រាជធានីភ្នំពេញ ៖ មានករណីអគ្គិភ័យបានឆាបឆេះផ្ទះមួយល្វែងយ៉ាងសន្ធោសន្ធៅ ត្រូវបានមន្ត្រីជំនាញអគ្គិភ័យអន្តរាគមន៍ មិនមានការឆេះរាលដាលទៅផ្ទះជិតខាង ។ ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៤ ខែវិច្ឆិកា ឆ្នាំ២០២៥…
រាជធានីភ្នំពេញ ៖ មានករណីអគ្គិភ័យបានឆាបឆេះផ្ទះមួយល្វែងយ៉ាងសន្ធោសន្ធៅ ត្រូវបានមន្ត្រីជំនាញអគ្គិភ័យអន្តរាគមន៍ មិនមានការឆេះរាលដាលទៅផ្ទះជិតខាង ។
ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៤ ខែវិច្ឆិកា ឆ្នាំ២០២៥ នៅផ្លូវលេខ២៧១ ភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញផ្សែង និងភ្លើងឆេះចេញពីជាន់ទី១ នៅចំណុចផ្ទះកើតហេតុ ដោយឃើញមិនស្រួល អ្នកភូមិបាននាំគ្នាស្រែកប្រាប់ម្ចាស់ផ្ទះ និងបាននាំគ្នាយកបំពង់ពន្លត់អគ្គិភ័យ ដើម្បីបាញ់ពន្លត់អគ្គិភ័យជាបឋម តែអណ្តាតភ្លើងចាប់ផ្តើមឆាបឆេះយ៉ាងរហ័សមិនអាចគ្រប់គ្រងស្ថានការណ៍ ទើបអ្នកភូមិក៏បាននាំគ្នារាយការណ៍ទៅកាន់សមត្ថកិច្ចមូលដ្ឋានដើម្បីសុំរថយន្តពន្លត់អគ្គិភ័យជួយអន្តរាគមន៍ជាបន្ទាន់ផងដែរ ។
ក្រោយទទួលដំណឹងខាងលើនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យដែលស្ថិតនៅជិតគោលដៅឆេះបំផុតទៅកាន់ទីតាំងកើតហេតុ ដើម្បីធ្វើការអន្តរាគមន៍បាញ់ពន្លត់ ។ ជាក់ស្តែងគេឃើញរថយន្តពន្លត់អគ្គិភ័យរបស់មូលដ្ឋានខណ្ឌសែនសុខ និងខណ្ឌទួលគោក បានចេញអន្តរាគមន៍យ៉ាងលឿនបំផុត ធ្វើអោយករណីខាងលើ មិនមានការរាលដាលទៅកាន់ផ្ទះដែលនៅជាប់នោះទេ ។
ករណីអគ្គិភ័យខាងលើ ត្រូវបានមន្ត្រីជំនាញគ្រប់គ្រងបានទាំងស្រុងនៅម៉ោង១០យប់ថ្ងៃខែឆ្នាំដដែល ចំណែកទ្រព្យសម្បត្តិមួយចំនួននៅក្នុងផ្ទះ ត្រូវបានភ្លើងឆេះ តែមិនបានបង្កឲ្យមនុស្សណាម្នាក់រងរបួសនោះទេ ។ ចំពោះមូលហេតុដែលបង្កអោយឆេះ ទាំងម្ចាស់ផ្ទះ និងមន្ត្រីជំនាញនៅមិនទាន់អាចបញ្ជាក់បាននៅឡើយទេ ៕
ចែករំលែកព័តមាននេះ