ខេត្តស្វាយរៀង ៖ កម្លាំងសមត្ថកិច្ចនគរបាលស្រុកស្វាយជ្រំ បានកោះហៅក្រុមក្មេងទំនើង០៦នាក់ មកធ្វើកិច្ចសន្យាអប់រំ ពាក់ព័ន្ធករណីបង្ហោះម៉ូតូតាមទីសាធារណៈនៅស្រុកស្វាយជ្រំ។
បើតាមមន្ត្រីនគរបាលស្រុកស្វាយជ្រំបានឲ្យដឹងថានៅថ្ងៃទី៥ខែធ្នូឆ្នាំ២០២៥ កម្លាំងជំនាញនៃអធិការដ្ឋាននគរបាលស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលស្វាយជ្រំ និងប៉ុស្តិ៍នគរបាលរដ្ឋបាលតាសួស បានកោះហៅក្រុមក្មេងទំនើងចំនួន០៦នាក់ ដែលបានប្រព្រឹត្តករណីបង្ហោះម៉ូតូតាមទីសាធារណៈ នៅចំណុចលើផ្លូវលំ ស្ថិតនៅភូមិថ្មស ឃុំស្វាយជ្រំ ស្រុកស្វាយជ្រំត្រូវបានប្រជាពលរដ្ឋថតបង្ហោះតាមបណ្តាញសង្គម យកមកអប់រំនិងធ្វើកិច្ចសន្យា។
នៅចំពោះមុខសមត្ថកិច្ច ក្រុមក្មេងទំនើងទាំង០៦នាក់ បានឆ្លើយសារភាពថា កាលពីថ្ងៃទី១ខែធ្នូ ឆ្នាំ២០២៥ វេលាម៉ោង៩និង៣៥នាទីព្រឹក បក្ខពួកខ្លួនបាននាំគ្នាជិះម៉ូតូចេញពីសាលាឌុបគ្នាទៅដល់ចំណុចលើផ្លូវលំភូមិថ្មស ឃុំស្វាយជ្រំ ស្រុកស្វាយជ្រំ បាននាំគ្នាជិះម៉ូតូបង្ហោះលើដងផ្លូវ ចំនួន០២លើកពិតប្រាកដមែន។
ប្រភពបន្តថា ដោយមានការឯកភាពពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត និងព្រះរាជាអាជ្ញា នៃអយ្យការអមសាលាដំបូងខេត្តស្វាយរៀង ក្រុមក្មេងទំនើងទាំង០៦នាក់ត្រូវបានកោះហៅមកអធិការដ្ឋាននគបាលស្រុកស្វាយជ្រំដើម្បីធ្វើកិច្ចសន្យាអប់រំ និងអញ្ជើញអាណាព្យាបាលមកទទួលយកទៅអប់រំបន្តចំណែកឯម៉ូតូទាំង០៣គ្រឿង ត្រូវបានដកហូតយកមករក្សាទុកនៅអធិការដ្ឋាននគរបាលស្រុកស្វាយជ្រំរយៈពេល០៣ខែទើបប្រគល់ឲ្យវិញ ៕
ចែករំលែកព័តមាននេះ