សង្គ្រាមអ៊ុយក្រែន ៖ ខណៈរដ្ឋមន្ត្រីការបរទេសអ៊ុយក្រែនបានស្នើដល់ប្រមុខការទូតនៃក្រុមប្រទេសមហាឧស្សាហកម្មG7 នូវជំនួយសម្រាប់វាយរុញច្រានការវាយប្រហារតាមអាកាសរបស់
រស្ស៊ី ដែលបណ្ដាលឲ្យមានការដាច់ភ្លើងក្នុងទូទាំងប្រទេស ពេលរដូវរងាមកដល់ រដ្ឋមន្ត្រីការបរទេសនៃក្រុមនេះមិនបានបន្តឹងសំឡេងដាក់រស្ស៊ីដូចមុនៗឡើយ ដោយវាយតម្លៃថា បទឈប់បាញ់គ្នាមួយគឺចាំបាច់ជាបន្ទាន់បំផុតនៅអ៊ុយក្រែន បន្ទាប់ពីសង្គ្រាមជាង៣ឆ្នាំ។
ក្នុងសេចក្ដីប្រកាសចុងក្រោយបន្ទាប់ពីកិច្ចប្រជុំរយៈពេល២ថ្ងៃនៅតំបន់ទឹកធ្លាក់ញា់ហ្គារ៉ាកាណាដាពីថ្ងៃទី១១ វិច្ឆិកា មក រដ្ឋមន្ត្រីការបរទេសអាមេរិក បារាំង កាណាដា បារាំង អាល្លឺម៉ង អ៊ីតាលី និងជប៉ុនថ្លែងថា យើងលើកជាថ្មីថា បទឈប់បាញ់គ្នាគឺចាំបាច់បន្ទាន់។ បណ្ដាព្រំដែនអន្តរជាតិមិនត្រូវកែប្រែដោយកម្លាំងឡើយ ។ រដ្ឋមន្ត្រីទាំងនោះបានលើកជាថ្មីពីការគាំទ្រប្ដូរផ្ដាច់ដល់អ៊ុយក្រែន និងអធិបតេយ្យភាពរបស់ប្រទេសនោះ។
ថ្លែងក្នុងឱកាសកិច្ចប្រជុំនោះ រដ្ឋមន្ត្រីការទេសអ៊ុយក្រែន លោកអានឌ្រីអ៊ីស៊ីប៊ីហា ដែលទៅចូលរួមដែរលើកឡើងថា អ៊ុយក្រែនចង់បញ្ចប់សង្គ្រាមដោយឆាប់បំផុត តាមដែលអាចធ្វើបាននិងអំពាវនាវដល់G7 ឲ្យបន្តវិនិយោគ ក្នុងការផលិតមីស៊ីលនិងដ្រូននិងជួយការពារដែនអាកាសអ៊ុយក្រែន។ អ៊ុយក្រែនត្រូវជម្នះរដូវរងាដ៏សែនលំបាកនិងតឹងតែងបំផុត។ យើងត្រូវការនូវការជួយទ្រទ្រង់ពីសំណាក់បណ្ដាដៃគូយើង។ កាលពីថ្ងៃទី១២វិច្ឆិកាកាណាដា ប្រកាសពីការដាក់ទណ្ឌកម្មថ្មីប្រឆាំង
រស្ស៊ី ហើយមួយថ្ងៃមុននេះអង់គ្លេសសន្យាផ្ដល់ហិរញ្ញវត្ថុជួយដល់ហេដ្ឋារចនាសម្ព័ន្ធថាមពលអ៊ុយក្រែន។ លោកថាប្រធានាធិបតីរស្ស៊ីលោកវ្ល៉ាឌីមៀរពូទីនតែងស្រមៃជានិច្ចថានឹងអាចឈ្នះ
សង្គ្រាម។
រដ្ឋមន្ត្រីការបរទេសអាមេរិកលោកម៉ាកូរូប៊ិយ៉ូមិនបានប្រកាសពីការផ្ដួចផ្ដើមគំនិតថ្មីរបស់អាមេរិកឡើយ តែតាមបណ្ដាញសង្គមលោកពោលថា កិច្ចប្រជុំលើកនេះអាចពិនិត្យលើបណ្ដាមធ្យោបាយពង្រឹងកិច្ចការពាររបស់អ៊ុយក្រែន ហើយបញ្ចប់ជម្លោះបង្ហូរឈាម។ លោកបន្តថាសហរដ្ឋអាមេរិកនៅតែតាំងចិត្តធ្វើការជាមួយបណ្ដាដៃគូ ដើម្បីលើកទឹកចិត្តរស្ស៊ី ឲ្យបន្តការខិតខំប្រឹងប្រែងខាងការទូតហើយចូលរួមដោះស្រាយជម្លោះជាមួយអ៊ុយក្រែនដើម្បីសន្តិភាពដ៏ស្ថិតស្ថេរមួយ។
ចែករំលែកព័តមាននេះ