ទីក្រុងតូក្យូ៖ នៅទីបំផុត បុរសជនជាតិជប៉ុនដែលត្រូវតុលាការចោទប្រកាន់ពីបទសង្ស័យធ្វើឃាតអតីតនាយករដ្ឋមន្ត្រីជប៉ុន លោកស៊ីនហ្សូអេបេនោះ ឥឡូវនេះ គាត់បានឆ្លើយសារភាពទទួលកំហុសគ្រប់យ៉ាង។ នេះជាការបើកសវនាការស្ដាប់ការផ្ដល់ចម្លើយពីជនជាប់ចោទជាលើកដំបូងចាប់តាំងពីក្រោយអំពើបាញ់ប្រហារពីសំណាក់ខ្មាន់កាំភ្លើងម្នាក់នេះកាលពីឆ្នាំ២០២២។
ជនជាប់ចោទឈ្មោះទែតស៊ូយ៉ា យ៉ាម៉ាកាមី (Tetsuya Yamagami) វ័យ៤៥ឆ្នាំប្រាប់តុលាការសាលាដំបូងប្រចាំទីក្រុងណារ៉ា (Nara) ជាកន្លែងដែលគាត់ប្រព្រឹត្តអំពើបាញ់ប្រហារនោះថា «នេះជាការពិត, គ្មានអ្វីត្រូវសង្ស័យឡើយថាគាត់ជាអ្នកប្រព្រឹត្តអំពើបាញ់ប្រហារនោះ»។ គាត់ត្រូវបានចោទប្រកាន់ពីបទធ្វើឃាតលោកអាបេដោយប្រើប្រាស់កាំភ្លើងកែច្នៃ។ កាលនោះ លោកអាបេចុះឃោសនានៅក្នុងការបោះឆ្នោតថ្នាក់មូលដ្ឋាន។ ឥឡូវនេះ គេកំពុងរង់ចាំអ៊ុតសេចក្ដីសម្រេចនៅក្នុងសំណុំរឿងដ៏ល្បីមួយនេះដើម្បីចង់ដឹងថាតើតុលាការនឹងបន្ធូរបន្ថយទោស ឬក៏ដាក់ទោសកាន់តែធ្ងន់។
ខាងមេធាវីចុងចោទបកស្រាយថាកូនក្ដីរបស់ខ្លួនមានបញ្ហាផ្នែកអត្តចរិត និងអកប្បកិរិយាតាំងពីតូចព្រោះត្រូវរងការបៀតបៀនផ្នែកជំនឿសាសនា។ យោងតាមការការបញ្ជាក់ពីចុងចោទ ម្ដាយរបស់យ៉ាម៉ាកាមីដែលជាអ្នកដង្ហែតាមដោយឥតងាករេចំពោះនិកាយសាសនាឈ្មោះព្រះវិហាររួបរួម ឬយូនីហ្វ៊ីខេសិន ឆឺច (Unification Church) បានបរិច្ចាគប្រាក់១រយលានយ៉េន (៦៦ម៉ឺនដុល្លារ) ទៅឱ្យវិហារនេះដើម្បីដាក់ចូលទៅក្នុងមូលនិធិ។ ស្ត្រីជាម្ដាយរបស់ជនជាប់ចោទក៏ជាសាក្សីម្នាក់នៅក្នុងចំណោមសាក្សីសរុប១២នាក់ដែលឡើងផ្ដល់សក្ខីកម្មនៅក្នុងតុលាការកាលពីថ្ងៃទី២១ ខែមករា។
នៅពេលស្ដាប់ការផ្ដល់សក្ខីកម្មនោះ ព្រះរាជអាជ្ញាអះអាងថាជនជាប់ចោទឈ្មោះយ៉ាម៉ាកាមីមានចិត្តច្រណែននឹងនិកាយសាសនាខាងលើនេះដែលម្ដាយរបស់ខ្លួនបានបរិច្ចាគនូវទឹកប្រាក់ដ៏ច្រើនសន្ធឹកសន្ធាប់ ហើយជឿស៊ប់ទៅលើនិកាយនេះ។ ហេតុដូច្នេះ ខ្លួនក៏សម្រេចចិត្តប្រព្រឹត្តអំពើបាញ់ប្រហារលោកអាបេតែម្ដង។ កាលពីមុននេះ គេមិនសូវបានដឹងអំពីអាថ៌កំបាំងនៃសាសនានេះទេ។ ទើបតែក្រោយការបាញ់ប្រហារនោះ ការពិតត្រូវបានលាតត្រដាងថាមន្ត្រីជាន់ខ្ពស់របស់គណបក្សប្រជាធិបតេយ្យសេរីដែលកំពុងគ្រប់គ្រងប្រទេសជប៉ុនសព្វថ្ងៃនេះមានទំនាក់ទំនងយ៉ាងជិតស្និទ្ធជាមួយនឹងនិកាយនេះ។ ជនជាប់ចោទជឿជាក់ថានៅពេលខ្លួនបាញ់លោកអាបេនឹងធ្វើឱ្យសាធារណជនចាប់អារម្មណ៍ និងរិះគន់ចំពោះនិកាយសាសនានេះ។
ក្រៅពីសំណុំរឿងធ្វើឃាតលោកអាបេ យ៉ាម៉ាកាមីក៏ត្រូវបានតុលាការចោទប្រកាន់ពីបទបង្កការខូចខាតចំពោះអគារមួយខ្នងដោយសារការបាញ់សាកល្បងកាំភ្លើងរបស់គាត់ និងបទចោទមួយករណីទៀតពាក់ព័ន្ធនឹងការរំលោភច្បាប់ស្ដីពីការហាមឃាត់ការកាន់កាប់ និងផលិតកាំភ្លើង និងគ្រឿងផ្ទុះ។ ព្រះរាជអាជ្ញាយល់ថាទង្វើរបស់ជនជាប់ចោទបានផ្ដល់ផលវិបាកយ៉ាងធ្ងន់ធ្ងរមិនធ្លាប់មានចាប់តាំងពីក្រោយសង្គ្រាមលោកលើកទី២។ ដូច្នេះ ព្រះរាជអាជ្ញាយល់ថាការយកបញ្ហាចិញ្ចឹមបីបាច់ជនជាប់ចោទក្រោមឥទ្ធិពលជំនឿសាសនានោះមកធ្វើជាសម្អាងដើម្បីទទួលបានការបន្ធូរបន្ថយទោសហាក់ដូចជាមិនត្រឹមត្រូវទេ។
ឥឡូវនេះ និកាយសាសនាយូនីហ្វ៊ីខេសិន ឆឺច (Unification Church) កំពុងស្ថិតក្រោមការស៊ើបអង្កេតយ៉ាងហ្មត់ចត់ដោយសារការជាប់ពាក់ព័ន្ធយ៉ាងជ្រៅទៅក្នុងវិស័យនយោបាយ។ នៅជប៉ុនវិស័យសាសនា និងអាណាចក្រត្រូវតែចែកឱ្យដាច់ពីគ្នា។ ចំណុចនេះត្រូវបានចែងយ៉ាងច្បាស់នៅក្នុងរដ្ឋធម្មនុញ្ញ។ ហេតុដូច្នេះ Unification Church កំពុងប្រឈមនឹងការរំលាយចោលទៅតាមបទបញ្ជាដ៏ម៉ឺងម៉ាត់របស់តុលាការ។ ទោះជាយ៉ាងណាក្ដី និកាយសាសនានេះកំពុងដាក់ពាក្យប្ដឹងទាស់នឹងសេចក្ដីសម្រេច។ នេះបើយោងតាមការផ្សាយរបស់ក្យូដូ និងប្រភពដទៃទៀត៕
ចែករំលែកព័តមាននេះ