ទីក្រុងបាងកក៖ បណ្ដាប្រទេសមួយចំនួននៅអាស៊ីអាគ្នេយ៍កំពុងរងគ្រោះខ្លាំងដោយជំនន់ទឹកភ្លៀង និងការបាក់ដី។ នៅប្រទេសថៃភាគខាងត្បូង មនុស្សរាប់ពាន់នាក់ត្រូវជម្លៀសខ្លួន។ ទូរទស្សន៍ថៃផ្សព្វផ្សាយទិដ្ឋភាពទឹកជំនន់នៅទីក្រុងហាតយ៉ៃដែលស្ថិតនៅកៀកព្រំដែនម៉ាឡេស៊ី និងជាមជ្ឈមណ្ឌលពាណិជ្ជកម្មដ៏ធំមួយនៅខេត្តសុងខ្លា។ ទីនោះត្រូវទឹកលិចយ៉ាងធ្ងន់ធ្ងរ។ គេឃើញក្រុមការងារកំពុងស្វែងរក និងជួយសង្គ្រោះមនុស្សនៅក្នុងស្រុកមួយចំនួន។ ជារួម ប្រជាជនថៃជិត២លាននាក់រងផលប៉ះពាល់ពីគ្រោះទឹកជំនន់លើកនេះ។ នៅក្នុងខេត្តចំនួន៦នៅភាគខាងត្បូង ទឹកជំនន់បានសម្លាប់មនុស្ស៥នាក់ និងរបួស៤នាក់។
ថ្ងៃនេះ មានបទបញ្ជាឱ្យជម្លៀសមនុស្សនៅតំបន់ប្រឈមគ្រោះថ្នាក់ទាំងអស់នៅទូទាំងទីក្រុងហាតយ៉ៃបន្ទាប់ពីទឹកជំនន់ចាប់ផ្ដើមហក់ឡើងយ៉ាងគំហុកនៅពេលល្ងាច។ ទាហាន និងក្រុមអ្នកជួយសង្គ្រោះត្រូវបានដាក់ពង្រាយនៅទូទាំងទីក្រុងនេះ។ នាយករដ្ឋមន្ត្រីថៃបានចេញបញ្ជាឱ្យរដ្ឋបាលថ្នាក់ខេត្តនៃខេត្តសុងខ្លាដោះស្រាយបញ្ហាទឹកជំនន់នៅបណ្ដាខេត្តភាគខាងត្បូង។ ឧបនាយករដ្ឋមន្ត្រីថៃក៏ចេញបញ្ជាឱ្យស្ថាប័នពាក់ព័ន្ធនានាបញ្ជូនក្រុមការងារ ឧបករណ៍ និងជំនួយទៅតំបន់រងគ្រោះផងដែរ។
ក្រឡេកទៅមើលប្រទេសវៀតណាមវិញម្ដង គ្រោះទឹកជំនន់ និងការបាក់ដីនៅភាគកណ្ដាលបានសម្លាប់មនុស្សយ៉ាងតិច៩១នាក់ និងបាត់ខ្លួន១១នាក់បន្ទាប់ពីភ្លៀងធ្លាក់ខ្លាំងធ្វើឱ្យលិចចម្ការកាហ្វេជាច្រើនកន្លែង។ ខេត្តដាក់ឡាក់រងគ្រោះខ្លាំងជាងគេពីជំនន់ទឹកភ្លៀងលើកនេះ។ គ្រាន់តែខេត្តនេះមួយមានមនុស្សស្លាប់រហូតដល់៦៣នាក់ ភាគច្រើនស្លាប់នឹងលង់ទឹក។ ក្រៅពីនេះ គេក៏រកឃើញមនុស្សស្លាប់ផងដែរនៅខេត្តខាញ់ហាវ, ឡាមដុង, យ៉ាឡាយ, ទីក្រុងដាណាង, ទីក្រុងវ៉េ និងខេត្តក្វាងទ្រី។
ដោយសារដងផ្លូវនានាត្រូវកាត់ផ្ដាច់ដោយទឹកជំនន់ ដូច្នេះតំបន់ដាច់ស្រយាលជាច្រើនមិនអាចធ្វើដំណើរដោយថ្មើរជើងបានឡើយ។ អាជ្ញាធរត្រូវប្រើប្រាស់ឧទ្ធម្ភាគចក្រដើម្បីដឹកស្បៀងអាហារ និងជំនួយដទៃទៀតទៅចែកជូនជនរងគ្រោះ។ បន្ទាប់ពីភ្លៀងចាប់ផ្ដើមរាំងទៅវិញ ប្រជាជនវៀតណាមក៏ចាប់ផ្ដើមវិលត្រឡប់ទៅផ្ទះរបស់ពួកគេវិញជាបណ្ដើរៗ។ នៅពេលពួកគេទៅដល់ឃើញសុទ្ធតែសំរាមរាយប៉ាយពាសពេញផ្ទះ និងបរិវេណផ្ទះ។ ដំណាំរាប់ម៉ឺនហិចតារត្រូវខូចខាត ខណៈដែលចម្ការកាហ្វេធំៗនៅខេត្តដាក់ឡាក់ត្រូវទឹកលិចខ្ទេចខ្ទីអស់។
ទឹកជំនន់លើកនេះបានបំផ្លិចបំផ្លាញទ្រព្យសម្បត្តិគិតជាទឹកប្រាក់ប្រហែល៥រយលានដុល្លារ។ តាមការប៉ាន់ស្មានរបស់រដ្ឋាភិបាលថាការខូចខាតជាង៣រយលានដុល្លារ។ ថ្វីដ្បិតទឹកជំនន់ចាប់ផ្ដើមស្រកទៅវិញក្ដី ប៉ុន្តែក្រសួងឧតុនិយមវៀតណាមព្រមានថាភ្លៀងនឹងបន្តធ្លាក់នៅក្នុងទីតាំងមួយចំនួន។ មិនតែប៉ុណ្ណោះវិសម្ពាធត្រូពិចនឹងកើតឡើងជាថ្មីនៅសប្ដាហ៍នេះ។
នៅប្រទេសម៉ាឡេស៊ីឯណោះវិញក៏មានគ្រោះទឹកជំនន់ផងដែរនៅក្នុងរដ្ឋមួយចំនួន។ ទឹកជំនន់នេះនឹងមានសភាពកាន់តែធ្ងន់ធ្ងរដោយសារមានភ្លៀងធ្លាក់ខ្លាំងជាបន្តបន្ទាប់។ នាយកដ្ឋានសុខុមាលភាពសង្គមរាយការណ៍ថាប្រជាជនម៉ាឡេស៊ីជាង១,២៥សែននាក់នៅក្នុងរដ្ឋចំនួន៩ត្រូវជម្លៀសខ្លួនជាបន្ទាន់។ រដ្ឋកេឡាន់តាន់ (Kelantan) រងគ្រោះខ្លាំងជាងគេ។ អាជ្ញាធរបានសាងសង់ទីជម្រកបណ្ដោះអាសន្នចំនួន៨៦កន្លែងសម្រាប់ទទួលអ្នកជម្លៀសខ្លួន។ នេះបើយោងតាមប្រភពពីអេភី (AP), រ៉យទ័រ (Reuters) និងប្រភពដទៃទៀត៕
ចែករំលែកព័តមាននេះ