សង្គ្រាមអ៊ុយក្រែន ៖ អភិបាលក្រុងគៀវរដ្ឋធានីអ៊ុយក្រែន លោកវីតាលីគ្លីតស្កូអះអាងថា ក្រុងគៀវរងការវាយប្រហារខ្លាំងក្លារបស់រុស្ស៊ី នាព្រឹកថ្ងៃទី១៤ វិច្ឆិកា ហើយលោកស្នើដល់ប្រជាជននាំគ្នាស្ថិតក្នុងជម្រកការពារ។ ចំំណែកបណ្ដាអ្នកកាសែតបរទេសស្ថិតនៅក្នុងក្រុងនេះ បានស្ដាប់ឮស្នូរផ្ទុះនានា។…
សង្គ្រាមអ៊ុយក្រែន ៖ អភិបាលក្រុងគៀវរដ្ឋធានីអ៊ុយក្រែន លោកវីតាលីគ្លីតស្កូអះអាងថា ក្រុងគៀវរងការវាយប្រហារខ្លាំងក្លារបស់រុស្ស៊ី នាព្រឹកថ្ងៃទី១៤ វិច្ឆិកា ហើយលោកស្នើដល់ប្រជាជននាំគ្នាស្ថិតក្នុងជម្រកការពារ។ ចំំណែកបណ្ដាអ្នកកាសែតបរទេសស្ថិតនៅក្នុងក្រុងនេះ បានស្ដាប់ឮស្នូរផ្ទុះនានា។
តាមតេឡេក្រាមអភិបាលរូបនោះថ្លែងថា កងកម្លាំងការពារអាកាសកំពុងតែធ្វើប្រតិបត្តិការនៅទីនោះ ។ លោកថាការវាយប្រហារលើកនេះរបស់សត្រូវជាមួយដ្រូននិងមីស៊ីលលើរដ្ឋធានីពិតជាធំធេង ដែលតាមសេចក្ដីរាយការណ៍ដំបូងៗថាបណ្ដាលឲ្យមនុស្សប្រមាណ១២នាក់រងរបួស ។
តាមព័ត៌មានដំបូងថា បណ្ដាបំណែកដ្រូនបានធ្លាក់ចំអគារស្នាក់នៅកម្ពស់៥ជាន់មួយ ហើយមានភ្លើងឆាបឆេះក្នុងសង្កាត់ជាច្រើនបន្ទាប៉ពីការវាយប្រហារ ហើយបណ្ដាអ្នកជួយសង្គ្រោះត្រូវបានប្រមូល ។ ថ្នូរផ្ទុះខ្លាំងៗ លាន់ឮនៅកណ្ដាលក្រុងគៀវ ដោយគេឃើញកងការពារអាកាសខិតខំបាញ់ទម្លាក់បណ្ដាដ្រូននិងមីស៊ីលរុស្ស៊ី ។
អភិបាលក្រុងអៀពីនក្នុងតំបន់ក្រុងគៀវលើកឡើងពីរាត្រីដ៏លំបាក ជាមួយដ្រូននិងគ្រាប់មីស៊ីលច្រើនគ្រាប់ហោះហើរលើក្រុង។ ម្យ៉ាងវិញទៀតកងទ័ពរុស្ស៊ី នៅបន្តវាយរុលទៅមុខនៅភាគខាងកើតអ៊ុយក្រែន ពិសេសក្នុងតំបន់ដុនបាស់ កន្លែងប្រមូលផ្ដុំការប្រយុទ្ធគ្នាខ្លាំងក្លានាពេលថ្មីៗនេះ ។ ទន្ទឹមនឹងនេះ រុស្ស៊ីបង្កើនចាប់តាំងពីច្រើនសប្ដាហ៍មកហើយ ការវាយប្រហារលើបណ្ដាហេដ្ឋារចនាសម្ព័ន្ធថាមពល និងបណ្ដាញផ្លូវដែកអ៊ុយក្រែន ពេលធាតុអាកាសត្រជាក់ចាប់ផ្ដើម ជាមួយរដូវរងាជិតមកដល់។
ចំណែករុស្ស៊ីវិញ អាជ្ញាធររាយការណ៍នាព្រឹកថ្ងៃទី១៤ វិច្ឆិកា ពីការវាយប្រហារមួយរបស់អ៊ុយក្រែន ប្រឆាំងក្រុងកំពង់ផែប្រេងកាតណូវ៉ូរ៉ូសស៊ីអ៊ីស្ក៍ជាប់សមុទ្រខ្មៅ។ រោងចក្រចម្រាញ់ប្រេងកាតមួយនៅទីនោះរងការប៉ះពាល់ ដើយភ្លើងឆាបឆេះដែលក្រោយមកត្រូវបានពន្លត់ ។ អគាររស់នៅជាច្រើនរងការខូចខាត ដោយបំណែកដ្រូន បណ្ដាលឲ្យមនុស្សម្នាក់រងរបួស។ បន្ទាប់ពីការវាយប្រហារខ្លាំងក្លាលើក្រុងកំពង់ផែណូវ៉ូរ៉ូសស៊ីអ៊ីស្ក៍បណ្ដាបំណែកដ្រូនធ្វើឲ្យខូចខាតនាវាស៊ីវិលមួយគ្រឿង ក្នុងកំពង់ផែនេះ បណ្ដាលឲ្យសមាជិកក្រុមនាវិក៣នាក់រងរបួស ៕
ចែករំលែកព័តមាននេះ