ទីក្រុងស្តុកតុន៖ មានហេតុការណ៍បាញ់ប្រហារដ៏សាហាវមួយកើតឡើងនៅទីក្រុងស្តុកតុន រដ្ឋកាលីហ្វ័រញ៉ា ប្រទេសអាមេរិកបណ្ដាលឱ្យមនុស្សយ៉ាងតិច៤នាក់ស្លាប់។ អ្នកដែលរងការបាញ់ប្រហារមានចំនួនសរុប១៤នាក់។ នៅពេលនោះមានកម្មវិធីជួបជុំគ្នាជាមហាគ្រួសារតែមួយ។ ហេតុការណ៍នេះកើតឡើងនៅឯពិធីខួបកំណើតដែលគេរៀបចំដើម្បីរំលឹកខួបរបស់កុមារតូចម្នាក់។ នេះបើយោងតាមការអះអាងរបស់ចៅហ្វាយក្រុងរងទីក្រុងស្តុកតុន លោកចេសុនលី (Jason Lee) នៅលើទំព័រហ្វេសប៊ុក។
អភិបាលរងរូបនេះថ្លែងបន្តទៀតថាលោកកំពុងតែភ្ជាប់ទំនាក់ទំនងទៅបុគ្គលិក និងមន្ត្រីការពារសុវត្ថិភាពសាធារណៈដើម្បីសិក្សាស្វែងយល់ថាតើមានអ្វីកើតឡើង។ នគរបាលប្រាប់ថាមុនម៉ោង៦ល្ងាច ពួកគេទទួលការហៅទូរស័ព្ទថាមានករណីបាញ់ប្រហារ។ អធិការនគរបាលប្រចាំតំបន់កើតហេតុបង្ហោះសារនៅលើបណ្ដាញអ៊ិចថា «យើងអាចបញ្ជាក់បានថាមនុស្សប្រហែល១៤នាក់រងការបាញ់ប្រហារដោយគ្រាប់កាំភ្លើង។ ក្នុងនោះ ៤នាក់ត្រូវគេបញ្ជាក់ថាបានស្លាប់ហើយ»។
លោកថ្លែងបន្តទៀតថាសំណុំរឿងនេះកំពុងស្ថិតនៅក្នុងការស៊ើបអង្កេតយ៉ាងសកម្ម។ ព័ត៌មានដែលទទួលបាននៅពេលនេះមានចំនួនតិចតួចស្ដួចស្ដើង។ តម្រុយពីដំបូងដៃបង្ហាញថាទំនងជាការត្រៀមទុកជាមុនថានឹងបាញ់ប្រហារនរណាខ្លះ។ ក្រុមអ្នកស៊ើបអង្កេតកំពុងពិនិត្យមើលគ្រប់សេណារីយោដែលអាចនឹងកើតមាន។ រហូតមកដល់ពេលនេះ អាជ្ញាធរមិនបានបង្ហាញលម្អិតអំពីភិនភាគរបស់ជនដៃដល់នៅឡើយទេ។
ខុទ្ទកាល័យរបស់អភិបាលរដ្ឋកាលីហ្វ័រញ៉ាបានចេញសេចក្ដីថ្លែងការណ៍នៅលើបណ្ដាញអ៊ិចថាការិយាល័យផ្នែកសេវាសង្គ្រោះកំពុងតាមដានព្រឹត្តិការណ៍នេះជាមួយមន្ត្រីអនុវត្តច្បាប់។ នគរបាលប្រាប់ថាជនរងគ្រោះទាំងនោះមានមនុស្សពេញវ័យមួយចំនួន និងកុមារតូចម្នាក់។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ