ខេត្តបាត់ដំបង ៖ រឿងដែលហួសចិត្ត និងមិនគួរកើតមានទាល់តែសោះ ចំពោះសមត្ថកិច្ចនិងជនល្មើស ។ ក្នុងករណីនេះ លោកនាយរងប៉ុស្ដិ៍នគរបាលម្នាក់ ត្រូវជាប់ឈ្មោះជាអ្នកកាងបទល្មើសបំផ្លាញសត្វស្លាប នៅពេលលោកមេប៉ុស្ដិ៍របស់ខ្លួនដឹកនាំកម្លាំងចុះបង្ក្រាបជនប្រព្រឹត្តបទល្មើសនេះនៅពេលយប់…
ខេត្តបាត់ដំបង ៖ រឿងដែលហួសចិត្ត និងមិនគួរកើតមានទាល់តែសោះ ចំពោះសមត្ថកិច្ចនិងជនល្មើស ។ ក្នុងករណីនេះ លោកនាយរងប៉ុស្ដិ៍នគរបាលម្នាក់ ត្រូវជាប់ឈ្មោះជាអ្នកកាងបទល្មើសបំផ្លាញសត្វស្លាប នៅពេលលោកមេប៉ុស្ដិ៍របស់ខ្លួនដឹកនាំកម្លាំងចុះបង្ក្រាបជនប្រព្រឹត្តបទល្មើសនេះនៅពេលយប់ ។
សំណុំរឿងលោកនាយរងប៉ុស្ដិ៍ម្នាក់ចេញមុខកាងបទល្មើសបំផ្លាញសត្វស្លាបពេលយប់ ហើយត្រូវលោកមេប៉ុស្ដិ៍របស់ខ្លួន ដឹកនាំកម្លាំងចុះបង្ក្រាបបទល្មើសប៉ះចំខ្សែលោកនាយរងប៉ុស្ដិ៍ដោយចៃដន្យនេះ បានកើតឡើងនៅប្រហែលម៉ោងជាង៧យប់ថ្ងៃទី០៧ ធ្នូ នៅចំណុចវាលស្រែមួយកន្លែង ស្ថិតក្នុងភូមិទូលច្រនៀង ឃុំបាយដំរាំ ស្រុកបាណន់ ។
ប្រភពព័ត៌មានដ៏ជាក់លាក់បានឲ្យដឹងថា នាយរងប៉ុស្ដិ៍បាយដំរាំ លោកហ៊ាប វណ្ណា ត្រូវគេជាប់សង្ស័យថា ជាអ្នកកាងជនប្រព្រឹត្តបទល្មើសបំផ្លាញសត្វស្លាបយ៉ាងរង្គាលពេលយប់ ដែលប្រព្រឹត្តដោយជនជាតិខ្មែរអ៊ីស្លាមពីរនាក់ប្ដីប្រពន្ធ រស់នៅភូមិស្លរក្រាម ឃុំវត្តតាមិម ស្រុកសង្កែ ។
ប្ដីប្រពន្ធដែលគេមិនបង្ហាញអត្តសញ្ញាណនេះ មានអាជីពជាអ្នកដើរចាប់បំផ្លាញសត្វស្លាបគ្រប់ទិសទី តាមរយ:ការប្រើឧបករណ៍ចាក់សម្លេងសត្វយំពេលយប់ស្ងាត់ ដើម្បីទាក់ទាញហៅសត្វស្លាបគ្រប់ប្រភេទដែលរស់លើទឹក តាមស្រែ ឬតាមបឹងបួរ ឲ្យចូលអន្ទាក់ដែលគាត់ដាក់ពង្រាយពាសពេញនៅតាមគោលដៅ ។
នាយប៉ុស្ដិ៍នគរបាលបាយដំរាំ លោកមុខ សាមុត បានដឹកនាំកម្លាំងប្រជាការពារប៉ុន្មាននាក់ បានចុះទៅបង្ក្រាបបទល្មើសបំផ្លាញសត្វស្លាប ដែលប្រព្រឹត្តដោយប្ដីប្រពន្ធខ្មែរអ៊ីស្លាមខាងលើនេះ ខណ:ដែលជនពីរនាក់ប្ដីប្រពន្ធនេះកំពុងប្រើឧបករណ៍ចាក់បំពង (ខ្វក់សត្វ)
សម្លេងសត្វ និងអង្គុយចាំមើលពួកសត្វស្លាបរត់ចូលអន្ទាក់ ឬហើរមកជាប់មងដែលគាត់ដាក់ពង្រាយ ។
នៅទីតាំងចាប់សត្វ លោក មុខ សាមុត នាយប៉ុស្ដិ៍បាយដំរាំ បានសួរនាំផ្ទាល់ទៅកាន់បុរសជាប្ដីអំពីបទល្មើសប្រើឧបករណ៏បន្លឺសម្លេងអន្ទងសត្វឲ្យចូលអន្ទាក់នេះ ។ នៅក្នុងក្លិបវីដេអូដែលថតដោយអ្នកចូលរួមបង្ក្រាបគេឮបុរសនោះនិយាយប្រាប់លោកមេប៉ុស្ដិ៍ថា«ខ្ញុំបានសុំការអនុញ្ញាតពីឈ្មោះ វណ្ណា មេរងប៉ុស្ដិ៍បាយដំរាំរួចហើយ។ ហើយគាត់ជាអ្នកឲ្យខ្ញុំប្រព្រឹត្តបទល្មើសនេះ» ។ មិនតែប៉ុណ្ណោះ គេឃើញបុរសអ៊ីស្លាមនោះបានទាញទូរស័ព្ទចេញពីហោប៉ៅអាវភ្លាមៗ ហៅទៅកាន់លោកមេរងប៉ុស្ដិ៍ ហ៊ាប វណ្ណា និយាយឆ្លងឆ្លើយគ្នានៅចំពោះលោកមេប៉ុស្ដិ៍ និងកម្លាំងប្រជាការពារទៀតផង បែបទំនងខ្លាចលោកមេប៉ុស្ដិ៍មិនជឿជាក់ថា លោកមេរងប៉ុស្ដិ៍រូបនោះជាអ្នកកាងពីក្រោយខ្លួន ។
ក្រោយពីរាយការណ៍ជូនលោកមេរងប៉ុស្ដិ៍ប៉ុន្មានម៉ាត់ឲ្យបានជ្រាបថា លោកមេប៉ុស្ដិ៍ដឹកនាំកម្លាំងចុះបង្ក្រាប បុរសនោះក៏ហុចទូរស័ព្ទទៅលោកមេប៉ុស្ដិ៍ ដើម្បីនិយាយជាមួយលោកមេរងប៉ុស្ដិ៍ដែលកាងបទល្មើស ។ ប៉ុន្តែជាចុងក្រោយ លោកមេប៉ុស្ដិ៍ និងកម្លាំងប្រជាការពារបានប្រមូល និង ដកហូតយកសម្ភារ:ដែលជាវត្ថុតាងទាំងអស់ ដឹកយកទៅកាន់ប៉ុស្ដិ៍រដ្ឋបាលដើម្បីសួរនាំ ។
សម្ភារ:ដែលប្ដីប្រពន្ធនេះ បានប្រើប្រាស់គឺយកសាច់មងជាច្រើនខ្សែដាក់ពង្រាយជុំវិញតំបន់ដែលគាត់បោះទីតាំង ដាក់ឧបករណ៍បន្លឺសម្លេងសត្វយំ ដែលមានសម្លេងសត្វស្លាបផ្សេងគ្នា ដើម្បីហៅឲ្យប្រភេទសត្វទាំងនោះរត់ចូលអន្ទាក់ ឬហើរមកជាប់មងដែលគាត់ដាក់ពង្រាយពាសពេញផ្ទៃអាកាស ។
អ្នកដែលដឹងពីវិធីចាប់សត្វស្លាបពេលយប់បែបនេះ បានចាត់ទុកថា «នេះជាវិធីចាប់សត្វស្លាប ដោយមិនចាំបាច់បញ្ចេញកម្លាំង ហើយមានប្រសិទ្ធភាពបំផុត» ។ ការប្រើឧបករណ៍បន្លឺសម្លេងសត្វយំ ដែលមានសម្លេងផ្សេងគ្នានេះ ភាគច្រើនគេប្រព្រឹត្តនៅពេលយប់ នៅតាមទីទួល ឬតាមវាលស្រែ ជាពិសេស ក្នុងរដូវច្រូតកាត់នេះតែម្ដង ។
ប្រភពដដែលបានបញ្ជាក់ថា ការប្រើប្រាសសាច់មងដាក់ពង្រាយលើអាកាសដូចប្ដីប្រពន្ធខ្មែរអ៊ីស្លាមប្រព្រឹត្តខាងលើ មានប្រយោជន៍០២យ៉ាង ទី១-សម្រាប់ចាប់សត្វស្លាបនានានៅពេលយប់ នៅពេលដែលវាហោះហើរមករកប្រភពនៃសម្លេងសត្វយំដែលបន្លឺដោយឧប
ករណ៍ និងទី២-សាច់មងនេះ អាចស្ទាក់ចាប់បានសត្វស្លាបគ្រប់ប្រភេទដែលហោះហើរពេលថ្ងៃ។ ដូចជាសត្វកុក សត្វចាប សត្វលលក ។ល។ និង។ល។ នេះជាវិធីចាប់សត្វស្លាបបែបទំនើប និងយ៉ាងរង្គាលដែលអាចបំផ្លាញសត្វស្លាបឲ្យផុតពូជបានទៅអនាគត ។
ពាក់ព័ន្ធកិច្ចប្រតិបត្តិការបង្ក្រាបអ្នកចាប់សត្វពេលយប់ ដែលមានលោក ហ៊ាន វណ្ណា មេរងប៉ុស្ដិ៍បាយដំរាំចាំកាងពីក្រោយខ្នងជនប្រព្រឹត្តយ៉ាងច្បាស់ក្រឡែតនេះ តាមរយ:ទូរស័ព្ទលោក ហេង បារាំង អធិការស្រុកបាណន់ ហាក់រារែកខ្លាំងក្នុងការបំភ្លឺរឿងនេះ ។ នៅពេលដល់សាច់រឿងពាក់ព័ន្ធនឹងលោកមេរងប៉ុស្តិ៍ខាងលើ កាងបទល្មើស លោកអធិការធ្វើជាស្ដាប់មិនឮ ឆ្លើយរអាក់រអួល តែចុងក្រោយឮសម្លេងច្បាស់ចែសនៅលោកឆ្លើយថា «ខ្ញុំកំពុងជាប់ប្រជុំ ហើយក៏ចុចផ្ដាច់ទៅ» ។
ជុំវិញវត្ថុតាងដែលដកហូតបានពីប្ដីប្រពន្ធប្រព្រឹត្តបទល្មើស បើតាមប្រភពព័ត៌មានថា សមត្ថកិច្ចដកហូតវត្ថុតាងមានដូចជា ឧបករណ៍បំពងសម្លេង សម្រាប់ចាក់សម្លេងសត្វសាច់មងចំនួន១៥ខ្សែ ដែលមួយខ្សែៗមានប្រវែង១៥ម៉ែត្រ ។ ប្រភពដដែលបានបញ្ជាក់ថា ទាំងវត្ថុតាង ទាំងជនប្រព្រឹត្តពីរនាក់ប្ដីប្រពន្ធត្រូវបាននាំទៅកាន់ប៉ុស្ដ៍បាយដំរាំ ដើម្បីសួរនាំ ។
ប៉ុន្តែចុងក្រោយ ប្ដីប្រពន្ធនោះ ត្រូវបានធានាដោយលោកមេរងប៉ុស្តិ៍ ឈ្មោះ វណ្ណា ដដែល ហើយពាក់ព័ន្ធផ្លូវច្បាប់លោកមេប៉ុស្ដិ៍បានត្រឹមបង្គាប់ឲ្យធ្វើកិច្ចសន្យាបញ្ឈប់សកម្មភាពប្រព្រឹត្តបទល្មើសបំផ្លាញសត្វ និងបានដកហូតយកវត្ថុតាង ហើយអនុញ្ញាតឲ្យប្ដីប្រពន្ធត្រឡប់ទៅផ្ទះវិញទាំងយប់ដោយរលូន ក្រោយកិច្ចធានាផ្ទាល់ពីលោកមេរងប៉ុស្ដិ៍បាយដំរាំ ៕
ព័ត៌មាននេះនឹងមានផ្សាយជូននៅលើកាសែតកោះសន្តិភាពបន្តទៀត ។
ចែករំលែកព័តមាននេះ