សង្គ្រាមអ៊ុយក្រែន ៖ សហភាពអឺរ៉ុបដែលប្រកាស កាលថ្ងៃទី២២ តុលា ថា បានរកឃើញកិច្ចព្រមព្រៀងមួយ ដើម្បីពង្រឹងទណ្ឌកម្មរបស់ខ្លួនលើប្រេងកាត និងឧស្ម័នរុស្ស៊ី និងរារាំងធនធានរបស់វិមានក្រឹមឡាំង…
សង្គ្រាមអ៊ុយក្រែន ៖ សហភាពអឺរ៉ុបដែលប្រកាស កាលថ្ងៃទី២២ តុលា ថា បានរកឃើញកិច្ចព្រមព្រៀងមួយ ដើម្បីពង្រឹងទណ្ឌកម្មរបស់ខ្លួនលើប្រេងកាត និងឧស្ម័នរុស្ស៊ី និងរារាំងធនធានរបស់វិមានក្រឹមឡាំង ក្នុងសង្គ្រាមរបស់ខ្លួនប្រឆាំងអ៊ុយក្រែន ហើយភ្លាមៗសហរដ្ឋអាមេរិកបានធ្វើតាមនិងសម្រេចដាក់ទណ្ឌកម្មប្រឆាំងបណ្ដាក្រុមហ៊ុនប្រេងរុស្ស៊ីដែរនោះ ក្នុងកិច្ចប្រជុំកំពូលរបស់ខ្លួនកាលពីថ្ងៃទី២៣ តុលា បានឲ្យគណៈកម្មាធិការអឹរ៉ុបពិនិត្យថា តើត្រូវរកខ្ទង់ណា ដើម្បីជួយខាងហិរញ្ញវត្ថុដល់អ៊ុយក្រែន រយៈពេល២ឆ្នាំខាងមុខនេះដោយសម្លឹងខ្លាំងលើទ្រព្យរុស្ស៊ី ដែលបង្កកទុកចាប់តាំងពីឆ្នាំ២០២២មក។
គម្រោងនោះ នៅមិនទាន់ច្បាស់នៅឡើយរង់ចាំជជែកគ្នាដោយលម្អិត ក្នុងកិច្ចប្រជុំកំពូលអឹរ៉ុបនាខែធ្នូខាងមុខនេះ។ សំណុំរឿងនោះផ្ដោតលើទឹកប្រាក់២១០ពាន់លានអឹរ៉ូ របស់ធនាគារកណ្ដាល
រុស្ស៊ី និងបណ្ដាអចលនទ្រព្យរុស្ស៊ីនៅសហភាពអឹរ៉ុប ដែលបង្កកទុកចាប់តាំងពីរុស្ស៊ីលុកលុយចូលអ៊ុយក្រែនមក ។ សហភាពអឹរ៉ុបចង់ប្រើទ្រព្យសម្បត្តិរបស់រុស្ស៊ីនោះជាប្រាក់កម្ចីរបស់អ៊ុយក្រែន ក្នុងទំហំទឹកប្រាក់១៤០ពាន់លានអឺរ៉ូ។
បែបនេះ គឺដើម្បីបញ្ចៀសការរឹបអូសយកឆៅៗនូវមូលនិធិទាំងនោះចាត់ជាបន្ទាត់ក្រហម ដោយរដ្ឋជាច្រើនជាសមាជិក។ ការផ្ដួចផ្ដើមគំនិតនេះជួបការជំទាស់ពិសេសរបស់បែលហ្ស៊ិកដែលមានទ្រព្យរុស្ស៊ីបង្កកទុកច្រើនជាងគេ។ ប្រធានាធិបតីបារាំងលោកអេមម៉ានុយអែលម៉ាក្រុងទទួលស្គាល់ថា ដំណោះស្រាយនោះមានបញ្ហាផ្លូវច្បាប់ចោទច្រើនណាស់ រួមទាំងបញ្ហានែការបែងចែកគ្រោះថ្នាក់គ្នាផង។
ចំពោះទណ្ឌកម្មរបស់អាមេរិកប្រឆាំងរុស្ស៊ី ប្រធានាធិបតីប្រទេសនេះ លោកវ្ល៉ាឌីមៀរពូទីនគូសបញ្ជាក់នាថ្ងៃទី២៣ តុលា ថា ទណ្ឌកម្មអាមេរិកលើរុស្ស៊ី ពុំមានផលប៉ះពាល់អ្វីធ្ងន់ធ្ងរលើសេដ្ឋកិច្ចរបស់ប្រទេសលោកឡើយ។ ទោះបីយ៉ាងណាលោកស្នើបន្តការចរចា ក្រោយលោកដូណាល់ត្រាំប្រកាសលុបចោលការជួបគ្នាជាមួយលោកគ្រោងធ្វើនៅហុងគ្រីក៏ដោយ។ លោកពូទីនវាយតមៃ្លថា ទណ្ឌកម្មដែលអាមេរិកប្រកាសនាពេលមុននេះពិតជាខ្លាំង ហើយអាចបង្កផលវិបាកមួយចំនួន តែមិនប៉ះពាល់ធ្ងន់ធ្ងរដល់សុខភាពសេដ្ឋកិច្ចរបស់យើងឡើយ។
លោកពូទីនបន្តទៀតថា ទណ្ឌកម្មទាំងនោះគ្រាន់តែជាការប៉ុនប៉ងគាបសង្កត់ តែគ្មានប្រទេសណាមួយឬប្រជាជនណាមួយដែលគោរពខ្លួនឯងធ្វើសេចក្ដីសម្រេចចិត្តបែបនេះឡើយ។ លោកធានាថាផ្នែកប្រេងកាតរុស្ស៊ីមានទំនុកចិត្ត និងមានការតាំងចិត្ត។ក្រុងវ៉ាស៊ីនតោនមុននេះប្រកាស ពីការពង្រឹងទណ្ឌកម្មរបស់ខ្លួនប្រឆាំងរុស្ស៊ី ។ ទណ្ឌកម្ម ខ្លាំងនោះគឺប្រឆាំងក្រុមហ៊ុនប្រេងរុស្ស៊ីROSNEFTនិង LUKOIL។ ហេតុផលបើតាមក្រុងវ៉ាស៊ីនតោនថា មកពីការខ្វះឆន្ទៈរបស់រុស្ស៊ី ក្នុងការចូលរួមក្នុងដំណើរការសន្តិភាពដើម្បីបញ្ចប់សង្គ្រាមអ៊ុយក្រែន។ ទណ្ឌកម្មទាំងនោះមានការបង្កកភាគហ៊ុន របស់ក្រុមហ៊ុនប្រេងយក្សទាំង២នោះនៅសហរដ្ឋអាមេរិក ព្រមទាំងហាមឃាត់បណ្ដាសហគ្រាសអាមេរិកមិនឲ្យរកស៊ីជាមួយក្រុមហ៊ុនទាំងនេះ។
ពេលដែលទំនាក់ទំនងរវាងអាមេរិក និងរុស្ស៊ីកាន់តែដុនដាប លោកពូទីនកាលពីថ្ងៃទី២៣តុលាបានគំរាម តបតវិញយ៉ាងខ្លាំងក្លាបំផុត ក្នុងករណីមានការវាយប្រហារដែនដីរុស្ស៊ីដោយមីស៊ីលរយៈឆ្ងាយអាមេរិកធុនTOMAHAWK ដែលអ៊ុយក្រែនទាមទារចង់បាន។ ពេលទៅកាន់សេតវិមាននាពេលមុននេះជួបជាមួយលោកត្រាំ ប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី បានទទូចស្នើសុំការផ្គត់ផ្គង់មីស៊ីលធុននោះដែលអាចបាញ់បានចម្ងាយ ១៦០០គីឡូម៉ែត្រដែលអ៊ុយនក្រែនអាចប្រើវាយប្រហារចូលជ្រៅក្នុងដែនដីរុស្ស៊ីជាថ្នូរនឹងដ្រូនអ៊ុយក្រែនច្រើពាន់គ្រឿង៕
ចែករំលែកព័តមាននេះ