រាជធានីភ្នំពេញ៖ ធនាគារ កាណាឌីយ៉ា ដែលជាធនាគារពាណិជ្ជក្នុងស្រុកដ៏ធំបំផុតនៅកម្ពុជា បានចាប់ដៃជាមួយក្រុមហ៊ុន TADA នៅកម្ពុជា ដែលជាក្រុមហ៊ុនផ្ដល់កម្មវិធីហៅយានជំនិះតាមទូរស័ព្ទមិនគិតកម្រៃជើងសារតែមួយគត់ តាមរយៈការចុះអនុស្សរណៈនៃការយោគយល់គ្នា ក្នុងគោលបំណងជំរុញការទូទាត់ទឹកប្រាក់តាមប្រព័ន្ធឌីជីថល…
រាជធានីភ្នំពេញ៖ ធនាគារ កាណាឌីយ៉ា ដែលជាធនាគារពាណិជ្ជក្នុងស្រុកដ៏ធំបំផុតនៅកម្ពុជា បានចាប់ដៃជាមួយក្រុមហ៊ុន TADA នៅកម្ពុជា ដែលជាក្រុមហ៊ុនផ្ដល់កម្មវិធីហៅយានជំនិះតាមទូរស័ព្ទមិនគិតកម្រៃជើងសារតែមួយគត់ តាមរយៈការចុះអនុស្សរណៈនៃការយោគយល់គ្នា ក្នុងគោលបំណងជំរុញការទូទាត់ទឹកប្រាក់តាមប្រព័ន្ធឌីជីថល ពង្រឹងបរិយាបន្នហិរញ្ញវត្ថុ លើកកម្ពស់ការប្រើប្រាស់យានយន្តអគ្គិសនី (EV) និងបង្កើនសុវត្ថិភាពសម្រាប់សហគមន៍អ្នកបើកបរនៅកម្ពុជា ។
កិច្ចសហការនេះ ជាជំហានដ៏សំខាន់មួយ ឆ្ពោះទៅរកការពង្រឹងប្រព័ន្ធអេកូក្នុងមធ្យោបាយធ្វើដំណើរនៅកម្ពុជា តាមរយៈការផ្ដល់នូវការប្រើប្រាស់យានជំនិះអគ្គិសនី(EV)ដល់បុគ្គលិកធនាគារ កាណាឌីយ៉ា និងណែនាំការទូទាត់សាច់ប្រាក់យ៉ាងរលូនសម្រាប់អ្នកបើកបរTADA ដែលភាគច្រើនពឹងផ្អែកលើកម្មវិធីទូរស័ព្ទដឹកអ្នកដំណើរជាប្រភពចំណូលចម្បង ។
ក្រោមកិច្ចសហប្រតិបត្តិការនេះ ធនាគារ កាណាឌីយ៉ា និងក្រុមហ៊ុន TADA នឹងលើកកម្ពស់ការប្រើប្រាស់យានជំនិះអគ្គិសនី ព្រមទាំងសិក្សាស្វែងយល់ពីប្រព័ន្ធទូទាត់ប្រាក់តាម QR សម្រាប់អ្នកបើកបរ ដែលធ្វើឲ្យ ការទទួលប្រាក់ពីអតិថិជនកាន់តែងាយស្រួល និង មានសុវត្ថិភាព ។ ការផ្តួចផ្តើមនេះ មិនត្រឹមតែបង្កើនប្រសិទ្ធភាព និងតម្លាភាពសម្រាប់អ្នកបើកបរប៉ុណ្ណោះទេ តែថែមទាំងរួមចំណែកគាំទ្រដល់ការសម្រេចនូវចក្ខុវិស័យរបស់រាជរដ្ឋាភិបាលកម្ពុជាចំពោះសេដ្ឋកិច្ចឌីជីថល ព្រមទាំងចូលរួមលើកកម្ពស់ចក្ខុវិស័យក្នុងការកាត់បន្ថយការបំភាយឧស្ម័នពុល ។
លោក Dominic Notario នាយកប្រតិបត្តិ នៃធនាគារ កាណាឌីយ៉ា មានប្រសាសន៍ក្នុងកម្មវិធីចុះ អនុស្សរណៈយោគយល់ថា ៖ “កិច្ចសហការនេះបញ្ជាក់ពីការប្តេជ្ញាចិត្តក្នុងការជំរុញបរិយាបន្នហិរញ្ញវត្ថុ លើកកម្ពស់ការទូទាត់តាមឌីជីថលប្រកបដោយសុវត្ថិភាព និងភាពងាយស្រួល ព្រមទាំងផ្តល់នូវកិច្ចគាំពារដែលឆ្លើយតបនឹងតម្រូវការសហគមន៍ជាក់ស្តែង ។ កិច្ចសហការនេះក៏ឆ្លុះបញ្ចាំងពីបេសកកម្មរបស់យើងខ្ញុំ ក្នុងការរួមចំណែកដោះស្រាយវិស័យហិរញ្ញវត្ថុដល់ប្រជាជនកម្ពុជាឲ្យកាន់តែងាយស្រួល។ ”
លោក ទី លឹមកុសល នាយកគ្រប់គ្រងនៃក្រុមហ៊ុន TADAនៅកម្ពុជា ក៏មានប្រសាសន៍ថា៖
“យើងខ្ញុំរួមចំណែកការប្តេជ្ញាចិត្តរបស់ធនាគារ កាណាឌីយ៉ា ក្នុងការបង្កើតប្រព័ន្ធអេកូប្រកបដោយសុវត្ថិភាព និងឆ្លាតវៃជាងមុន សម្រាប់ទាំងមធ្យោបាយធ្វើដំណើរ និងការទូទាត់សាច់ប្រាក់នៅកម្ពុជា ។ តាមរយៈការរួមបញ្ចូលគ្នានូវកិត្តិសព្ទរបស់ធនាគារ កាណាឌីយ៉ា ក្នុងវិស័យធនាគារ និង ការច្នៃប្រឌិតក្នុងការពង្រឹងប្រព័ន្ធធ្វើដំណើរប្រកបដោយនិរន្តរភាពរបស់TADA យើងប្រាកដជាអាចបង្កើតការផ្លាស់ប្តូរមួយយ៉ាងពិតប្រាកដ និងវិជ្ជមានសម្រាប់អតិថិជន អ្នកបើកបរ និងសហគមន៍។ ”
ដើម្បីអបអរកិច្ចសហការនេះ TADAផ្តល់ជូននូវការបញ្ចុះតម្លៃចំនួនបី សម្រាប់សាធារណៈជនទូទៅ បុគ្គលិកធនាគារ កាណាឌីយ៉ា និងអ្នកកាន់ប័ណ្ណឥណទានកាណាឌីយ៉ា ។ ទន្ទឹមនេះ ភាពជាដៃគូនេះបានបង្ហាញពីការយកចិត្តទុកដាក់រួមគ្នាក្នុងការជំរុញវឌ្ឍនភាពប្រកបដោយនិរន្តរភាព និងការផ្តល់នូវគុណតម្លៃពិសេសដល់សហគមន៍។
អំពីធនាគារ កាណាឌីយ៉ា
ធនាគារ កាណាឌីយ៉ា ត្រូវបានបង្កើតឡើងក្នុងឆ្នាំ ១៩៩១ និងបានធ្វើឯកជនភាវូបនីយកម្មពេញលេញនៅក្នុងឆ្នាំ ១៩៩៨ ជាធនាគារពាណិជ្ជដែលមានសេវាកម្មពេញលេញបំផុតមួយ ដែលមានជំនាញហិរញ្ញវត្ថុ និងភាពរឹងមាំឈរជើងជាងបីទសវត្សរ៍កន្លងមក។ ធនាគារ កាណាឌីយ៉ា មានជំហរដ៏រឹងមាំក្នុងទីផ្សារហិរញ្ញវត្ថុ ទាំងប្រាក់កម្ចី និងប្រាក់បញ្ញើ គាំទ្រដោយទំនាក់ទំនងយ៉ាងទូលំទូលាយ រវាងធនាគារក្នុងស្រុក និងអន្តរជាតិ។
ជាមួយនឹងសាខាចំនួន ៦៩ និងម៉ាស៊ីនឌីជីថលស្វ័យសេវាជាង ៤៣០នៅទូទាំងប្រទេស ធនាគារ កាណាឌីយ៉ា នៅតែបន្តជំរុញនវានុវត្តន៌ និងផ្តល់នូវបទពិសោធន៍ធនាគារឌីជីថលរលូននៅកម្ពុជា។ សម្រាប់ព័ត៌មានបន្ថែម សូមចូលទៅកាន់គេហទំព័រ https://www.canadiabank.com.kh ។
អំពីក្រុមហ៊ុន TADA នៅកម្ពុជា
TADA គឺជាក្រុមហ៊ុនផ្ដល់កម្មវិធីហៅយានជំនិះតាមទូរស័ព្ទក្នុងប្រព័ន្ធBlockchainដំបូងបង្អស់នៅលើពិភពលោក ដែលត្រូវបានបង្កើតឡើងនៅថ្ងៃទី ២៦ កក្កដា ២០១៨ នៅប្រទេសសិង្ហបុរី ហើយបានកំពុងបន្តមានប្រតិបត្តិការនៅក្នុងប្រទេសវៀតណាម កម្ពុជា ថៃ ហុងកុង និងសហរដ្ឋអាមេរិកផងដែរ ។ នៅកម្ពុជា ក្រុមហ៊ុន TADA បន្តពង្រីកវត្តមានរបស់ខ្លួននៅទីក្រុងធំៗ រួមមានរាជធានីភ្នំពេញ សៀមរាប ខេត្តព្រះសីហនុ កំពត កែប បាត់ដំបង បន្ទាយមានជ័យ និងប៉ោយប៉ែត ៕ អត្ថបទសហការ
ចែករំលែកព័តមាននេះ