ខេត្តកណ្តាល ៖ ជនសង្ស័យម្នាក់ ធ្លាប់ជាប់គុកម្តងរួចមកហើយ ប៉ុន្តែមិនរាងចាលឡើយ បែកគំនិតដើរលួចតាមចំការគេឯង លើកនេះលួចផ្លែមៀន ត្រយូងចេក ត្រូវសមត្ថកិច្ចឃាត់ខ្លួន ថែមទាំងរកឃើញប្រើប្រាស់ដោយខុសច្បាប់នូវសារធាតុញៀន…
ខេត្តកណ្តាល ៖ ជនសង្ស័យម្នាក់ ធ្លាប់ជាប់គុកម្តងរួចមកហើយ ប៉ុន្តែមិនរាងចាលឡើយ បែកគំនិតដើរលួចតាមចំការគេឯង លើកនេះលួចផ្លែមៀន ត្រយូងចេក ត្រូវសមត្ថកិច្ចឃាត់ខ្លួន ថែមទាំងរកឃើញប្រើប្រាស់ដោយខុសច្បាប់នូវសារធាតុញៀន (ម៉ាទឹកកក) ថែមទៀត ។
សមត្ថកិច្ចឃាត់ខ្លួនបានកាលពីវេលាម៉ោង១រសៀល ថ្ងៃទី២៧ ខែតុលា ឆ្នាំ២០២៥ នៅចំណុចភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល ។
នគរបាលស្រុកស្អាង បានឲ្យដឹងថា ជនសង្ស័យ ដែលឃាត់ខ្លួនបានមានឈ្មោះ រ៉ុង សារ៉ុម ភេទប្រុស អាយុ ៤១ឆ្នាំ មុខរបរមិនពិតប្រាកដ ទីលំនៅភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល។ មានសារធាតុញៀន(វិជ្ជមាន) និងធ្លាប់ជាប់ពន្ធនាគារខេត្តកណ្ដាល ចំនួន០១លើក រយៈពេល១ឆ្នាំ និង៦ខែ ពីបទហិ.ង្សាដោយចេតនា ។
ក្នុងនោះវត្ថុតាងចាប់យក ៖
១-ត្រយូងចេកចំនួន ០៧ ត្រយូង
២-កាំបិតកែច្នៃចំនួន ០១ដើម ។
ចំណែកជនរងគ្រោះចំនួន ០២នាក់ មានឈ្មោះ ៖
១-ឈ្មោះ ហេង យូ ភេទស្រី អាយុ ៧២ឆ្នាំ ជនជាតិខ្មែរ មុខរបរ មន្ត្រីចូលនិវត្តន៍ មានទីលំនៅភូមិ បារ៉ែនលើ ឃុំ ស្វាយប្រទាល ស្រុកស្អាង ខេត្តកណ្តាល។(ម្ចាស់ផ្លែមៀន)
២-ឈ្មោះ ស្រេង ស៊ីវឡោ ភេទស្រី អាយុ ៦៥ ឆ្នាំ មុខរបរកសិក រស់នៅភូមិ បារ៉ែនលើ ឃុំ ស្វាយប្រទាល ស្រុស្អាង ខេត្តកណ្តាល។(ម្ចាស់ត្រយ៉ូងចេក)
នគរបាលបានឲ្យដឹងថា ជនសង្ស័យប្រើប្រាស់គ្រឿងញៀនជាប្រចាំ និងតែងតែលួចរបស់របរ និងផលដំណាំរបស់អ្នកភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល ជាញឹកញ៉ាប់។ នៅថ្ងៃទី២៧ ខែកក្តដា ឆ្នាំ២០២៥ វេលាម៉ោង១១ និង៣០នាទី ជនសង្ស័យឈ្មោះ រ៉ុង សារ៉ុម បានធ្វើកម្មភាពលួចបេះផ្លែមៀនរបស់ជនរងគ្រោះឈ្មោះ ហេង យូ បានកន្លះបាវ រួចហើយជនរងគ្រោះឈ្មោះ ហេង យូ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្វាយប្រទាលឲ្យជួយអន្តរាគមន៍ តែជនសង្ស័យឈ្មោះ រ៉ុង សារ៉ុម បានគេចខ្លួនចេញពីផ្ទះបាត់ ។
លុះនៅថ្ងៃទី២៧ ខែតុលា ឆ្នាំ២០២៥ វេលាម៉ោង១រសៀល ជនសង្ស័យឈ្មោះ រ៉ុង សារ៉ុម ក៏បានធ្វើសកម្មភាពលួចកាច់ត្រយូងចេករបស់ជនរងគ្រោះឈ្មោះ ស្រេង ស៊ីវឡោ បានចំនួន ០៧ ត្រយូងហើយត្រូវបានសមត្ថកិច្ចនគរបាលប៉ុស្តិ៍ស្វាយប្រទាល ឃាត់ខ្លួនជនសង្ស័យ ឈ្មោះ រ៉ុង សារ៉ុម នាំមកប៉ុស្តិ៍ដើម្បីធ្វើការសាកសួរ។
បច្ចុប្បន្ន ជនសង្ស័យ ត្រូវឃាត់ខ្លួនបណ្ដោះអាសន្ននៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ