រដ្ឋមន្ត្រីក្រសួងព័ត៌មាន បានប្រកាសឱ្យដឹងថា ការវាយប្រហារដ៏កំរោលរបស់យោធាថៃមកលើកងកម្លាំង និងជនស៊ីវិលកម្ពុជា បានបង្ខំឱ្យប្រជាពលរដ្ឋជាច្រើនគ្រួសារត្រូវរត់ភៀសខ្លួនចេញពីលំនៅឋាន គិតត្រឹមម៉ោង១១ ថ្ងៃទី៩ ខែធ្នូនេះ ពលរដ្ឋខ្មែរស្លូតត្រង់កម្ពុជានៅក្នុងខេត្តចំនួន៤ បានភៀសសឹក…
រដ្ឋមន្ត្រីក្រសួងព័ត៌មាន បានប្រកាសឱ្យដឹងថា ការវាយប្រហារដ៏កំរោលរបស់យោធាថៃមកលើកងកម្លាំង និងជនស៊ីវិលកម្ពុជា បានបង្ខំឱ្យប្រជាពលរដ្ឋជាច្រើនគ្រួសារត្រូវរត់ភៀសខ្លួនចេញពីលំនៅឋាន គិតត្រឹមម៉ោង១១ ថ្ងៃទី៩ ខែធ្នូនេះ ពលរដ្ឋខ្មែរស្លូតត្រង់កម្ពុជានៅក្នុងខេត្តចំនួន៤ បានភៀសសឹក និងគេចចេញពីការវាយប្រហាររបស់យោធាថៃ និងមកកាន់មណ្ឌលសុវត្ថិភាពសរុប១៦៥៦៨ គ្រួសារ ស្មើនឹង៥៤ ៥៥០នាក់ ។
ជាក់ស្តែង លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានប្រកាសនារសៀលថ្ងៃទី៩ ខែធ្នូ ឆ្នាំ២០២៥នេះថា ៖ ការបើកការវាយប្រហាររបស់យោធាថៃ មកលើកងកម្លាំងកម្ពុជា និងជនស៊ីវិល បង្កឱ្យមានជនភៀសសឹកជាច្រើន ។
រដ្ឋមន្ត្រីក្រសួងព័ត៌មាន បានបញ្ជាក់ថា គិតត្រឹមម៉ោង១១ ថ្ងៃទី៩ ខែធ្នូ ឆ្នាំ២០២៥ ពលរដ្ឋខ្មែរស្លូតត្រង់កម្ពុជានៅក្នុងខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ និងខេត្តពោធិ៍សាត់ បានភៀសសឹក និងគេចចេញពីការវាយប្រហាររបស់យោធាថៃ និងមកកាន់មណ្ឌលសុវត្ថិភាពសរុប១៦៥៦៨ គ្រួសារ ស្មើនឹង៥៤ ៥៥០នាក់ ។
ជាក់ស្តែង ក្រសួងការពារជាតិ បានប្រកាសនាម៉ោង១០និង៥៨នាទីព្រឹកថ្ងៃទី៩ ខែធ្នូនេះថា ៖ អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា សូមជម្រាបជូនសាធារណជន អ្នកសារព័ត៌មានជាតិ និងអន្តរជាតិមេត្តាជ្រាបពីស្ថានការណ៍នៅតាមបន្ទាត់ព្រំដែនកម្ពុជា-ថៃ ក្នុងយោធភូមិភាគទី៥ និងយោធភូមិភាគទី៤ នៅថ្ងៃទី៩ ខែធ្នូ ឆ្នាំ២០២៥:
ភាគីថៃបានបន្តរំលោភបំពានលើបទឈប់បាញ់ និង«សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ» ដែលភាគីកម្ពុជានិងភាគីថៃបានចុះហត្ថលេខា កាលពីថ្ងៃទី២៦ ខែតុលា ឆ្នាំ២០២៥ ដោយបន្តធ្វើសកម្មភាពឈ្លានពានប្រដាប់អាវុធសាជាថ្មីមកលើបូរណភាពទឹកដីរបស់កម្ពុជា ដោយការប្រើប្រាស់កម្លាំងយោធា ។
ដោយសារសកម្មភាពដ៏គឃ្លើនរបស់យោធាថៃ ដែលបានបើកការបាញ់ប្រហារមុន និងឈ្លានពានមកលើដែនអធិបតេយ្យស្របច្បាប់របស់កម្ពុជា កងកម្លាំងកម្ពុជាគ្មានជម្រើសអ្វីក្រៅពីការប្រើប្រាស់សិទ្ធិការពារខ្លួនក្នុងដែនអធិបតេយ្យ និងបូរណភាពទឹកដីរបស់ខ្លួន ប្រយុទ្ធប្រឆាំងនឹងការឈ្លានពានខុសច្បាប់មកលើបូរណភាពទឹកដីកម្ពុជា ដោយយោធាថៃ ដូចមានចែងក្នុងមាត្រា ៥១ នៃធម្មនុញ្ញអង្គការសហប្រជាជាតិ ។ ក្នុងន័យនេះ កងយោធពលខេមរភូមិន្ទ ប្តេជ្ញាចិត្តឥតងាករេក្នុងការការពារអធិបតេយ្យភាព បូរណភាពទឹកដី និងសុវត្ថិភាពរបស់ប្រជាជន ប្រឆាំងនឹងអំពើឈ្លានពានដ៏កំរោល និងសាហាវឃោរឃៅរបស់ថៃមកលើកម្ពុជា៕
ចែករំលែកព័តមាននេះ