រាជធានីភ្នំពេញ៖ មន្ត្រីជាន់ខ្ពស់នៃក្រសួងអប់រំ បានចាត់ទុក ការងារស្ម័គ្រចិត្ត គឺជា “ថ្នាក់រៀនក្រៅជញ្ជាំង” ដែលបំពាក់ឱ្យយុវជននូវជំនាញ និងស្មារតីដើម្បីក្លាយជាអ្នកដឹកនាំនាពេលអនាគត។ យោងតាមការផ្សាយរបស់ក្រសួងអប់រំ យុវជន…
រាជធានីភ្នំពេញ៖ មន្ត្រីជាន់ខ្ពស់នៃក្រសួងអប់រំ បានចាត់ទុក ការងារស្ម័គ្រចិត្ត គឺជា “ថ្នាក់រៀនក្រៅជញ្ជាំង” ដែលបំពាក់ឱ្យយុវជននូវជំនាញ និងស្មារតីដើម្បីក្លាយជាអ្នកដឹកនាំនាពេលអនាគត។
យោងតាមការផ្សាយរបស់ក្រសួងអប់រំ យុវជន និងកីឡា នៅថ្ងៃទី០៣ ខែធ្នូ ឆ្នាំ២០២៥ បានឱ្យដឹងថាក្រសួង បានរៀបចំពិធីបើកការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រថ្នាក់ជាតិ នៃកម្មវិធី «ការស្ម័គ្រចិត្តដើម្បីសហគមន៍ខ្ញុំ» (ស.ស.ខ.) ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា។
ក្នុងឱកាសនេះ ឯកឧត្តម សេរី ជំនះ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន បានសង្កត់ធ្ងន់ថា ការងារស្ម័គ្រចិត្ត គឺជា “ថ្នាក់រៀនក្រៅជញ្ជាំង” ដែលបំពាក់ឱ្យយុវជននូវជំនាញ និងស្មារតីដើម្បីក្លាយជាអ្នកដឹកនាំនាពេលអនាគត។ រាល់ការរួមចំណែកស្ម័គ្រចិត្ត ទោះតូចក្ដីធំក្ដី គឺសុទ្ធតែមានឥទ្ធិពលដល់ការកសាងសហគមន៍ឱ្យកាន់តែរឹងមាំ។
ឯកឧត្តមរដ្ឋលេខាធិការ បានគូសបញ្ជាក់ដែរថា កម្មវិធី ស.ស.ខ. មិនត្រឹមតែពង្រឹងសមត្ថភាពបំណិនទន់ ជំនាញបច្ចេកទេស និងបច្ចេកវិទ្យាដល់យុវជនប៉ុណ្ណោះទេ តែថែមទាំងរួមចំណែកដ៏ធំធេងក្នុងការអភិវឌ្ឍសហគមន៍មូលដ្ឋាន និងការសម្រេចបាននូវចក្ខុវិស័យកម្ពុជាជាប្រទេសចំណូលខ្ពស់នៅឆ្នាំ២០៥០។
បើតាមក្រសួង, ពិធីរយៈពេល ៣ ថ្ងៃនេះ ដែលមានគោលបំណងអបអរសាទរ ទិវាអន្តរជាតិអ្នកស្ម័គ្រចិត្ត ៥ ធ្នូ នេះ បានប្រមូលផ្តុំថ្នាក់ដឹកនាំ មន្ត្រី ដៃគូអង្គការ និងប្រតិភូយុវជនជើងខ្លាំងជាង ៤០០ នាក់ មកពី ២៥ រាជធានី-ខេត្ត។
កម្មវិធីនេះបានប្រារព្ធឡើងក្រោមប្រធានបទដ៏សំខាន់គឺ ស្មារតីស្ម័គ្រចិត្ត៖ យើងរួមគ្នាកសាងសង្គមឌីជីថល ដែលមានការទទួលខុសត្រូវ និងសាមគ្គីភាព៕
ចែករំលែកព័តមាននេះ