រាជធានីភ្នំពេញ ៖ លោក ឈាង រ៉ា រដ្ឋមន្ត្រីក្រសួងសុខាភិបាល បានប្រាប់ក្រុមគ្រូពេទ្យឲ្យយកចិត្តទុកដាក់លើការព្យាបាលជំងឺមហារីក ដោយសង្កត់ធ្ងន់ថា ការវះកាត់ជាស្នូលមួយនៃការព្យាបាលបានជាដាច់ស្រឡះពីជំងឺមហារីក ហើយក៏ជាដំណើរសង្គ្រោះជីវិតមនុស្សប្រកបដោយប្រសិទ្ធភាព…
រាជធានីភ្នំពេញ ៖ លោក ឈាង រ៉ា រដ្ឋមន្ត្រីក្រសួងសុខាភិបាល បានប្រាប់ក្រុមគ្រូពេទ្យឲ្យយកចិត្តទុកដាក់លើការព្យាបាលជំងឺមហារីក ដោយសង្កត់ធ្ងន់ថា ការវះកាត់ជាស្នូលមួយនៃការព្យាបាលបានជាដាច់ស្រឡះពីជំងឺមហារីក ហើយក៏ជាដំណើរសង្គ្រោះជីវិតមនុស្សប្រកបដោយប្រសិទ្ធភាព ។
ថ្លែងនៅក្នុងពេលបើកសន្និសីទសល្យសាស្ត្រកម្ពុជាប្រចាំឆ្នាំលើកទី៣០ ក្រោមប្រធានបទ«ភាពប្រឈមនៃការវះកាត់ជំងឺមហារីក» កាលពីថ្ងៃទី១៥ ខែវិច្ឆិកា ឆ្នាំ២០២៥ លោក ឈាង រ៉ា បានអះអាងថា រាជរដ្ឋាភិបាលបានដាក់ការបេ្តជ្ញាចិត្តយ៉ាងមុតមាំ ក្នុងការប្រយុទ្ធនឹងជំងឺមហារីក ។
លោកបានអះអាងថា វេជ្ជបណ្ឌិតនិងក្រុមគ្រូពេទ្យ យកចិត្តទុកដាក់ខ្ពស់លើសេវាផ្នែកមហារីកនេះ ប្រកបដោយឧត្តមគតិ សមធម៌ និងក្រមសីលធម៌វិជ្ជាជីវៈ ហើយក៏ត្រូវពង្រឹងឱ្យកាន់តែប្រសើរឡើងនូវហេដ្ឋារចនាសម្ព័ន្ធ បច្ចេកវិទ្យា ឧបករណ៍សម្ភារទំនើប ការបញ្ជូនចំគោលដៅ និងទាន់ពេលវេលា ការធ្វើរោគវិនិច្ឆ័យនិងព្យាបាលបានត្រឹមត្រូវ ។
លោក ឈាង រ៉ា បានបន្តទៀតថា គុណភាព និងសុវត្ថិភាព នៃការព្យាបាលក៏ត្រូវមានស្តង់ដាត្រឹមត្រូវ ហើយត្រូវពង្រីកការព្យាបាលតាមមន្ទីរពេទ្យគ្រប់កម្រិត និងពង្រឹងការបណ្តុះបណ្តាលប្រព័ន្ធការកត់ត្រាព័ត៌មាន ។
លោកបានលើកឡើងថា គ្រូពេទ្យវះកាត់ទាំងអស់ ត្រូវខិតខំរៀនសូត្រ ហ្វឹកហាត់ការងារជាប់ជាប្រចាំ និងមានសាមគ្គីភាព និងសហការគ្នា ។ លោកបានបញ្ជាក់ថា «ជោគជ័យនៃការវះកាត់ គឺលទ្ធផលចុងក្រោយ ដែលអ្នកជំងឺជាសះស្បើយតាមពេលវេលាសមស្របជាមួយសុវត្ថិភាព គុណភាពនៃជីវិតល្អប្រសើរ ។ ដូច្នេះ ត្រូវគិតគូឱ្យបានសព្វគ្រប់ទាំង មុនពេលវះកាត់ ពេលកំពុងវះកាត់ និងក្រោយពេលវះកាត់ ។
លោកបានបន្ថែមថា ការវះកាត់ដែលមានសុវត្ថិភាពខ្ពស់ និងតម្លៃសមស្រប គឺជាគោលនយោបាយមួយសំខាន់របស់WHO និងក្រសួងសុខាភិបាល និងរាជរដ្ឋាភិបាល។ សុវត្ថិភាព និងតម្លៃសមស្រប ដោយមិនមានការលំបាកផ្នែកហិរញ្ញវត្ថុ គឺជាការចូលរួមសម្រេចបាននូវផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសាកល។
ចែករំលែកព័តមាននេះ