រាជធានីភ្នំពេញ ៖ គំនរផេះផង់នៃសិប្បកម្មធ្វើទ្វារ បង្អួច តុ ទូ ដែលត្រូវភ្លើងឆេះកាលពីយប់ សមត្ថកិច្ចនៅតែបន្តបាញ់ពន្លត់ ខណៈពេលដែលភ្លើងបានបន្តឆេះហុយនៅឡើយ ។…
រាជធានីភ្នំពេញ ៖ គំនរផេះផង់នៃសិប្បកម្មធ្វើទ្វារ បង្អួច តុ ទូ ដែលត្រូវភ្លើងឆេះកាលពីយប់ សមត្ថកិច្ចនៅតែបន្តបាញ់ពន្លត់ ខណៈពេលដែលភ្លើងបានបន្តឆេះហុយនៅឡើយ ។
តាមព័ត៌មានឱ្យដឹងថា នៅវេលាម៉ោង១២ថ្ងៃត្រង់ទី២៨ ខែវិច្ឆិកា ឆ្នាំ២០២៥ នេះ នគរបាលការិយាល័យបង្ការពន្លត់អគ្គិភ័យ និងសង្គ្រោះនៃស្នងការបានរាជធានីភ្នំពេញនៅតែបន្តបាញ់ពន្លត់ ព្រោះភ្លើងនៅតែបន្តឆេះហុយនៅឡើយ ។
គួរបញ្ជាក់ថា ទីតាំងសិប្បកម្មធ្វើ តុ ទូ ទ្វារ បង្អួច និងលក់គ្រឿងសង្ហារឹម ស្ថិតនៅតំបន់ត្រឡោកបែកតាមផ្លូវ៥៩៨ ភូមិទំនប់ សង្កាត់ភ្នំពេញថី្ម ខណ្ឌសែនសុខ រាជធានីភ្នំពេញត្រូវបានអគ្គិភ័យឆាបឆេះយ៉ាងសន្ធោសន្ធៅ នៅវេលាម៉ោង១១ និង៥០នាទីថ្ងៃទី២៧ ខែវិចិ្ឆកា ឆ្នាំ២០២៥ ។ នៅក្នុងហេតុការណ៍នោះដែរ ភ្លើងបានឆាបឆេះរាលដាលរហូតដល់ទីតាំងលក់គ្រឿងសង្ហារឹមនៅជាប់ៗគ្នាចំនួន៥កន្លែងទៀត និងផ្ទះចំនួន៣ខ្នង សរុបទាំងអស់៩ខ្នងបានរងការខូចខាតទាំងស្រុង ។
តាមនគរបាលការិយាល័យបង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញ បានឲ្យដឹងថា ទីតាំងលក់គ្រឿងសង្ហារឹមដែលជាដើមភ្លើងជាសំណង់ធ្វើពីឈើ ប្រក់ស័ង្កសីទំហំ០៥ម៉ែត្រ គុណ២០ម៉ែត្រ ដែលមានម្ចាស់ឈ្មោះហួច សៀងហៃ ភេទស្រី អាយុ៥៨ឆ្នាំ ជនជាតិខ្មែរ មុខរបរលក់គ្រឿងសង្ហារឹម ។ អគ្គិភ័យពុំបណ្ដាឱ្យមនុស្សរងគ្រោះថ្នាក់ឡើយ។
ទាក់ទិននឹងមូលហេតុ សមត្ថកិច្ចកំពុងតែធ្វើការស្រាវជ្រាវ ។ តាមនគរបាលបានអោយដឹងទៀតថា នៅក្នុងហេតុការណ៍អគ្គិភ័យនោះដែរ រថយន្តពន្លត់អគ្គិភ័យចំនួន៣០គ្រឿងបានទៅអន្តរាគមន៍បាញ់ពន្លត់ ។ នៅក្នុងនោះ រថយន្តពន្លត់អគ្គិភ័យរបស់ស្នងការនគបាលរាជធានីចំនួន១៩គ្រឿង ប្រើប្រាស់ទឹកអស់ចំនួន៧៦ឡាន ស្មើនឹង៣០៤ម៉ែត្រគូប, រថយន្តអគ្គិភ័យទីក្រុងជ្រោយចង្វារចំនួន០៤គ្រឿង ប្រើប្រាស់ទឹកអស់ចំនួន០៨ឡាន ស្មើនឹង៣២ម៉ែត្រគូប, រថយន្តអគ្គិភ័យទីក្រុងកោះពេជ្រ ចំនួន០៣គ្រឿង ប្រើប្រាស់ទឹកអស់ចំនួន០៦ឡាន ស្មើនឹង២៦ម៉ែត្រគូប, រថយន្តអគ្គិភ័យកោះនរាចំនួន០១គ្រឿង ប្រើប្រាស់ទឹកអស់ចំនួន០២ឡាន ស្មើនឹង០៨ម៉ែត្រគូប, រថយន្តអគ្គិភ័យក្រុមហ៊ុនស្រាបៀរកម្ពុជាចំនួន០១គ្រឿង ប្រើប្រាស់ទឹកអស់ចំនួន០២ឡាន ស្មើនឹង១២ម៉ែត្រគូប និងរថយន្តអគ្គិភ័យបុរីប៉េងហួតចំនួន០២គ្រឿង ប្រើប្រាស់ទឹកអស់ចំនួន០៤ឡាន ស្មើនឹង១៦ម៉ែត្រគូប ហើយភ្លើងបានរលត់នៅវេលាម៉ោង១និង៥០នាទីរំលងអធ្រាត្រចូលថ្ងៃទី២៨ វិច្ឆិកា ។
ទោះបីជាយ៉ាងណា ដោយសារតែកំទេចរណារភ្លើងបានឆាបឆេះឡើងវិញនៅពេលព្រឹក ហើយសមត្ថកិច្ចបានបន្តបាញ់រហូតដល់វេលាថ្ងៃត្រង់ថ្ងៃទី២៨ ខែវិច្ឆិកា ដដែលនេះ ៕
ចែករំលែកព័តមាននេះ