ព្រោះតែការស្រលាញ់ និងចង់ថែរក្សាកេរ្តិ៍ដំណែល លោកតា អ៊ុំ រឿន វ័យ៧៤ឆ្នាំ នៅតែបន្តមុខរបរធ្វើទូកបាយ
ខេត្តព្រៃវែង ៖ ទូកបាយ ជាប្រភេទ ទូកអុំម្យ៉ាង ដែលមានចំណុះ១២នាក់ ទៅ២២នាក់ និងមានប្រវែង ១២ម៉ែត្រ ទៅ១៧ម៉ែត្រ…
ខេត្តព្រៃវែង ៖ ទូកបាយ ជាប្រភេទ ទូកអុំម្យ៉ាង ដែលមានចំណុះ១២នាក់ ទៅ២២នាក់ និងមានប្រវែង ១២ម៉ែត្រ ទៅ១៧ម៉ែត្រ ដែលជាស្នាដៃកេរ្តិ៍ដំណែលតាំងពីដូនតា បន្សល់ទុកអោយកូន ចៅជំនាន់ក្រោយ រហូតដល់សព្វថ្ងៃ។ បច្ចុប្បន្ននេះ ទូកបាយ មិនសូវមានអ្នកធ្វើ ឬអ្នកប្រើច្រើនទេ ដោយភាគច្រើន គេនិយមប្រើតែទូកស្មាច់ ។
លោកតា អ៊ុំ រឿន អាយុ៧៤ឆ្នាំ រស់នៅភូមិត្នោត ឃុំកំពង់ឫស្សី ស្រុកពោធិ៍រៀង ខេត្តព្រៃវែង ដែលជាជាងទូកបាយ បានអោយដឹងថា គាត់ប្រកបមុខរបរមួយនេះ អស់រយៈពេល៩ឆ្នាំមកហើយ គឺចាប់តាំងពីឆ្នាំ២០១៦មកម្ល៉េះ។ គាត់បន្តទៀតថា គាត់ចេះធ្វើទូកបាយនេះ គឺចេះ តពីឪពុករបស់គាត់ ហើយរាល់ថ្ងៃនេះ គាត់ក៏បានបង្រៀនកូនរបស់គាត់ចេះបន្តដែរ ដើម្បីចូលរួមថែរក្សាស្នាដៃ ដែលជាកេរ្តិ៍ដំណែល ដ៏អស្ចារ្យរបស់ដូនតាយើង ។
លោកតា អ៊ុំ រឿន បានបញ្ជាក់ថា ទូកបាយ មួយគ្រឿង គាត់លក់បានតំលៃចាប់ពី៣,០០០ដុល្លារអាមេរិក ទៅ៣,៥០០ដុល្លារអាមេរិក ទៅតាមប្រភេទទូកវែង ឬខ្លី ដោយប្រើរយៈពេលធ្វើជាងមួយខែទើបរួច ព្រោះភាគច្រើនគាត់ធ្វើតែម្នាក់ឯង ដោយសារកូនរបស់គាត់មានការរវល់ច្រើន មិនសូវបានជួយធ្វើ តែបើសិនជាមានអ្នកជួយ គឺអាចធ្វើលឿនជាងនេះទៅទៀត។ បើចំពោះឈើ ដែលយកមកធ្វើទូក គឺគេតែងតែយកដើមគគី មកធ្វើ ព្រោះដើមគគី ធន់នឹងទឹក ដូចពាក្យចាស់បុរាណពោលថា «គគីនឹងទឹក ផ្ចឹកនឹងដី» ។
ទន្ទឹមនឹងនោះ លោកតា អ៊ុំ រឿន ក៏បានលើកឡើងបន្ថែមទៀតថា ចំពោះទូករបស់គាត់កន្លងមក បើយកទៅប្រណាំងក្នុងកម្មវិធីថ្នាក់ជាតិ គឺមិនសូវបានលទ្ធផលល្អទេ តែបើយកទៅប្រណាំងបែបដាក់លុយ គឺដឹងតែឈ្នះបានលុយហើយ ព្រោះទូកដែលគាត់ធ្វើមួយៗ គឺសុទ្ធតែមានល្បឿនលឿន ។
ជាចុងក្រោយ លោកតា អ៊ុំ រឿន សំណូមពរដល់បងប្អូនប្រជាពលរដ្ឋខ្មែរយើងទាំងអស់ មិនថា អ្នករស់នៅក្នុងស្រុក ឬក្រៅស្រុកនោះទេ គឺសុំអោយចូលរួមគាំទ្រ និងថែរក្សាស្នាដៃដ៏ល្អមួយនេះទុក បន្តដល់ក្មេងជំនាន់ក្រោយផង ព្រោះគាត់គិតថាតទៅមុខទៀត បើយើងទាំងអស់គ្នាមិនចូលរួមគាំទ្រ និងថែរក្សាទេនោះ ស្នាដៃមួយនេះ អាចនិងបាត់បង់ ហើយក្មេងៗជំនាន់ក្រោយនឹងលែងបានស្គាល់ ៕
ចែករំលែកព័តមាននេះ