ខេត្តកំពង់ស្ពឺ ៖ បុរសជាកូនម្នាក់ត្រូវបានកម្លាំងនគរបាលស្រុកគងពិសីធ្វើការឃាត់ខ្លួនភ្លាមៗ បន្ទាប់ពីដុតផ្ទះម្តាយ និងផ្ទះប្អូនស្រីបង្កើតរបស់ខ្លួនដែលនៅក្បែរគ្នា បណ្តាលឱ្យឆេះអស់ និងបង្កឱ្យមានការភ្ញាក់ផ្អើល ព្រោះតែរឿងឱ្យម្តាយជូនទៅពេទ្យ ហើយម្តាយមិនជូនទៅ ក៏កើតចិត្តខឹង…
ខេត្តកំពង់ស្ពឺ ៖ បុរសជាកូនម្នាក់ត្រូវបានកម្លាំងនគរបាលស្រុកគងពិសីធ្វើការឃាត់ខ្លួនភ្លាមៗ បន្ទាប់ពីដុតផ្ទះម្តាយ និងផ្ទះប្អូនស្រីបង្កើតរបស់ខ្លួនដែលនៅក្បែរគ្នា បណ្តាលឱ្យឆេះអស់ និងបង្កឱ្យមានការភ្ញាក់ផ្អើល ព្រោះតែរឿងឱ្យម្តាយជូនទៅពេទ្យ ហើយម្តាយមិនជូនទៅ ក៏កើតចិត្តខឹង ដុតផ្ទះចោលតែម្តង។
ការឃាត់ខ្លួនបុរសជាកូនដុតផ្ទះម្តាយនិងផ្ទះប្អូនខាងលើ បានធ្វើឡើងកាលពីល្ងាចថ្ងៃទី១៥ ខែវិច្ឆិកា ឆ្នាំ២០២៥ នៅក្នុងភូមិបឹងប្រស្រែ ឃុំព្រៃញាតិ ស្រុកគងពិសី ខេត្ដកំពង់ស្ពឺ។
លោកវរសេនីយ៍ឯក យ៉ាង សុខលី អធិការនគរបាលស្រុកគងពិសីបានឱ្យដឹងថា បុរសជាកូនដែលឃាត់ខ្លួនឈ្មោះ សយ លីម អាយុ៣៥ឆ្នាំ រស់នៅជាមួយម្តាយក្នុងភូមិបឹងប្រស្រែ ឃុំព្រៃញាតិ ស្រុកគងពិសី ខេត្ដកំពង់ស្ពឺ ។ ចំណែកជនរងគ្រោះម្តាយបង្កើតឈ្មោះ ទន់ ណាត អាយុ៦០ឆ្នាំ ជាម្ចាស់ផ្ទះសង់អំពីឈើលើថ្មក្រោម មានទទឹង៦ម៉ែត្រ បណ្តោយ៧ម៉ែត្រ និងផ្ទះ១ខ្នងទៀតជារបស់ឈ្មោះ សយ និច ភេទស្រី អាយុ៣២ឆ្នាំ ត្រូវជាប្អូនស្រីរបស់ជនសង្ស័យ ។
លោកវរសេនីយ៍ឯក យ៉ាង សុខលីអធិការនគរបាលស្រុកគងពិសីបានបន្តថា នៅមុនពេលឃាត់ខ្លួនបុរសជាកូនខាងលើ គឺមានការដាក់បទបញ្ជាពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងអធិការដ្ឋាននគរបាលស្រុកគងពិសី ដឹកនាំដោយលោកវរសេនីយ៍ឯក យ៉ាង សុខលី អធិការនគរបាលស្រុក បានធ្វេីអន្ដរាគមន៍រថយន្ដពន្លត់អគ្គិភ័យចេញប្រតិបត្ដិការសង្គ្រោះករណីឆេះផ្ទះ០២ខ្នង នៅរសៀលថៃ្ងទី១៥ ខែវិច្ឆិកា ឆ្នាំ២០២៥ ស្ថិតនៅក្នុងភូមិបឹងប្រស្រែ ឃុំព្រៃញាតិ ស្រុកគងពិសី ខេត្ដកំពង់ស្ពឺ។
ប៉ុន្តែគួរឱ្យសោកស្តាយ អគ្គិភ័យបានឆេះលេបត្របាក់ផ្ទះទាំង០២ខ្នងអស់ស្ទេីរតែទាំងស្រុង ។ ករណីអគ្គិភ័យនេះបណ្ដាលមកពី កូនប្រុសចិត្តដុតផ្ទះម្តាយបង្កេីត និងឆេះផ្ទះប្អូនស្រីរបស់ខ្លួន អស់ទាំងស្រុង ដោយសារតែបុរសជាកូនខឹងម្តាយបង្កើតមិនជូនខ្លួនទៅពេទ្យ។ ព្រោះម្តាយនិងបងប្អូនលែងទុកចិត្តបុរសជាជនដៃដល់ ដែលធ្លាប់ប្រើប្រាស់គ្រឿងញៀន និងទើបតែចេញពីមណ្ឌលកែប្រែ ហើយត្អូញប្រាប់ម្តាយថា ខ្លួនឈឺ ម្តាយក៏និយាយថាឈឺអី សង្ស័យធ្វើពុតរកលេសទៅប្រើប្រាស់គ្រឿងញៀនទៀតហើយ។ គ្រាន់តែលឺពាក្យម្តាយពោលបែបនោះ កើតចិត្តខឹង ក៏យកដែកកេសដុតផ្ទះឆេះបង្កឱ្យមានការភ្ញាក់ផ្អើលតែម្តង។
លោកអធិការនគរបាលស្រុកគងពិសីបានបញ្ជាក់ថា÷ ករណីកូនប្រុសដុតផ្ទះម្តាយនិងផ្ទះប្អូនខ្លួនឯងនេះ រងការខូចខាតរបស់របរប្រើប្រាស់ក្នុងផ្ទះដូចជា៖
-ប្រាក់ដុល្លារអាមេរិកចំនួន៣០០ដុល្លារ
-វិញ្ញាបនបត្រសម្គាល់ម្ចាស់អចលនវត្ថុ ៤សន្លឹក
-កង់អាគុយ១គ្រឿង
-អត្តសញ្ញាណប័ណ្ណ២សន្លឹក
-ស្រូវចំនួន២៥០គីឡូក្រាម
-ទូទឹកកក១គ្រឿង
-ធុងបាស់១គ្រឿង
-សម្លៀកបំពាក់
-កាតវ៉ាក់សាំង ប័ណ្ណក្រីក្រ កាតគ្រីម៉ូតូ ២ សន្លឹក
-សំបុត្រកំណើត សៀវភៅស្នាក់នៅ
និងសម្លៀកបំពាក់ទាំងអស់តែម្តង។
បច្ចុប្បន្នបុរសជាកូនត្រូវបានឃាត់ខ្លួនសួរនាំនៅអធិការដ្ឋាននគរបាលស្រុកគងពិសី និងកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ