បរទេស ៖ តម្លៃមាសអន្តរជាតិបានកើនឡើង ៥ លើក សម្រាប់ការជួញដូរនៅថ្ងៃទី១៣ ខែវិច្ឆិកា ឆ្នាំ២០២៥ ដើម្បីឈានដល់កម្រិតខ្ពស់បំផុតនៅក្នុងរយៈពេលជាង ៣…
បរទេស ៖ តម្លៃមាសអន្តរជាតិបានកើនឡើង ៥ លើក សម្រាប់ការជួញដូរនៅថ្ងៃទី១៣ ខែវិច្ឆិកា ឆ្នាំ២០២៥ ដើម្បីឈានដល់កម្រិតខ្ពស់បំផុតនៅក្នុងរយៈពេលជាង ៣ សប្តាហ៍ ដោយសារការរំពឹងទុកថា ការបើកដំណើរការរដ្ឋាភិបាលសហរដ្ឋអាមេរិកឡើងវិញ នឹងចាប់ផ្តើមលំហូរទិន្នន័យសេដ្ឋកិច្ចឡើងវិញ ក៏ដូចជាការរំពឹងទុកនៃការកាត់បន្ថយអត្រាការប្រាក់បន្ថែមទៀតពីធនាគារកណ្តាលអាមេរិក (Fed)។ នេះបើយោងតាមប្រភពពីទីភ្នាក់សារព័ត៌មាន Reuters នៅរសៀលថ្ងៃទី១៣ ខែវិច្ឆិកា ឆ្នាំ២០២៥។
តម្លៃមាសអន្តរជាតិភ្លាមៗ បានកើនឡើងដល់ ៤ ២០៧ដុល្លារក្នុង១អោន ឬ ៥ ០៦៨ដុល្លារក្នុង១តម្លឹង គិតត្រឹម ០១:៣៧នាទីរសៀលថ្ងៃទី១៣ ខែវិច្ឆិកា (ម៉ោងនៅកម្ពុជា) ដែលជាកម្រិតខ្ពស់បំផុត ចាប់តាំងពីថ្ងៃទី២១ ខែតុលា ឆ្នាំ២០២៥។
លោក Jigar Trivedi អ្នកវិភាគស្រាវជ្រាវជាន់ខ្ពស់ក្រុមហ៊ុន Reliance Securities បានលើកឡើងថា មាសកំពុងតែបន្តកើនឡើងតម្លៃរបស់ខ្លួន ដែលជំរុញដោយកម្សោយប្រាក់ដុល្លារអាមេរិក និងការរំពឹងទុកនៃការកាត់បន្ថយអត្រាការប្រាក់របស់ Fed។ វិសាលភាពតម្លៃសម្រាប់កម្រិតខ្ពស់ជាង ៤ ៣០០ដុល្លារ/អោន ឬ ៥ ១៨០ដុល្លារ/តម្លឹង ត្រូវបានរំពឹងទុកនៅចុងឆ្នាំនេះ។
ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១២ ខែវិច្ឆិកា បានចុះហត្ថលេខាលើច្បាប់ ដើម្បីបញ្ចប់ការបិទរដ្ឋាភិបាលអាមេរិក (Shutdown) រយៈពេលយូរបំផុតនៅក្នុងប្រវត្តិសាស្ត្រអាមេរិក ដោយបានចាប់ផ្តើមតាំងពីថ្ងៃទី១ ខែតុលា ឆ្នាំ២០២៥ មកម្ល៉េះ។ ការបិទរដ្ឋាភិបាលអាមេរិក បានបញ្ឈប់ការចេញផ្សាយទិន្នន័យសេដ្ឋកិច្ចសំខាន់ៗ រួមទាំងរបាយការណ៍ប្រាក់បៀវត្សរ៍ និងអតិផរណាផងដែរ។
យោងតាមបណ្តាអ្នកសេដ្ឋកិច្ច ៨០% ដែលត្រូវបានស្ទង់មតិដោយ Reuters បានឱ្យដឹងថា Fed នឹងកាត់បន្ថយអត្រាការប្រាក់ចំនួន ២៥ពិន្ទុមូលដ្ឋានម្តងទៀត នៅខែក្រោយ ដើម្បីគាំទ្រដល់ទីផ្សារការងារដែលកំពុងចុះខ្សោយ។
តម្លៃមាសអន្តរជាតិបានកើនឡើង ៦០% ធៀបនឹងឆ្នាំមុន ដោយឈានដល់កម្រិតខ្ពស់បំផុតក្នុងប្រវត្តិសាស្ត្រ ៤ ៣៨១ដុល្លារ/អោន ឬ ៥ ២៧៨ដុល្លារ/តម្លឹង កាលពីថ្ងៃទី២០ ខែតុលា កន្លងទៅ ដោយសារតែភាពតានតឹងភូមិសាស្ត្រនយោបាយ និងពាណិជ្ជកម្ម រួមទាំងក្តីរំពឹងកាន់តែខ្លាំងនៃការកាត់បន្ថយអត្រាការប្រាក់របស Fed ពីបណ្តាវិនិយោគិន៕
ចែករំលែកព័តមាននេះ