ខេត្តរតនគិរី ៖ លោកឧត្តមសេនីយ៍ទោ អ៊ុង សុភាព ដាក់ចេញនូវបទបញ្ជាយ៉ាងម៉ឹងម៉ាត់ ដល់កងកម្លាំងនគរបាល ត្រូវល្បាតពិនិត្យក្នុងភូមិសាស្ត្រជាប់ជាប្រចាំ ដើម្បីរក្សាពង្រឹងសន្តិសុខ សុវត្ថិភាព…
ខេត្តរតនគិរី ៖ លោកឧត្តមសេនីយ៍ទោ អ៊ុង សុភាព ដាក់ចេញនូវបទបញ្ជាយ៉ាងម៉ឹងម៉ាត់ ដល់កងកម្លាំងនគរបាល ត្រូវល្បាតពិនិត្យក្នុងភូមិសាស្ត្រជាប់ជាប្រចាំ ដើម្បីរក្សាពង្រឹងសន្តិសុខ សុវត្ថិភាព សណ្តាប់ធ្នាប់សាធារណៈ ជាពិសេស គឺបង្កាទប់ស្កាត់ និងបង្ក្រាបក្មេងទំនើ.ងនៅក្នុងភូមិសាស្ត្រខេត្តរតនគិរី ។ នេះបើយោងតាមផេក អគ្គស្នងការដ្ឋាននគរបាលជាតិ បានប្រកាសនាយប់ថ្ងៃទី៣០ ខែវិច្ឆិកា ឆ្នាំ២០២៥ ។
អគ្គស្នងការដ្ឋាននគរបាលជាតិ បានបញ្ជាក់ថា ៖ ដោយអនុវត្តតាមប្រសាសន៍ដឹកនាំ របស់ប្រមុខរាជរដ្ឋាភិបាល គោលការណ៍របស់ថ្នាក់ដឹកនាំក្រសួងមហាផ្ទៃ និងបញ្ជាដឹកនាំរបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ អ៊ុង សុភាព ស្នងការនគរបាលខេត្តរតនគិរី បានដាក់ចេញនូវបទបញ្ជា និងវិធានការម៉ឹងម៉ាត់ដល់កងកម្លាំងនគរបាលអន្តរាគមន៍ កងកម្លាំងនគរបាលជំនាញព្រហ្មទណ្ឌ និងកម្លាំងនគរបាលនៃអធិការដ្ឋាននគរបាលទាំង ៩ក្រុង-ស្រុក ដើម្បីរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម នៅគ្រប់គោលដៅក្នុងភូមិសាស្ត្រខេត្តរតនគិរីទាំងមូល ជាពិសេស គឺត្រូវទប់ស្កាត់ និងបង្ក្រាបអោយបានដាច់ខាត ក្រុមក្មេងទំនើ.ងដែលអាចបង្កបញ្ហាផ្សេងៗធ្វើអោយប៉ះពាល់ដល់សណ្តាប់ធ្នាប់សាធារណៈ សន្តិសុខ ជាពិសេស សុវត្ថិភាពភ្ញៀវទេសចរ វិនិយោគិន និងពលរដ្ឋទូទៅជាដើម រួមទាំងរាល់សកម្មភាពបំផ្លិចបំផ្លាញទ្រព្យសម្បត្តិសារធារណៈ បង្កចលាចលសង្គមធ្វើអោយបាត់បង់សណ្តាប់ធ្នាប់ និងរំខានដល់ការរស់នៅរបស់ប្រជាពលរដ្ឋ ។
ក្នុងនោះលោកស្នងការ ក៏បានអំពាវនាវដល់បងប្អូនប្រជាពលរដ្ឋ សូមជួយសហការផ្តល់ព័ត៌មានដល់សមត្ថកិច្ច នៅពេលដែលមានបទល្មើស ពិសេសបង្ករដោយក្រុមក្មេងទំនើ.ង ដើម្បីសមត្ថកិច្ចមានមូលដ្ឋានបង្ក្រាបបានទាន់ពេលវេលា និងទទួលបានប្រសិទ្ធភាពខ្ពស់ ៕
ចែករំលែកព័តមាននេះ