ទីក្រុងវ៉ាស៊ីនតោន៖ លោកដូណាល់ត្រាំថ្លែងថាតាមមើលទៅប្រមុខដឹកនាំអ៊ុយក្រែន លោកហ្សេឡិនស្គី ប្រហែលជាមិនទាន់ត្រៀមខ្លួនចុះហត្ថលេខាលើកិច្ចព្រមព្រៀងសន្តិភាពដើម្បីបិទបញ្ចប់សង្គ្រាមទេ។ លោកថ្លែងរបៀបរិះគន់យ៉ាងដូច្នេះបន្ទាប់ពីគណៈប្រតិភូរបស់អ៊ុយក្រែន និងអាមេរិកទើបតែបិទបញ្ចប់ការចរចាគ្នារយៈពេលបីថ្ងៃ។ កិច្ចជំនួបនេះរៀបចំឡើងដើម្បីដោះស្រាយអ្វីដែលជាចំណុចខ្វែងគំនិតគ្នានៅក្នុងផែនការសន្តិភាពរបស់លោកត្រាំ។
ថ្លែងប្រាប់អ្នកសារព័ត៌មានកាលពីយប់មិញ លោកត្រាំយល់ថាលោកហ្សេឡិនស្គីកំពុងរារាំងការចរចាគ្នាមិនឱ្យមានដំណើរការទៅមុខ។ លោកត្រាំថ្លែងបន្តទៀតថាលោកហាក់ដូចជាខកចិត្តខ្លះៗដែរដែលលោកហ្សេឡិនស្គីមិនទាន់ត្រៀមខ្លួនទទួលយកសំណើនោះ។ លោកថាប្រជាជនអ៊ុយក្រែនគាំទ្រសំណើនោះ ប៉ុន្តែលោកហ្សេឡិនស្គីបែរជាមិនទទួលយកទៅវិញ។
ចំពោះរុស្ស៊ី លោកត្រាំជឿជាក់ថារុស្ស៊ីមិនយល់ទាស់ទេនឹងសំណើនោះ។ ប៉ុន្តែលោកមិនច្បាស់ថាតើលោកហ្សេឡិនស្គីគាំទ្រដែរឬទេ។ បើនិយាយឱ្យជាក់ច្បាស់ទៅ លោកពូទីនពុំទាន់ប្រកាសជាសាធារណៈថាលោកយល់ព្រមទទួលយកសំណើនោះនៅឡើយទេ។ កាលពីសប្ដាហ៍មុន លោកពូទីននិយាយថាសំណើរបស់លោកត្រាំមិនអាចអនុវត្តទៅរួចឡើយ។ ប៉ុន្តែលោកគាំទ្រសំណើដើមរបស់លោកត្រាំព្រោះសំណើនោះស្របទៅតាមការចង់បានរបស់រុស្ស៊ី។
ទំនាក់ទំនងរវាងលោកត្រាំនិងលោកហ្សេឡិនស្គីមានភាពក្ដៅត្រជាក់ៗនឹងគ្នា។ លោកត្រាំយល់ថាសង្គ្រាមអ៊ុយក្រែនធ្វើឱ្យអាមេរិកចំណាយលុយខ្ជះខ្ជាយឥតប្រយោជន៍ ខណៈដែលពលរដ្ឋអាមេរិកាំងខំធ្វើការដើម្បីយកលុយបង់ពន្ធជូនរដ្ឋ។ លោកត្រាំបានជំរុញឱ្យអ៊ុយក្រែនកាត់ខ្វៀលទឹកដីរបស់ខ្លួនទៅឱ្យរុស្ស៊ីដើម្បីចរចាឆាប់ត្រូវរ៉ូវគ្នា។ លោកថាលោកមិនចង់ឃើញការបង្ហូរឈាមគ្នាតទៅទៀតទេព្រោះកងទ័ពទាំងសងខាងស្លាប់យ៉ាងរង្គាល។ នេះបើយោងតាមការផ្សាយរបស់អេភី និងប្រភពដទៃទៀត៕
ចែករំលែកព័តមាននេះ