ខេត្តកំពង់ស្ពឺ៖ យុវជនម្នាក់បានបង្កហិង្សាដោយចេតនាទៅលើយុវសិស្សចំនួន០៣ដង ម្តាយយុវសិស្សរងគ្រោះទ្រាំលែងបានក៏ដាក់ពាក្យបណ្តឹងដើម្បីឱ្យសមត្ថកិច្ចជួយអន្តរាគមន៍ឈានទៅដល់ធ្វើការឃាត់ខ្លួនកសាងសំណុំរឿងចាត់ការតាមផ្លូវច្បាប់។
ការឃាត់ខ្លួនយុវជនបង្កហិង្សាខាងលើវេលាម៉ោង០៣និង៣០នាទីនាទីរសៀល ថ្ងៃទី២៦ ខែវិច្ឆិកា ឆ្នាំ២០២៥ នៅចំណុចវិទ្យាល័យត្រែងត្រយឹង នៅក្នុងភូមិទី៥ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបាននិយាយឱ្យដឹងថា យុវជនសង្ស័យខាងលើមានឈ្មោះ លឹម នឿនប៊ុនហេង ភេទប្រុស អាយុ១៥ឆ្នាំ រស់នៅក្នុងភូមិទី៣ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
ចំណែកយុវសិស្សរងគ្រោះមានឈ្មោះ លី គីមហុង អាយុ១៣ឆ្នាំ រៀនថ្នាក់ទី៨នៅសាលាវិទ្យាល័យត្រែងត្រយឹង រស់នៅជាមួយឪពុកម្តាយក្នុងភូមិទី៥ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបានបន្តថា នៅមុនពេលឈានទៅដល់ការឃាត់ខ្លួនយុវជនសង្ស័យបង្កហិង្សាខាងលើ គីកាលពីវេលាម៉ោង០២និង២០នាទីរសៀលថ្ងៃទី២៦ ខែវិច្ឆិកា ឆ្នាំ២០២៥ ឈ្មោះ ហេង សុភាព ភេទស្រី អាយុ៤៤ឆ្នាំ រស់នៅក្នុងភូមិទី៥ ឃុំត្រែងត្រយឹង ស្រុកភ្នំស្រួច បានប្ដឹងទៅលើឈ្មោះ លឹម នឿនប៊ុនហេង ភេទប្រុស អាយុ១៥ឆ្នាំ រស់នៅភូមិទី៣ ឃុំយាយម៉ៅពេជ្រនិល ពីបទ៖ហិង្សាដោយចេតនាលើកូនប្រុសរបស់ខ្លួន។
ដោយនៅវេលាម៉ោង១២និង៤០នាទីថ្ងៃត្រង់ថ្ងៃទី២៦ ខែវិច្ឆិកា ឆ្នាំ២០២៥ កូនប្រុសរបស់ខ្លួនឈ្មោះ លី គីមហុង អាយុ១៣ឆ្នាំ បានតេទូរស័ព្ទមកប្រាប់រូបខ្លួនថាមានឈ្មោះ លឹម នឿនប៊ុនហេង ភេទប្រុស អាយុ១៥ ឆ្នាំនៅភូមិទី៣ ឃុំយាយម៉ៅពេជ្រនិល ស្រុកភ្នំស្រួច បានចូលមកវាយកូនរបស់ខ្លួននៅក្នុងថ្នាក់រៀនក្នុងសាលាវិទ្យាល័យត្រែងត្រយឹង ស្ថិតនៅភូមិទី៥ ឃុំត្រែងត្រយឹង ពេលលឺដូចនេះរូបខ្លួនក៏បានជិះម៉ូតូទៅមើលកូននៅសាលារៀន ពេលទៅដល់រូបខ្លួនបានឃើញកូនប្រុសរងរបួសពកក្បាលខាងឆ្វេង ពេលវាយរួចឈ្មោះខាងលើក៏បានគេចខ្លួនបាត់។
នគរបាលស្រុកភ្នំស្រួចបានបន្តទៀតថា ក្រោយពីទទួលបានពាក្យបណ្តឹងពីម្តាយយុវសិស្សខាងលើ វេលាម៉ោង០៣និង៣០នាទីរសៀលថ្ងៃទី២៦ ខែវិច្ឆិកា ឆ្នាំ២០២៥ កម្លាំងប៉ុស្ដិ៍នគរបាលរដ្ឋបាលត្រែងត្រយឹងបានទៅហៅឈ្មោះខាងលើនៅចំណុចភូមិទី៣ ឃុំយាយម៉ៅពេជ្រនិល មកសួរនាំ យុវជនសង្ស័យបានឆ្លើយសារភាពថារូបខ្លួនពិតជាបានចូលទៅវាយ យុវសិស្សជាជនរងគ្រោះដល់ក្នុងថ្នាក់រៀនពិតប្រាកដមែន។ មូលហេតុដែលឈានទៅដល់វាយ(បង្កហិង្សា)នោះដោយសារតែខ្លួនខឹង យុវសិស្សជនរងគ្រោះជេប្រមាថម្ដាយរបស់ខ្លួន។
នគរបាលស្រុកភ្នំស្រួចបានបញ្ជាក់ថាកន្លងទៅ៖ ឈ្មោះ លឹម នឿនប៊ុនហេង ធ្លាប់វាយកូនប្រុសរបស់ខ្លួនចំនួន០៣ដងមកហើយ÷ លើកទី១~ មិនចាំថ្ងៃ ខែ ឆ្នាំ២០២៥ នៅចំណុច ការ៉ាសសាំងសូគីម៉ិច ( មិនបានប្ដឹង )
លើកទី២~ ថ្ងៃទី១៨ ខែវិច្ឆិកា ឆ្នាំ២០២៥ នៅចំណុចរង្វង់មូលត្រែងត្រយឹង ( មិនបានប្ដឹង ) និងលើកទី៣~ ថ្ងៃ២៦ ខែវិច្ឆិកា ឆ្នាំ២០២៥ ជាក់ស្តែងទើបដាក់ពាក្យបណ្តឹងតែម្តង។
បច្ចុប្បន្នយុវជនសង្ស័យដៃដល់ខាងលើត្រូវបានឃាត់ខ្លួន និងកសាងសំណុំរឿង ចាត់ការបន្តតាមផ្លូវច្បាប់ ៕ដោយ៖អ៊ុ ណូន
ចែករំលែកព័តមាននេះ