ទីក្រុងតូក្យូ៖ នាយករដ្ឋមន្ត្រីជប៉ុនបន្ទាប់ពីមើលឃើញថាពាក្យសម្ដីរបស់លោកស្រីធ្វើឱ្យគេចាប់អារម្មណ៍ខ្លាំងរហូតដល់មានប្រតិកម្មយ៉ាងកងរំពងពីសំណាក់ប្រទេសចិន, រហូតដល់ប៉ះពាល់ចំនួនអ្នកទេសចរចិនដែលគ្រោងធ្វើដំណើរនៅជប៉ុន និងរហូតដល់មានការលុបចោលគម្រោងជួបគ្នាថ្នាក់រដ្ឋមន្ត្រីវប្បធម៌ចិន ជប៉ុន និងកូរ៉េខាងត្បូង។ល។ នៅថ្ងៃនេះ លោកស្រីចេញមកកែសម្រួលសភាពការណ៍ដើម្បីបន្ធូរបន្ថយបរិយាកាសនយោបាយ។
លោកស្រីតាកាអ៊ីឈិបញ្ជាក់ថាជប៉ុននៅរក្សាជំហរដដែលឥតកែប្រែទេដូចអ្វីដែលលោកស្រី និងប្រធានាធិបតីចិន លោកស៊ីជីនពីង ធ្លាប់បានបញ្ជាក់ជាមួយគ្នារួចហើយកាលពីពេលជួបគ្នានៅក្នុងខែតុលា។ ជម្លោះការទូតចិន-ជប៉ុនចាប់ផ្ដើមឡើងកម្ដៅសាជាថ្មីបន្ទាប់ពីលោកស្រីតាកាអ៊ីឈិថ្លែងនៅក្នុងរដ្ឋសភាថាបើកោះតៃវ៉ាន់រងការវាយប្រហារដោយយោធាចិន ពេលនោះជប៉ុនប្រហែលជាចេញធ្វើអន្តរាគមន៍ដោយយោធា។
ថ្ងៃនេះ លោកស្រីថ្លែងប្រាប់អ្នកសារព័ត៌មានថាថ្នាក់ដឹកនាំចិនបានបញ្ជាក់ឡើងវិញនៅក្នុងទិសដៅទូលំទូលាយថាប្រទេសយើងទាំង២ ចិន និងជប៉ុន ផ្ដោតសំខាន់ទៅលើការអភិវឌ្ឍទំនាក់ទំនងដើម្បីផលប្រយោជន៍ទៅវិញទៅមកដោយផ្អែកលើផលប្រយោជន៍ក្នុងភាពជាដៃគូយុទ្ធសាស្ត្រ ហើយនិងការអភិវឌ្ឍទំនាក់ទំនងប្រកបដោយការស្ថាបនា និងប្រកបដោយស្ថិរភាព។ លោកស្រីអះអាងថាជប៉ុនមិនងាកចេញពីទិសដៅនេះទេ។
ចំពោះសំណួរថាតើស្ថានភាពបែបណាដែលជប៉ុនយល់ថាខ្លួនធ្លាក់ចូលទៅក្នុងសេណារីយោតស៊ូដើម្បីភាពរស់រានមានជីវិតរបស់ជាតិ លោកស្រីតាកាអ៊ីឈិឆ្លើយតបថារដ្ឋាភិបាលនឹងធ្វើវិនិច្ឆ័យដោយហ្មត់ចត់ដោយផ្អែកទៅលើព័ត៌មានដែលប្រមូលបានពីគ្រប់ច្រកល្ហក និងដោយផ្អែកទៅលើសភាពការណ៍ជាក់ស្ដែង។ លោកស្រីថ្លែងបន្តទៀតរដ្ឋាភិបាលជប៉ុនធ្លាប់បានផ្ដល់ការពន្យល់បកស្រាយជាហូរហែរួចមកហើយត្រង់ចំណុចនេះចាប់តាំងពីជំនាន់លោកស៊ីនហ្សូអាបេនៅកាន់អំណាច។
លោកស្រីបញ្ជាក់ជាថ្មីថាជំហររបស់រដ្ឋាភិបាលជប៉ុននៅដដែលឥតផ្លាស់ប្ដូរទេ។ កាលពីពេលកន្លងមក មន្ត្រីរដ្ឋាភិបាលជប៉ុនធ្លាប់ផ្ដល់ការពន្យល់ទៅភាគីចិនថាពាក្យសម្ដីរបស់លោកស្រីតាកាអ៊ីឈិនៅរដ្ឋសភាកាលពីថ្ងៃទី៧ ខែវិច្ឆិកានោះជារឿងផ្សេង។ រីឯគោលជំហរជាផ្លូវការរបស់ប្រទេសជប៉ុនជារឿងផ្សេង។ មានន័យថាជប៉ុននៅតែបន្តអនុវត្តគោលការណ៍ចិនតែមួយដូចដែលមានចែងនៅក្នុងសេចក្ដីថ្លែងការណ៍រួមចិន-ជប៉ុនឆ្នាំ១៩៧២។ ខាងលើនេះជាការដកស្រង់ប្រភពពីអឹនអេចខេ (NHK) និងប្រភពដទៃទៀត៕
ចែករំលែកព័តមាននេះ