ខេត្តសៀមរាប ៖ គណៈប្រតិភូអន្តរក្រសួងចុះពិនិត្យនិងវាយតម្លៃលើការងារថែទាំខួប និង ថែទាំប្រចាំដំណាក់កាលទី២ ចំនួន២គម្រោង ក្នុងភូមិសាស្ត្រខេត្តសៀមរាប នៅថ្ងៃទី១៨ ខែ វិច្ឆិកា…
ខេត្តសៀមរាប ៖ គណៈប្រតិភូអន្តរក្រសួងចុះពិនិត្យនិងវាយតម្លៃលើការងារថែទាំខួប និង ថែទាំប្រចាំដំណាក់កាលទី២ ចំនួន២គម្រោង ក្នុងភូមិសាស្ត្រខេត្តសៀមរាប នៅថ្ងៃទី១៨ ខែ វិច្ឆិកា ឆ្នាំ២០២៥ ។ គណៈប្រតិភូអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានដឹកនាំដោយឯកឧត្តម សាន វិសាល រដ្ឋលេខាធិការ និងជាសមាជិកគណៈកម្មាធិការលទ្ធកម្ម តំណាងឯកឧត្តមរដ្ឋមន្ត្រី ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានចុះត្រួតពិនិត្យ និងវាយតម្លៃលើ២គម្រោង ដោយក្រាលកៅស៊ូ DBST ក្នុងភូមិសាស្ត្រក្រុង ស្រុក ចំនួន០៨ ។
តាមការបញ្ជាក់របស់ឯកឧត្តម សាន វិសាល បានឱ្យដឹងថា គម្រោងទី១ ៖ ការងារថែទាំជាប្រចាំផ្លូវក្រាលកៅស៊ូ DBST ចំនួន១៥ខ្សែ មានប្រវែងសរុប១៧១ពាន់ ៩២០ ម៉ែត្រ ស្ថិតនៅក្នុងស្រុកជីក្រែង ,ស្រុកសូនិគម ស្រុកប្រាសាទបាគង ,ស្រុកស្រីស្នំ , ស្រុកក្រឡាញ់ ,ស្រុកពួក , ស្រុកអង្គរជុំ ,ស្រុកវ៉ារិន និងក្រុងសៀមរាប ខេត្តសៀមរាប បានធ្វើការបំពាក់ស្លាកសញ្ញាចរាចរណ៍នៅតាមដងផ្លូវចំនួន៥២២ស្លាក នៅលើផ្លូវ ០៤ខ្សែ ក្នុងគម្រោង (DRR-RM-2025-No.004) និង(DRR-RM-2025-No.010 )។
ឯកឧត្តមបានបន្តទៀតថា ក្នុងគម្រោងទី២ លើការថែទាំខួបផ្លូវមួយកំណាត់ ដោយក្រាល កៅស៊ូ DBST បន្ថែមពីលើ (Reseal DBST) មានប្រវែង៨ពាន់៧០០ម៉ែត្រ ទទឹង៥ម៉ែត្រ និងគូសគំនូសចរាចរណ៍ ទំហំ១ពាន់ ៧៤០ម៉ែត្រក្រឡា ដែលស្ថិតនៅលើផ្លូវក្នុង ឃុំខ្ចាស់ និងឃុំចាន់ស ស្រុកសូទ្រនិគម ក្នុងគម្រោង(DRR-RM-2025-No.004) ដែលអនុវត្តដោយនាយកដ្ឋានផ្លូវជនបទ ។
ក្នុងនោះដែរ ឯកឧត្តមសាន វិសាល បានកោតសរសើរក្រុមការងារមន្ទីរអភិវឌ្ឍន៍ជនបទខេត្តសៀមរាប ដែលបានបំពេញការងារបានល្អ ក្នុងការចុះត្រួតពិនិត្យរាល់ការងារដែលក្រសួងប្រគល់ ទាំងគុណភាព សោភ័ណភាព ព្រមទាំងបានណែនាំបន្ថែមដល់មន្ទីរ លើការងារបច្ចេកទេស ក្នុងការពង្រឹងការងារថែទាំផ្លូវផ្សេងទៀត និងត្រូវធ្វើអនាម័យសម្អាតស្មៅដើមឈើតូចៗ ដុះនៅអមសង្ខាងដងផ្លូវ និងត្រូវជម្រុញដល់អ្នកទទួលគម្រោងការថែទាំផ្លូវ ធ្វើការគូសគំនូសចរាចរណ៍ និងបំពាក់ស្លាកសញ្ញាចរាចរណ៍ ឱ្យបានត្រឹមត្រូវតាមបច្ចេកទេស ទៅតាមកិច្ចកុងត្រាជាមួយក្រសួងផងដែរ ។
ឯកឧត្តមបានបញ្ជាក់ថា ការថែទាំខួបផ្លូវចំនួន១៥ខ្សែ ដោយក្រាលកៅស៊ូ DBST បន្ថែមពីលើ (Reseal DBST) បានលើកកម្ពស់សោភណ្ឌភាព និងសុវត្ថិភាពតាមដងផ្លូវបានល្អស្អាត ។ ម្យ៉ាងទៀតផ្លូវទាំងនេះ បានជួយសម្រួលដល់ប្រជាពលរដ្ឋក្នុងមូលដ្ឋាន មានភាពងាយស្រួលទៅមក ក្នុងការធ្វើចរាចរណ៍ ការដឹកជញ្ជូនកសិផលរបស់ប្រជា ពលរដ្ឋទៅកាន់ទីផ្សារជួយសម្រួលដល់សិស្សានុសិស្ស ធ្វើដំណើរទៅកាន់សាលារៀន ដឹកជញ្ជូនអ្នកជម្ងឺមកកាន់មណ្ឌលសុខភាពបានទាន់ពេលវេលា ៕
ចែករំលែកព័តមាននេះ