ខេត្តសៀមរាប ៖ ក្រុមប្រជាសហគមន៍ព្រៃឈើមកពីខេត្តពោធិសាត់ និង ខេត្តកំពង់ធំ បានទទួលចំណេះដឹងពីការកែច្នៃវល្លិរពាក់ចេញជាសម្ភារប្រើប្រាស់ប្រចាំថ្ងៃពីដូនចាស់នៅតំបន់អង្គរ ខេត្តសៀមរាប ដើម្បីបន្តចែករំលែកទៅ ដល់អ្នកជំនាន់ក្រោយនៅក្នុងសហគមន៍របស់ពួកគាត់ បង្កើតមុខរបរបន្ថែម…
ខេត្តសៀមរាប ៖ ក្រុមប្រជាសហគមន៍ព្រៃឈើមកពីខេត្តពោធិសាត់ និង ខេត្តកំពង់ធំ បានទទួលចំណេះដឹងពីការកែច្នៃវល្លិរពាក់ចេញជាសម្ភារប្រើប្រាស់ប្រចាំថ្ងៃពីដូនចាស់នៅតំបន់អង្គរ ខេត្តសៀមរាប ដើម្បីបន្តចែករំលែកទៅ ដល់អ្នកជំនាន់ក្រោយនៅក្នុងសហគមន៍របស់ពួកគាត់ បង្កើតមុខរបរបន្ថែម កាត់បន្ថយចំណាកស្រុក និងចូលរួមអភិរក្សអនុផលព្រៃឈើ តាមរយៈអង្គការកម្មវិធីផ្លាស់ប្តូរបទ ពិសោធន៍អនុផលព្រៃឈើកម្ពុជា ដោយមាន ការចូលរួមពីដូនចាស់ដែលមានជំនាញតាំងពីដូនតាមក ក្នុងភូមិពពិស សង្កាត់ក្របីរៀល ក្រុងសៀមរាប។
ប្រជាសហគមន៍ បានសម្តែងនូវការសាទរចំពោះការទទួលបានជំនាញថ្មីនេះ ដោយពួក គាត់យល់ឃើញថា ការចាប់យកជំនាញកែច្នៃវល្លិរពាក់ជាវត្ថុប្រើប្រាស់ អាចក្លាយជាមុខរបរប្រចាំថ្ងៃដ៏សំខាន់ ជាពិសេសគឺការកាត់បន្ថយការធ្វើចំណាកស្រុក និងជួយអភិរក្សមុខជំនាញកែច្នៃវត្ថុអនុស្សាវរីយ៍ខ្មែរនេះ នៅក្នុងសហគមន៍របស់ពួកគាត់ ខណៈដែលជំនាញនេះមិនសូវមានអ្នកបន្តវេន។ សម្ភារដែលធ្វើពីវល្លិរពាក់ មានសារៈសំខាន់សម្រាប់ប្រើប្រាស់ប្រចាំថ្ងៃ និងមានទីផ្សារខ្ពស់ដូចជានៅតាមសណ្ឋាគារ និងជាវត្ថុអនុស្សាវរីយ៍ពេញនិយមសម្រាប់ភ្ញៀវទេសចរ។
លោក ដួង សារឿន មន្ត្រីខណ្ឌរដ្ឋបាលព្រៃ ឈើ ខេត្តសៀមរាបបានឱ្យដឹងថា ការចាប់យក ចំណេះដឹងពីការកែច្នៃវល្លិរពាក់នេះ ពិតជាមាន ប្រយោជន៍សម្រាប់សហគមន៍ ក្នុងការចូល រួម ចំណែកកាត់បន្ថយភាពក្រីក្រ បង្កើនមុខរបរការ ងារ និងជាពិសេសបានជួយអភិរក្ស ព្រមទាំងជំរុញការដាំវល្លិរពាក់នៅក្នុងសហគមន៍ឱ្យកាន់ តែច្រើនឡើង ។ បច្ចុប្បន្ននេះ វល្លិរពាក់មិនមាន ការខ្វះខាតនោះទេហើយលោកគាំទ្រយ៉ាងពេញ ទំហឹងចំពោះប្រជាសហគមន៍ដែលបានរៀនជំនាញកែច្នៃជាវត្ថុមានតម្លៃចេញពីវល្លិរពាក់នេះព្រោះពួកគាត់បាននាំគ្នាទៅកាប់នៅក្នុងព្រៃ ។
លោក ស៊ឹម ប៊ុនធឿន ប្រធានអង្គការកម្មវិធីផ្លាស់ប្ដូរបទពិសោធន៍អនុផលព្រៃឈើកម្ពុជា បានបង្ហាញថា គោលបំណងនៃការផ្តល់ជំនាញនេះ គឺដើម្បីផ្តល់នូវគំនិត និងវិធីសាស្ត្រកែច្នៃឱ្យកាន់តែមានភាពទាក់ទាញ សម្រាប់ការចូលទៅកាន់ទីផ្សារ ជាពិសេសទីផ្សារទេសចរណ៍។ ការបណ្តុះបណ្តាលនេះ ក៏ដើម្បីបង្កើនការយល់ដឹងបន្ថែមទៀតដល់សហគមន៍លើជំនាញ ដែលអាចបន្តទៅកាន់គណៈកម្មការសហគមន៍ផ្សេងទៀត ក្នុងការទទួលបានចំណេះដឹងលើការកែច្នៃ។
លោកបានបញ្ជាក់ថា រពាក់អាចកែច្នៃចេញជាផលិតផលផ្សេងៗជាច្រើនដូចជា៖ ខេង កញ្ជើ បង្គីត្រកត្រី ជាលហាលត្រី ផើងផ្កា ជើងពាន ឈុតសាឡុង រង្វេលឆ្នាំង ធុងសំរាម មួក កន្ទេល និងសម្ភារប្រើប្រាស់ជាច្រើនទៀត ដែលសម្ភារទាំងនេះ ត្រូវបានរៀបចំផលិតផលទាំងនោះក្លាយជាខ្សែច្រវាក់ផ្គត់ផ្គង់ដ៏សំខាន់ក្នុងវិស័យទេសចរណ៍បន្ថែមទៀត ។
សូមបញ្ជាក់ ថា ពួកគាត់ បាននាំគ្នា ចូលទៅក្នុងព្រៃ ដើម្បីកាប់រពាក់យកមកហាលថ្ងៃ រួចលួសយកភ្នែកចេញ ហើយយកមកក្រងធ្វើជាកន្ទ្រក ជាល ខេង កញ្ជើ បង្គំ ត្រកត្រី ជាលហាលត្រី ផើងផ្កា ជើងពាន ឈុតសាឡុង រង្វេលឆ្នាំង ធុងសំរាម មួក កន្ទេល និងសម្ភារប្រើប្រាស់ជាច្រើនទៀត៕
ចែករំលែកព័តមាននេះ