អគ្គលេខាធិការអង្គការសហប្រជាជាតិ Antonio Guterres បានការព្រួយបារម្ភចំពោះ របាយការណ៍នៃការបន្តប៉ះទង្គិចប្រដាប់អាវុធឡើងវិញ រវាងកម្ពុជា និងថៃ ជាពិសេស របាយការណ៍នៃការវាយប្រហារតាមអាកាស និងការចល័ត…
អគ្គលេខាធិការអង្គការសហប្រជាជាតិ Antonio Guterres បានការព្រួយបារម្ភចំពោះ របាយការណ៍នៃការបន្តប៉ះទង្គិចប្រដាប់អាវុធឡើងវិញ រវាងកម្ពុជា និងថៃ ជាពិសេស របាយការណ៍នៃការវាយប្រហារតាមអាកាស និងការចល័ត ឧបករណ៍ធុនធ្ងន់នៅតាម តំបន់ព្រំដែន ។
លោកជំរុញឱ្យភាគីទាំងពីរអនុវត្តការអត់ធ្មត់ និងចៀសវាង ការបង្កើន ភាពតានតឹងបន្ថែមទៀត ។ នេះបើតាមការផ្សាយរបស់វេបសាយអង្គការសហប្រជាជាតិ កាលពីថ្ងៃទី៨ ខែធ្នូ ។ លោកបាននិយាយថា ជម្លោះព្រំដែនរវាងកម្ពុជា និងថៃបានបណ្តាលឱ្យមានការស្លា.ប់ និង របួសដល់ជនស៊ីវិលការខូចខាត ហេដ្ឋារចនាសម្ព័ន្ធ ស៊ីវិល និងការផ្លាស់ទីលំនៅយ៉ាងច្រើន នៅភាគីទាំងសងខាងនៃព្រំដែន ។
អគ្គលេខាធិការ សង្កត់ធ្ងន់ថា ភាគីទាំងពីរត្រូវតែការពារជនស៊ីវិល និងសម្របសម្រួលដល់ ការផ្តល់ជំនួយមនុស្សធម៌ ។ អគ្គលេខាធិការបានលើកឡើងជាថ្មីនូវការអំពាវនាវរបស់លោកឱ្យភាគីទាំងពីរវិលត្រឡប់ទៅកាន់ក្របខ័ណ្ឌនៃសេចក្តីប្រកាស រួមដែលបានចុះហត្ថលេខានៅទីក្រុងកូឡាឡាំពួរ កាលពីថ្ងៃទី២៦ ខែតុលា អនុវត្តការប្តេជ្ញាចិត្តឡើងវិញចំពោះ បទឈប់បាញ់ និងអនុវត្តវិធានការ កាត់បន្ថយ ភាពតានតឹង និងកសាងទំនុកចិត្ត ។
លោកអំពាវនាវឱ្យភាគីទាំងពីរប្រើប្រាស់យន្តការទាំងអស់សម្រាប់ការសន្ទនាឱ្យបានពេញលេញ ដើម្បីស្វែងរកដំណោះស្រាយយូរអង្វែងចំពោះជម្លោះតាមរយៈមធ្យោបាយ សន្តិវិធី ។ អង្គការសហប្រជាជាតិ ត្រៀមខ្លួនរួចជាស្រេច ដើម្បីគាំទ្ររាល់កិច្ចខិតខំប្រឹងប្រែង ទាំងឡាយដែលមានគោលបំណងលើកកម្ពស់សន្តិភាព ស្ថិរភាព និងការអភិវឌ្ឍនៅក្នុងតំបន់ ៕
ចែករំលែកព័តមាននេះ