ខេត្តកំពត ៖ យោងតាមព័ត៌មានពីមន្ត្រីជំនាញបានបញ្ជាក់ថា ក្នុងរយៈពេលឈប់សម្រាក៣ថ្ងៃនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ខេត្តកំពតបានទទួលទេសចរណ៍ជិត២០ម៉ឺននាក់ ។ មន្ត្រីជំនាញថា…
ខេត្តកំពត ៖ យោងតាមព័ត៌មានពីមន្ត្រីជំនាញបានបញ្ជាក់ថា ក្នុងរយៈពេលឈប់សម្រាក៣ថ្ងៃនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ខេត្តកំពតបានទទួលទេសចរណ៍ជិត២០ម៉ឺននាក់ ។ មន្ត្រីជំនាញថា នេះជាជោគជ័យមួយសម្រាប់ខេត្តកំពត ហើយចំពោះដំណើរកម្សាន្តរបស់ពលរដ្ឋដ៏ច្រើនបែបនេះ ក៏បានបង្ហាញអំពីភាពជឿជាក់លើរាជរដ្ឋាភិបាល ក្រោយពេលមានកិច្ចព្រមព្រៀងសន្តិភាពកម្ពុជា-ថៃ ។ ក្រុមអ្នកផ្តល់សេវាទេសចរណ៍បានថ្លែងអំណរគុណដល់ឯកឧត្តមអភិបាលខេត្ត ដែលបានធ្វើឱ្យខេត្តកំពតមានភ្ញៀវមកលេងកំសាន្តច្រើននាបុណ្យប្រពៃណីជាតិរយៈពេលបីថ្ងៃនេះ។
ប្រធានមន្ទីរទេសចរណ៍ខេត្តកំពត លោកសយ ស៊ីណុល បានប្រាប់ឱ្យដឹងដែរថា ថ្ងៃឈប់សម្រាកនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក រយៈពេល ៣ថ្ងៃកន្លងមកនេះ បាននាំមកនូវភាពសប្បាយរីករាយយ៉ាងខ្លាំងចំពោះពលរដ្ឋកម្ពុជា ។ ហើយជាពិសេស ក្នុងនោះ ខេត្តកំពតទទួលបានភ្ញៀវមកសម្រាកលម្ហែសរុបចំនួន១៩៥.៦៩១នាក់ បានកើនឡើង៥០.៩៧% បើធៀបនឹងឆ្នាំ២០២៤ ក្នុងនោះភ្ញៀវអន្តរជាតិមានចំនួន ១.៤៨៧នាក់ ។ លោកថា វត្តមានភ្ញៀវដ៏ច្រើនបែបនេះ ក៏បានបង្ហាញអំពីភាពជឿជាក់ និងសប្បាយរីករាយរបស់ពលរដ្ឋ ក្រោយពេលរាជរដ្ឋភិបាលបានដោះស្រាយបញ្ហាព្រំដែនឱ្យមានភាពល្អប្រសើរ ក្រោមកិច្ចព្រមព្រៀងសន្តិភាពកម្ពុជា-ថៃ ។
លោកប្រធានមន្ទីរបានបន្តថា សម្រាប់រយៈពេល៣ថ្ងៃនេះដែរ សេវាស្នាក់នៅពុំមានសល់បន្ទប់នោះទេ ហើយការផ្តល់សេវាកម្មនានាក៏ពុំមានការតម្លើងថ្លៃគួរឱ្យកត់សម្គាល់ផងដែរ។ ទន្ទឹមនឹងនោះ ចំពោះស្ថានភាពទូទៅនៅតាមបណ្តារមណីយដ្ឋាន សហគមន៍ គោលដៅទេសចរណ៍នានាក្នុងខេត្ត ពុំមានបាតុភាពអ្វីកើតឡើងគួរឱ្យកត់សម្គាល់នោះទេ ។ រីឯបញ្ហាកកស្ទះ ក៏មិនមានការកកស្ទះយូរដែរ ដោយសារតែមានការសម្រួលចរាចរណ៍នៅតាមគោលដៅសំខាន់ៗក្នុងក្រុង ពីសំណាក់កងកម្លាំងរបស់ស្នងការដ្ឋាននគរបាលខេត្តកំពត ដែលដឹកនាំដោយលោកឧត្តមសេនីយ៍ទោ ម៉ៅ ច័ន្ទមធុរិទ្ធិ ស្នងការនគរបាលខេត្តកំពត ក្នុងរយៈពេល៣ថ្ងៃពេញ ។
ចំណែកអ្នកផ្តល់សេវាទេសចរណ៍បានឱ្យដឹងថា ក្នុងរយៈពេល៣ថ្ងៃនេះ កន្លែងពួកគាត់ពេញអស់ និងសូមអធ្យាស្រ័យចំពោះភ្ញៀវដែលមិនបានទទួលសេវារបស់ពួកគាត់ ឬមានការខ្វះចន្លោះត្រង់ណាមួយ ដោយសារចំនួនភ្ញៀវសម្រុកមកច្រើនពេក ។ ទន្ទឹមនឹងនោះពួកគាត់ក៏បានថ្លែអំណរគុណដល់ឯកឧត្តម អភិបាលខេត្តកំពត ដែលបានខិតខំរៀបចំខេត្ត បានល្អគ្រប់ជ្រុងជ្រោយ ទាំងសុវត្ថិភាព សន្តិសុខ សណ្តាប់ធ្នាប់ ពិសេសការរៀបចំតុបតែងលម្អ និងការបង្កើតសមិទ្ធផលថ្មីប្លែកៗសម្រាប់ទាក់ទាញភ្ញៀវទេសចរដែលមកលេងកំសាន្តផងដែរ។
ទោះជាយ៉ាងណាក៏ដោយ ទាំងភ្ញៀវទេសចរ និងអ្នកផ្តល់សេវាកម្មផ្នែកទេសចរណ៍សុទ្ធតែរំពឹងថា: ខេត្តកំពតក្រោមការដឹកនាំងរបស់ឯកឧត្តម ម៉ៅ ធនិន នឹងមានសមិទ្ធផលទេសចរណ៍ថ្មីល្អឯក លេចចេញជារូបរាងជាបន្តបន្ទាប់ទៀត ដែលនៅពេលខាងមុខដ៏ខ្លីនេះ ស្ពានវាងក្រុងដែលបំពាក់ដោយកង្ហារដ៏ធំ និងមានវ៉េរ៉ងដាសម្រាប់គយគន់ទេសភាពសមុទ្រ និងជើងភ្នំបូកគោនឹងចាប់ផ្តើមបុកគ្រឹះសាងសង់ ហើយរយៈពេលសាងសង់គឺត្រឹមតែ ១២ខែប៉ុណ្ណោះនឹងរួចរាល់ជាស្ថាពរ ៕
ចែករំលែកព័តមាននេះ