ចិន-ជប៉ុន ៖ ប្រទេសជប៉ុន កាលពីថ្ងៃទី១៥ វិច្ឆិកា បានធ្វើការតវ៉ា បន្ទាប់ពីចិនណែនាំដល់ពលរដ្ឋខ្លួនមិនឲ្យធ្វើដំណើរមកកាន់ជប៉ុន ពេលមានភាពតានតឹង ទាក់ទិននឹងពាក្យពេចន៍របស់នាយករដ្ឋមន្ត្រីជប៉ុនស្ដីពីកោះតៃវ៉ាន់ ។…
ចិន-ជប៉ុន ៖ ប្រទេសជប៉ុន កាលពីថ្ងៃទី១៥ វិច្ឆិកា បានធ្វើការតវ៉ា បន្ទាប់ពីចិនណែនាំដល់ពលរដ្ឋខ្លួនមិនឲ្យធ្វើដំណើរមកកាន់ជប៉ុន ពេលមានភាពតានតឹង ទាក់ទិននឹងពាក្យពេចន៍របស់នាយករដ្ឋមន្ត្រីជប៉ុនស្ដីពីកោះតៃវ៉ាន់ ។
រដ្ឋាភិបាលជប៉ុនបានធ្វើការតវ៉ាហើយអ្នកនាំពាក្យរដ្ឋាភិបាលនោះ លោកមីណូរូគីហារ៉ា បានស្នើដល់ចិនឲ្យចាត់វិធានការសមស្របនានា ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានជប៉ុនក្យូដូញូវ ។ កាលពីថ្ងៃទី១៤ វិច្ឆិកា ចិនបានណែនាំដល់ពលរដ្ឋខ្លួនឲ្យផ្អាកធ្វើដំណើរមកកាន់ជប៉ុន ក្នុងពេលខាងមុខឆាប់ៗ ។
ចិនលើកឡើងពីការវាយប្រហារនាពេលមុននេះ ប្រឆាំងជនជាតិខ្លួននៅជប៉ុន ហើយចាត់ទុកពាក្យពេចន៍របស់នាយករដ្ឋមន្ត្រីជប៉ុនលោកស្រីសាណាអេតាកាអ៊ីជីស្ដីពីតៃវ៉ាន់ថា ជាពាក្យពេចន៍ខុសឆ្គងដែលតាមចិនថា ធ្វើឲ្យប៉ះពាល់ដល់បរិយាកាសនៃការផ្លាស់ប្ដូរគ្នាចិន-ជប៉ុន។
ជប៉ុនជាកន្លែងដែលអ្នកទេសចរជនជាតិចិននិយមមក ដែលជួយទ្រទ្រង់ដល់សេដ្ឋកិច្ចជប៉ុនតែជនជាតិជប៉ុនមួយចំនួននៅប្រកាន់គំនិតប្រឆាំងចិន។ ផលប៉ះពាល់នៃការព្រមានពីបំណងរបស់ជនជាតិចិនមកកាន់ជប៉ុននៅមិនច្បាស់លាស់ តែក្រុមហ៊ុនអាកាសចរណ៍ចិនជាច្រើន បានស្នើសងថ្លៃសំបុត្រយន្តហោះដែលទិញរួចហើយ បន្ទាប់ពីការប្រកាសនោះរបស់រដ្ឋាភិបាលចិន។
ទំនាក់ទំនងដែលផុយស្រួយស្រាប់រវាងជប៉ុននិងចិន នឹងអាចកាន់តែអាក្រក់ថែមទៀតក្រោមការដឹកនាំរបស់លោកស្រីតាកាអ៊ីជី ជាសកម្មជនឲ្យពង្រឹងកងកម្លាំងយោធា ដើម្បីប្រឆាំងការគំរាមកំហែងរបស់ក្រុងប៉េកាំង និងការទាមទារទឹកដី ក្នុងដែនទឹកក្បែរមហាសមុទ្រប៉ាស៊ីហ្វិកខាងលិច។
លោកស្រីតាកាអ៊ីជីដែលក្លាយជានាយករដ្ឋមន្ត្រីជប៉ុនពីខែមុនមក បានថ្លែងក្នុងសភាថា ការវាយប្រហារណាមួយរបស់ចិនប្រឆាំងតៃវ៉ាន់ អាចជាការគំរាមកំហែងខ្លាំងមួយចំពោះជប៉ុន ដែលចាំបាច់ប្រើកម្លាំងដោយកងទ័ព។ សេចក្ដីថ្លែងការណ៍នោះបណ្ដាលឲ្យចិន មានការខឹងសម្បានិងតវ៉ាយ៉ាងខ្លាំង៕
ចែករំលែកព័តមាននេះ