាពទឹកដីពីសត្រូវឈ្លានពាន ។…
រាជធានីភ្នំពេញ ៖ ចូលរួមគោរពវិញ្ញាណក្ខន្ធសពព្រិន្ទបាលឯក សៅ វីរៈដារ៉ា យោធិននៃកងពលធំអន្តរាគមន៍លេខ៣ កងទ័ពជើងគោក បានពលីជីវិតនៅសមរភូមិជួរមុខ ក្នុងបុព្វហេតុការពារបូរណភាពទឹកដីពីសត្រូវឈ្លានពាន ។ នេះបើយោងតាមផេក លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក.អ.ក.បានប្រកាសនារសៀលថ្ងៃទី១២ខែធ្នូ ឆ្នាំ២០២៥ ។
ជាក់ស្តែង នាព្រឹកថ្ងៃសុក្រ ទី១២ ខែធ្នូ ឆ្នាំ២០២៥ លោក គង់ វិមាន អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាអភិវឌ្ឍន៍កម្ពុជា(ក.អ.ក.) តំណាងដ៏ខ្ពង់ខ្ពស់របស់ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក.អ.ក. បានអញ្ជើញដឹកនាំគណៈប្រតិភូ ក.អ.ក. ចូលរួមពិធីគោរពវិញ្ញាណក្ខន្ធ លោកព្រិន្ទបាលឯក សៅ វីរៈដារ៉ា យោធិននៃកងពលធំអន្តរាគមន៍លេខ៣ កងទ័ពជើងគោក ដែលបានពលីជីវិតនៅសមរភូមិជួរមុខ ក្នុងបុព្វហេតុការពារដែនអធិបតេយ្យភាព និងបូរណភាពទឹកដីពីសត្រូវឈ្លានពាន ក្នុងភូមិសាស្ត្រតំបន់មុំ៣ នៃខេត្តព្រះវិហារ នៅថ្ងៃទី៩ ខែធ្នូ ឆ្នាំ២០២៥ ក្នុងជន្មាយុ ២៧ឆ្នាំ ។
បច្ចុប្បន្នសពកំពុងតម្កល់ដើម្បីប្រារព្ធពិធីបុណ្យទក្ខិណានុប្បទាន ទៅតាមគន្លងប្រពៃណីនិងទំនៀមទំលាប់សាសនា នៅក្នុងទីអាមវត្តចាក់អង្រែលើ ។
មរណភាពរបស់លោកព្រិន្ទបាលឯក សៅ វីរៈដារ៉ា គឺជាការបាត់បង់អ្នកស្នេហាជាតិដ៏ឧត្តុងឧត្តមមួយរូប ដែលបានរួមចំណែកយ៉ាងធំធេង ស្វាហាប់ និងមុះមុត ក្នុងការប្រយុទ្ធតស៊ូជាមួយខ្មាំងសត្រូវ ដែលបាននិងកំពុងធ្វើការឈ្លានពានយ៉ាងគឃ្លើន មកលើដែនអធិបតេយ្យភាពរបស់ព្រះរាជាណាចក្រកម្ពុជាយើង ។
លោកព្រិន្ទបាលឯក ជាធនធានមនុស្សដ៏មានតម្លៃមួយរូបនៅក្នុងសង្គមជាតិ ជាពិសេសភាពអង់អាចក្លាហាន និងស្វិតស្វាញរបស់លោកក្នុងការប្រឆាំងជាមួយពពួកចោរឈ្លានពានទឹកដី គឺពិតជាបានបង្ហាញឱ្យឃើញយ៉ាងប្រត្យក្សអំពី គំរូវីរភាពស្នេហាជាតិ ដែលយុវជន និងប្រជាពលរដ្ឋខ្មែរគ្រប់រូប ត្រូវតែចងចាំជានិច្ចនូវគុណូបការៈដ៏ថ្លៃថ្លានេះ ៕
ចែករំលែកព័តមាននេះ