រាជធានីភ្នំពេញ ៖ ផ្ទះធ្វើអំពីឈើប្រក់ស័ង្កសី ចំនួន៤ខ្នង ត្រូវអគ្គិភ័យឆាបឆេះរាលដាលបណ្ដាលឲ្យរងការខូចខាតទាំងស្រុង រួមជាមួយសម្ភារៈមួយចំនួនទៀត ខណៈពេលដែលប្រជាពលរដ្ឋកំពុងតែដេកលង់លក់ ។ ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០៣និង១៥នាទីទៀបភ្លឺ ថ្ងៃអាទឹត្យ…
រាជធានីភ្នំពេញ ៖ ផ្ទះធ្វើអំពីឈើប្រក់ស័ង្កសី ចំនួន៤ខ្នង ត្រូវអគ្គិភ័យឆាបឆេះរាលដាលបណ្ដាលឲ្យរងការខូចខាតទាំងស្រុង រួមជាមួយសម្ភារៈមួយចំនួនទៀត ខណៈពេលដែលប្រជាពលរដ្ឋកំពុងតែដេកលង់លក់ ។
ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០៣និង១៥នាទីទៀបភ្លឺ ថ្ងៃអាទឹត្យ ទី១៦ ខែវិចិ្ឆកា ឆ្នាំ២០២៥ ស្ថិតនៅក្បែរអតីតរង្វង់ផ្លូមូលកាំកូ ផ្លូវលំ ក្រុមទី២ ភូមិទួលគោក សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ។
តាមព័ត៌មាន បានឲ្យដឹងថា នៅមុនពេលកើតហេតុ ខណៈពេលប្រជាពលរដ្ឋកំពុងតែដេកលង់លក់ ស្រាប់តែភ្លើងបានឆាប់ឆេះចេញពីផ្ទះមួយខ្នង ទំហំ៤ម៉ែត្រ គុណ៦ម៉ែត្រ ធ្វើអំពីឈើលើថ្មក្រោម ដែលមានម្ចាស់ឈ្មោះ យឹម ផល្លា ភេទស្រី អាយុ៥៨ឆ្នាំ ជនជាតិ ខ្មែរ ហើយឆេះយ៉ាងសន្ធោសន្ធៅ រាលដាលយ៉ាងឆាប់រហ័សតែមួយពព្រិចភ្នែក ទៅដល់ផ្ទះឈឺចំនួន៣ក្នុងទៀតនៅក្បែរនោះ។ នៅក្នុងហេតុការណ៍នោះដែរ គេឃើញលោក ជិន ប៊ុនធឿន អភិបាលខណ្ឌឫស្សីកែវ ដឹកនាំចុះទៅសហការជាមួយកម្លាំងការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ផងដែរ។ ទាក់ទិនការកើតមានអគ្គិភ័យនេះ គេមានការសង្ស័យបណ្ដាលមកពីឆ្លងចរន្តអគ្គិសនី ។
មន្ត្រីនគរបាលការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា នៅក្នុងហេតុការណ៍នោះ រថយន្តពន្លត់អគ្គិភ័យចំនួន ១៧គ្រឿង ទៅអន្តរាគមន៍ ប្រើប្រាស់ទឹកអស់ ចំនួន១៧ឡាន ស្មើនឹង៧៥ម៉ែត្រគូប ហើយភ្លើងបានរលត់ទៅវិញ នៅម៉ោង០៤និង១៥នាទីទៀបភ្លឺ នាថ្ងៃខែឆាំ្នដដែល ។
នគរបាលបានឲ្យដឹងទៀតថា អគ្គិភ័យនេះ បណ្តាលអោយផ្ទះអស់ចំនួន ៤ខ្នង បានរងការខូចខាតរួមជាមួយសម្ភារៈមួយចំនួនទៀត។ នៅក្នុងនោះ ផ្ទះមួយខ្នង ដែលជាដើមភ្លើង បានរងការខូចខាតទាំងស្រុងហើយ ឆេះរាលដាទៅដល់ផ្ទះនៅក្បែរខាងអស់ចំនួន៣ខ្នងទៀត រួមសម្ភារៈប្រើប្រាស់ប្រចាំថៃ្ងអស់ទាំងស្រុង។ ចំពោះមូលហេតុ នៃការកើតមានអគ្គិភ័យនេះ សមត្ថកិច្ចកំពុងតែធ្វើការស្រាវជ្រាវ ៕
ចែករំលែកព័តមាននេះ