ខេត្តប៉ៃលិន ៖ រហូតមកដល់ថ្ងៃទី២៦ ខែវិច្ឆិកា ឆ្នាំ២០២៥នេះ គេសង្កេតឃើញប្រជាកសិករម្នាក់ បានជួលកម្មករជាច្រើននាក់ ឱ្យចូលទៅប្រមូលផលដំណាំផ្លែស្វាយកែវរមៀតខៀវ នៅក្នុងចំការរបស់ខ្លួន ខណៈដែលផ្លែស្វាយ…
ខេត្តប៉ៃលិន ៖ រហូតមកដល់ថ្ងៃទី២៦ ខែវិច្ឆិកា ឆ្នាំ២០២៥នេះ គេសង្កេតឃើញប្រជាកសិករម្នាក់ បានជួលកម្មករជាច្រើននាក់ ឱ្យចូលទៅប្រមូលផលដំណាំផ្លែស្វាយកែវរមៀតខៀវ នៅក្នុងចំការរបស់ខ្លួន ខណៈដែលផ្លែស្វាយ ជាប់កុងត្រាជាមួយនឹងឈ្មួញ លក់បានក្នុងតម្លៃខ្ពស់ រីឯផ្លែស្វាយមិនត្រូវប៉ាន់ ម្ចាស់ចំការក៏លក់ឱ្យឈ្មួញទៅតាមតម្លៃការបញ្ជាទិញផងដែរ ។
បើតាមការរៀបរាប់ពីលោក ហ្វី ជាម្ចាស់ចំការស្វាយកែវរមៀត មួយកន្លែង ស្ថិតនៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានឱ្យភ្នាក់ងារយើងដឹងថា ស្ថិតនៅលើផ្ទៃដីប្រមាណ៦០ហិកតា លោកបានដាំ ដំណាំស្វាយកែវរមៀត អស់រយៈពេលជាច្រើនឆ្នាំមកហើយ ក៏បានប្រមូលផលផ្លែ បេះលក់ឱ្យឈ្មួញជាច្រើនលើក ច្រើនសារ ។
លោក បានបន្តទៀតថា ក្រោយពីបានដាក់អ័រម៉ូនបញ្ចេញផ្កាផ្លែរួចមក ក៏មានឈ្មួញធ្វើដំណើរពីខេត្តកំពង់ស្ពឺ ចូលមកកុងត្រា ដោយក្នុង១គីឡូក្រាម តម្លៃ១៧០០រៀល ដោយគេខ្ចប់ទុករហូតដល់ផ្លែស្វាយធំ ទើបនាំឈ្មួញមកប្រមូលផល ដឹកយកទៅលក់នៅឯខេត្តកំពង់ស្ពឺ តែម្តង ។
លោកបញ្ជាក់ទៀតថា ផ្លែស្វាយកែវរមៀត ដែលមិនបានខ្ចប់ ហើយមិនត្រូវប៉ាន់ ឈ្មួញហ៊ានទិញ ក្នុង១គីឡូក្រាម តម្លៃ៧០០ ទៅ១,០០០រៀល ដោយគេជួលកម្មករឱ្យបេះដាក់កញ្ឆេលើកដាក់លើរថយន្ត គឺកម្មករប្រុសៗ ទាំងប្រមូលផល និងលើកដាក់លើរថយន្ត គឺឈ្មួញឱ្យថ្លៃឈ្នួល ១ថ្ងៃចំនួន ៥០,០០០រៀល រីឯស្រីៗ ដែលគ្រាន់តែដើរបេះ និងរៀបរាក់កញ្ឆេ ទទួលបានប្រាក់កម្រៃ ៤០,០០០រៀល ។
ម្ចាស់ចំការខាងលើ បានបញ្ជាក់ទៀតថា បច្ចុប្បន្ន ទោះបីជាមានការបិទច្រកទ្វារ រវាងប្រទេសថៃ ជាមួយប្រទេសថៃ ក៏ដោយ ក៏ខាងខ្មែរយើងមិនអត់ទីផ្សារនោះទេ គឺមានខាងរោងចក្រនៅតាមបណ្តាខេត្តនានា ដូចជាខេត្តកំពង់ស្ពឺ ទទួលទិញយកទៅកែច្នៃ ធ្វើជាម្ហូបអាហារផ្សេងៗនាំទៅក្រៅប្រទេស។ ហេតុដូច្នេះហើយ ការបង្កបង្កើនផលស្វាយកែវរមៀត នៅពេលនេះ គឺមានហាងឆេងល្អ អាចឱ្យគាត់ប្រមូលផលលក់ឱ្យឈ្មួញ យកថវិកាសម្រាប់ផ្គត់ផ្គង់គ្រួសារ និងសងជំពាក់បំណុលគេថែមទៀតដែរ ៕
ចែករំលែកព័តមាននេះ